రేపే దళపతి పట్టాభిషేకం.. వైరల్ అవుతున్నగవర్నర్ నోట్!

Vijay TVK CM: తమిళనాడు రాజకీయాల్లో సరికొత్త అధ్యాయం మొదలవబోతోంది. సినీ రంగంలో తిరుగులేని 'దళపతి'గా వెలుగొందిన విజయ్, ఇప్పుడు రాష్ట్ర ముఖ్యమంత్రిగా ప్రజా సేవలో తనదైన ముద్ర వేయడానికి సిద్ధమయ్యారు.

ఆయన నేతృత్వంలోని తమిళగ వెట్రి కళగం (TVK) ప్రభుత్వ ఏర్పాటుకు గవర్నర్ రాజేంద్ర విశ్వనాథ్ అర్లేకర్ అధికారికంగా ఆమోదం తెలపడంతో, విజయ్ పట్టాభిషేకానికి రంగం సిద్ధమైంది.

గవర్నర్ గ్రీన్ సిగ్నల్ – వైరల్ అవుతున్న నియామక పత్రం

శాసనసభలో 120 మంది ఎమ్మెల్యేల మద్దతును గవర్నర్‌కు సమర్పించి తన బలాన్ని నిరూపించుకున్నారు విజయ్. దీంతో రాజ్యాంగబద్ధంగా విజయ్‌ను ముఖ్యమంత్రిగా నియమిస్తూ గవర్నర్ జారీ చేసిన అధికారిక నియామక పత్రం (Appointment Note) ప్రస్తుతం సోషల్ మీడియాలో విపరీతంగా వైరల్ అవుతోంది. ఈ నోట్‌ను చూసిన అభిమానులు, నెటిజన్లు దళపతికి శుభాకాంక్షలు తెలుపుతూ నెట్టింట సందడి చేస్తున్నారు.

Vijay TVK CM: రేపు ‘విజయ్ అనే నేను’.. చారిత్రాత్మక క్షణం

చెన్నైలోని జవహర్‌లాల్ నెహ్రూ స్టేడియంలో ఆదివారం మధ్యాహ్నం 3 గంటలకు ఈ ప్రమాణ స్వీకార మహోత్సవం జరగనుంది. “విజయ్ అనే నేను..” అంటూ ఆయన ముఖ్యమంత్రిగా ప్రమాణం చేసే చారిత్రాత్మక క్షణం కోసం కోట్లాది మంది అభిమానులు, టీవీకే శ్రేణులు ఉత్కంఠగా ఎదురుచూస్తున్నారు. రాజకీయాల్లో సరికొత్త మార్పును కోరుకుంటున్న తమిళ ప్రజలకు విజయ్ పాలన ఎలాంటి భరోసా ఇస్తుందనేది ఆసక్తికరంగా మారింది.

రాజకీయ కూటమి మద్దతుతో పటిష్ట బలం

విజయ్ ప్రభుత్వానికి కాంగ్రెస్, లెఫ్ట్ పార్టీలు (సీపీఎం, సీపీఐ), వీసీకే మరియు ఐయూఎంఎల్ వంటి పార్టీలు తమ మద్దతును ప్రకటించాయి. ఈ పార్టీల ఎమ్మెల్యేల సహకారంతో విజయ్ బలం 120కి చేరడంతో, సుస్థిరమైన ప్రభుత్వాన్ని అందించే దిశగా ఆయన అడుగులు వేస్తున్నారు. ద్రవిడ దిగ్గజాలైన డీఎంకే, అన్నాడీఎంకేలకు ప్రత్యామ్నాయంగా విజయ్ పార్టీ ఎలా రాణించబోతుందో అని రాజకీయ విశ్లేషకులు విశ్లేషిస్తున్నారు