తెలంగాణ రాష్ట్ర రోడ్డు రవాణా సంస్థ (TGSRTC)ని ప్రభుత్వంలో విలీనం చేసే ప్రక్రియపై రాష్ట్ర ప్రభుత్వం కసరత్తును తీవ్రతరం చేసింది. ఆర్టీసీ కార్మికులు సుదీర్ఘ కాలంగా ఎదురుచూస్తున్న ప్రధాన డిమాండ్ ఇదే కావడంతో, ముఖ్యమంత్రి నేతృత్వంలోని యంత్రాంగం ఈ దిశగా చురుగ్గా అడుగులు వేస్తోంది.

రాబోయే రాష్ట్రావతరణ రోజైన జూన్ 2వ తేదీన ఈ విలీన ప్రక్రియపై అధికారికంగా కీలక ప్రకటన వెలువడే అవకాశం ఉందని సచివాలయ వర్గాల సమాచారం. స్వరాష్ట్ర వేడుకల వేళ కార్మికులకు ఇదొక పెద్ద కానుకగా మారబోతోంది.

Read Also : జనగణన ప్రక్రియలో అందరూ భాగస్వాములు కావాలి

ఇతర రాష్ట్రాల అధ్యయనం – ప్రభుత్వానికి నివేదిక

ఈ విలీన ప్రక్రియను చట్టపరంగా, పరిపాలనాపరంగా ఎలాంటి ఇబ్బందులు లేకుండా పూర్తి చేయడానికి ప్రభుత్వం గతంలోనే ఉన్నతాధికారుల కమిటీని నియమించింది. ఈ నేపథ్యంలో అధికారుల బృందం ఇప్పటికే ఆంధ్రప్రదేశ్ (AP) సహా పలు ఇతర రాష్ట్రాల్లో పర్యటించి, అక్కడ ఆర్టీసీని ప్రభుత్వంలో ఎలా విలీనం చేశారు, తలెత్తిన సవాళ్లు ఏమిటి అనే అంశాలపై క్షుణ్ణంగా అధ్యయనం చేసింది. పొరుగు రాష్ట్రాల విధానాలను పరిశీలించిన అనంతరం, తెలంగాణకు అనుకూలంగా ఉండేలా రూపొందించిన సమగ్ర నివేదికను అధికారులు ఇప్పటికే ప్రభుత్వానికి సమర్పించారు. ఈ నివేదిక ఆధారంగానే ప్రస్తుతం విలీన విధివిధానాల (Guidelines) రూపకల్పన జరుగుతోంది.

37 వేల మందికి పైగా లబ్ధి.. బడ్జెట్‌పై అదనపు భారం

ఈ చారిత్రాత్మక నిర్ణయం ద్వారా సంస్థలో పనిచేస్తున్న సుమారు 37,360 మంది ఆర్టీసీ కార్మికులు నేరుగా ప్రభుత్వ ఉద్యోగులుగా మారనున్నారు. దీనివల్ల వారి ఉద్యోగాలకు పూర్తి భద్రత లభించడంతో పాటు, ప్రభుత్వ ఉద్యోగులతో సమానంగా వేతనాలు, ఇతర సదుపాయాలు అందే అవకాశం ఉంటుంది. అయితే, ఈ విలీనం వల్ల ప్రభుత్వ ఖజానాపై భారీగా ఆర్థిక భారం పడనుంది. ఆర్టీసీ ఉద్యోగుల జీతభత్యాల రూపంలో ప్రభుత్వంపై ఏటా రూ. 1,000 కోట్లకు పైగా అదనపు ఆర్థిక భారం పడవచ్చని ఆర్థిక శాఖ ప్రాథమికంగా అంచనా వేసింది. భారం ఎక్కువైనా, కార్మికుల సంక్షేమానికి కట్టుబడి ప్రభుత్వం ఈ ముందడుగు వేస్తుండటం గమనార్హం.