మెదక్ నియోజకవర్గంలోని ధాన్యం కొనుగోలు కేంద్రాల్లో రైతులు ఎదుర్కొంటున్న ఇబ్బందులపై ఎమ్మెల్యే డాక్టర్ మైనంపల్లి రోహిత్ రావు తీవ్రంగా స్పందించారు.

జిల్లా కలెక్టర్, అడిషనల్ కలెక్టర్ మరియు పౌరసరఫరాల శాఖ అధికారులతో సమీక్ష నిర్వహించిన ఆయన, ధాన్యం కొనుగోలు ప్రక్రియలో జాప్యాన్ని ఎట్టిపరిస్థితుల్లోనూ సహించేది లేదని ఘాటుగా ఆదేశించారు. రైతులు ఆరుగాలం కష్టపడి పండించిన ప్రతి గింజను ప్రభుత్వం కొనుగోలు చేస్తుందని, ఈ క్రమంలో రైతులకు ఎలాంటి ఇబ్బందులు కలగకుండా అధికారులు క్షేత్రస్థాయిలో అప్రమత్తంగా ఉండాలని ఆయన స్పష్టం చేశారు.

Read Also : కరీంనగర్ బంద్‌కు బీఆర్ఎస్ పిలుపు.. ఎమ్మెల్యే కౌశిక్ రెడ్డి ఇంటి వద్ద హైటెన్షన్!

ఎమ్మెల్యే కీలక ఆదేశాలు

ధాన్యం కొనుగోలు కేంద్రాలకు వచ్చిన పంటను ఎప్పటికప్పుడు తూకం వేసి, వెంటనే కొనుగోలు ప్రక్రియను పూర్తి చేయాలని ఎమ్మెల్యే ఆదేశించారు. ముఖ్యంగా ధాన్యం తరలింపులో ఎదురవుతున్న లారీల కొరతపై ఆయన ప్రత్యేక దృష్టి సారించారు. రవాణా సౌకర్యాలను మెరుగుపరిచి, కొనుగోలు చేసిన ధాన్యాన్ని వెనువెంటనే మిల్లులకు తరలించేలా చర్యలు తీసుకోవాలని రవాణా శాఖ అధికారులను ఆదేశించారు. అలాగే, మండుతున్న ఎండలను దృష్టిలో ఉంచుకుని కొనుగోలు కేంద్రాల వద్ద రైతులకు అవసరమైన తాగునీరు, నీడ వంటి కనీస వసతులను ఏర్పాటు చేయడంలో ఏమాత్రం నిర్లక్ష్యం వహించకూడదని ఆయన అధికారులకు సూచించారు.

విధి నిర్వహణలో నిర్లక్ష్యం వహిస్తే కఠిన చర్యలు

ప్రభుత్వం రైతు పక్షపాతిగా పని చేస్తోందని, అధికారులు కూడా అదే స్ఫూర్తితో పని చేయాలని ఎమ్మెల్యే రోహిత్ రావు కోరారు. కొనుగోలు ప్రక్రియలో రైతులను ఇబ్బందులకు గురిచేసినా, లేదా విధి నిర్వహణలో నిర్లక్ష్యం వహించి రైతులను కొనుగోలు కేంద్రాల వద్ద నిరీక్షించేలా చేసినా సంబంధిత అధికారులపై కఠిన చర్యలు తీసుకుంటామని ఆయన హెచ్చరించారు. క్షేత్రస్థాయిలో వివిధ విభాగాల అధికారులు సమన్వయంతో పని చేసి, మెదక్ నియోజకవర్గంలో ధాన్యం సేకరణ ప్రక్రియను ఎటువంటి ఆటంకాలు లేకుండా విజయవంతం చేయాలని ఆయన పిలుపునిచ్చారు. ఎమ్మెల్యే తీసుకున్న ఈ చొరవతో నియోజకవర్గ రైతాంగంలో హర్షాతిరేకాలు వ్యక్తమవుతున్నాయి.