Raghava Lawrence politics entry: ప్రముఖ నటుడు, దర్శకుడు రాఘవ లారెన్స్ తన రాజకీయ ప్రవేశంపై గత కొద్దిరోజులుగా సాగుతున్న ఊహాగానాలకు, ప్రచారానికి ఎట్టకేలకు తెరదించారు.
తమిళనాడు ముఖ్యమంత్రి విజయ్ నేతృత్వంలోని ‘టీవీకే’ (TVK) పార్టీ తరఫున తాను తిరుచ్చి ఈస్ట్ నియోజకవర్గం నుంచి అసెంబ్లీ ఎన్నికల్లో పోటీ చేయబోతున్నానంటూ వస్తున్న వార్తల్లో ఎలాంటి నిజం లేదని ఆయన ఘంటాపథంగా స్పష్టం చేశారు. ఇటీవల రాజకీయాలపై తాను చేసిన కొన్ని వ్యాఖ్యలు పెద్ద వివాదానికి దారితీయడంతో, లారెన్స్ తాజాగా ఒక వివరణాత్మక వీడియోను విడుదల చేశారు. తన మాటలను కొందరు తప్పుగా అర్థం చేసుకుని ప్రచారం చేశారని ఆయన ఆవేదన వ్యక్తం చేశారు. తన తల్లి, సన్నిహితులు, అలాగే తన సేవా సంస్థ సభ్యుల సూచన మేరకే ప్రజలకు ఈ విషయంలో పూర్తి వివరణ ఇవ్వాల్సి వచ్చిందని చెప్పారు.
Raghava Lawrence clarifies his stance on entering politics!
Raghava Lawrence politics entry: సేవే నా మార్గం.. భావోద్వేగానికి గురైన నటుడు
ఈ వీడియో ద్వారా గత 20 ఏళ్లుగా తాను ఆర్థికంగా, వైద్యపరంగా ఆదుకుంటున్న రాజగోపాల్ అనే దివ్యాంగుడిని లారెన్స్ అందరికీ పరిచయం చేశారు. సమాజంలో ఒక్క వ్యక్తికి సేవ చేయడమే ఎంతో బాధ్యతతో కూడుకున్న విషయమని, అలాంటిది ప్రస్తుతం దాదాపు 60 మంది అనాథ పిల్లల విద్య, సంరక్షణ బాధ్యతలను తానే స్వయంగా చూసుకుంటున్నానని వెల్లడించారు. కొన్ని రోజుల క్రితం తాను ఆదుకున్న పిల్లలంతా కలిసి ‘ఫాదర్స్ డే’ సందర్భంగా తనను సత్కరించారని, అది తన జీవితంలో మరచిపోలేని క్షణమని గుర్తుచేసుకున్నారు. ప్రజల ప్రేమ వల్లే తాను ఈ స్థాయికి వచ్చానని, అయితే తనపై వస్తున్న రాజకీయ విమర్శలు వ్యక్తిగతంగా ఎంతో బాధించాయని పేర్కొన్నారు. ఈ పరిణామాల వల్ల తన తల్లి కూడా తీవ్ర ఆవేదనకు గురై, తనను రాజకీయాలకు దూరంగా ఉండాలని కోరినట్లు లారెన్స్ తెలిపారు.
తిరుచ్చి ఈస్ట్’ పోటీపై లారెన్స్ ఏమన్నారంటే?
తిరుచ్చి ఈస్ట్ నియోజకవర్గం నుంచి నేను పోటీ చేస్తాననే ప్రచారంలో వాస్తవం లేదు. టికెట్ ఎవరికి ఇవ్వాలనే నిర్ణయం పూర్తిగా ముఖ్యమంత్రి విజయ్ తీసుకోవాల్సిన విషయం. పైగా, ఆ నియోజకవర్గంలో చాలా కాలంగా పార్టీ కోసం ఎంతోమంది నాయకులు కష్టపడి పనిచేస్తున్నారు. వారి కష్టాన్ని, త్యాగాన్ని పక్కనబెట్టి నేను మధ్యలో వచ్చి సీటు ఆశించడం సరైన పద్ధతి కాదు. తాను రాజకీయాల్లోకి రావాలా వద్దా అని ప్రజలనే అడిగానని, అందులో తప్పేముందని ఆయన ప్రశ్నించారు. తమ్ముడిలా భావించే ప్రజల అభిప్రాయానికి తాను ఎప్పుడూ విలువ ఇస్తానని చెప్పారు. ప్రస్తుతం తాను లోకేష్ కనగరాజ్ కథ అందిస్తున్న 'బెంజ్' అలాగే తన సొంత ఫ్రాంచైజీ 'కాంచన 4' చిత్రాల షూటింగ్ షెడ్యూల్స్తో ఎంతో బిజీగా ఉన్నానని లారెన్స్ తెలిపారు. ఈ సినిమాల తర్వాత, త్వరలోనే తన రాజకీయ భవిష్యత్ మరియు తదుపరి అడుగులపై పూర్తి వివరాలను అధికారికంగా వెల్లడిస్తానని చెబుతూ లారెన్స్ ఈ వివాదానికి ముగింపు పలికారు.