రైలులో దారుణం.. వృద్ధురాలని కూడా చూడకుండా రైల్వే సిబ్బంది అమానుషం

Railway Staff Harassing Woman: రైలు ప్రయాణాల్లో ప్రయాణికుల భద్రత, మర్యాద గురించి రైల్వే శాఖ ఎన్ని గొప్పలు చెప్పుకున్నా, క్షేత్రస్థాయిలో పరిస్థితి ఎంత దారుణంగా ఉందో చెప్పే ఒక హృదయవిదారక ఘటన వెలుగులోకి వచ్చింది.

పొట్టకూటి కోసం వ్యాపారం చేసుకునే ఒక నిస్సహాయ వృద్ధురాలిని రైల్వే సిబ్బంది వేధిస్తున్న వీడియో ఇప్పుడు వైరల్ అవుతోంది.

Railway Staff Harassing Woman: నిస్సహాయ స్థితిలో వృద్ధురాలు

రియా ఘోష్ అనే ఎక్స్ (X) యూజర్ పంచుకున్న ఈ వీడియోలో, సుమారు 75 ఏళ్ల వృద్ధురాలు రైలు కంపార్ట్‌మెంట్‌లో నేలపై కూర్చుని సిబ్బందికి చేతులు జోడించి వేడుకోవడం కనిపిస్తుంది. అయితే, సదరు సిబ్బంది ఆమె పట్ల ఏమాత్రం కరుణ లేకుండా అత్యంత దురుసుగా ప్రవర్తించారు. ఒక సిబ్బంది ఆమెను తోసివేయడమే కాకుండా, మరో సందర్భంలో ఆమె చీరను పట్టుకుని లాగుతూ అవమానించడం ఈ వీడియోలో స్పష్టంగా కనిపిస్తోంది.

మౌనంగా చూస్తున్న ప్రయాణికులు

ఈ ఘటనలో సిబ్బంది ప్రవర్తన ఎంత దారుణంగా ఉందో, చుట్టూ ఉన్న ప్రయాణికుల మౌనం అంతకంటే భయంకరంగా ఉంది. తన కళ్ళ ముందే ఒక వృద్ధురాలిని అంతలా వేధిస్తున్నా, ఏ ఒక్కరూ ఆమెను కాపాడేందుకు ముందుకు రాకపోవడం గమనార్హం. “ధైర్యం, కరుణపై భయం గెలిచినప్పుడు మానవత్వం చచ్చిపోతుంది” అంటూ రియా ఘోష్ చేసిన వ్యాఖ్యలు నెటిజన్ల మనసును కలచివేస్తున్నాయి.

స్పందించిన రైల్వే శాఖ

ఈ వీడియో వైరల్ కావడంతో నెటిజన్ల నుంచి పెద్ద ఎత్తున నిరసన వ్యక్తమవుతోంది. దోషులను వెంటనే సస్పెండ్ చేసి కఠినంగా శిక్షించాలని అందరూ డిమాండ్ చేస్తున్నారు. ఈ రచ్చ నేపథ్యంలో రైల్వే సేవ స్పందించింది. ఈ అమానుష ఘటనపై విచారణ జరుపుతున్నామని, బాధ్యులపై చర్యలు తీసుకుంటామని హామీ ఇచ్చింది. అయితే ఈ ఘటన ఏ రైలులో, ఏ ప్రాంతంలో జరిగిందనే వివరాలు ఇంకా అధికారికంగా వెల్లడి కావాల్సి ఉంది.