సరికొత్త డిజిటల్ హంగులతో 'మహానాడు 2026' షురూ.. జెండా ఆవిష్కరించిన సీఎం చంద్రబాబు!

TDP Mahanadu: తెలుగుదేశం పార్టీ వార్షిక మహాసభ 'మహానాడు' ఈసారి అపూర్వమైన సాంకేతిక హంగులతో, సరికొత్త రాజకీయ సందేశాలతో అట్టహాసంగా ప్రారంభమైంది.

మంగళగిరిలోని పార్టీ కేంద్ర కార్యాలయంలో ముఖ్యమంత్రి, టీడీపీ అధినేత నారా చంద్రబాబు నాయుడు పార్టీ పతాకాన్ని ఆవిష్కరించి, వ్యవస్థాపకుడు స్వర్గీయ నారా తారక రామారావు (ఎన్టీఆర్) విగ్రహానికి పూలమాలలు వేసి ఘనంగా నివాళులర్పించారు. ఈ కార్యక్రమంలో పార్టీ జాతీయ ప్రధాన కార్యదర్శి నారా లోకేశ్‌తో పాటు రెండు రాష్ట్రాల కీలక నేతలు పాల్గొన్నారు. రాష్ట్రవ్యాప్తంగా ఉన్న 1,875 క్లస్టర్లను సరికొత్త డిజిటల్ నెట్‌వర్క్‌తో అనుసంధానించి, ఈసారి మహానాడును పూర్తి స్థాయి 'హైబ్రిడ్ మోడ్' (వర్చువల్ + ఫిజికల్) లో నిర్వహించడం దేశ రాజకీయాల్లోనే ప్రత్యేక ఆకర్షణగా నిలిచింది.

CM Chandrababu Naidu Launches Hybrid Mahanadu Dedicated to Women Welfare

ఈసారి 'మహిళా మహానాడు'.. సంక్షేమంపై చంద్రబాబు మార్క్

సభలో చంద్రబాబు నాయుడు మాట్లాడుతూ, టీడీపీని విజన్ రాజకీయాలకు నాంది పలికిన పార్టీగా అభివర్ణించారు. వర్చువల్ విధానంలో జరిగినప్పటికీ కార్యకర్తల ఉత్సాహం నభూతో నభవిష్యత్ అన్నట్లుగా ఉందన్నారు. గత 45 ఏళ్లుగా ప్రజా సమస్యల పరిష్కారం కోసం టీడీపీ నిరంతరం పోరాడుతోందని, సంక్షేమం, సుపరిపాలనతో తెలుగు ప్రజల గుండెల్లో శాశ్వత స్థానం సంపాదించుకుందని పేర్కొన్నారు. ముఖ్యంగా మహిళా సాధికారతకు అత్యంత ప్రాధాన్యత ఇస్తూ.. ఉచిత బస్సు ప్రయాణం, ఉచిత గ్యాస్ సిలిండర్లు, మహిళా వ్యాపారవేత్తలకు ప్రత్యేక ప్రోత్సాహకాలను తమ కూటమి ప్రభుత్వం అందిస్తోందని వెల్లడించారు. ఈ నేపథ్యంలోనే ఈ ఏడాది మహానాడును నారీశక్తికి అంకితం చేస్తూ "మహిళా మహానాడు"గా నిర్వహిస్తున్నట్లు సీఎం సంచలన ప్రకటన చేశారు.

TDP Mahanadu: యువతకు ఉద్యోగాలు.. 'స్పీడ్ ఆఫ్ డూయింగ్ బిజినెస్'

రాష్ట్ర ఆర్థిక, పారిశ్రామిక ప్రగతిపై చంద్రబాబు మాట్లాడుతూ.. యువత కోసం ఐటీ, క్వాంటం టెక్నాలజీ, సెమీకండక్టర్లు, ఏరోస్పేస్ వంటి అత్యాధునిక రంగాల్లో భారీ ఎత్తున ఉపాధి అవకాశాలు సృష్టిస్తున్నామని చెప్పారు. ఇప్పటికే రాష్ట్రానికి లక్షల కోట్ల పెట్టుబడులు తీసుకువచ్చామని, వాటి ద్వారా యువతకు పెద్ద ఎత్తున ఉద్యోగాలు లభిస్తాయన్నారు. "స్పీడ్ ఆఫ్ డూయింగ్ బిజినెస్" (Speed of Doing Business) విధానంతో పరిశ్రమలకు అత్యంత వేగంగా అనుమతులు ఇస్తున్నామని తెలిపారు. వీటితో పాటు విశాఖ రైల్వే జోన్ సాధన, వైజాగ్ స్టీల్ ప్లాంట్ పునరుద్ధరణ, సామాన్యులపై విద్యుత్ భారం తగ్గింపు వంటి ప్రజానుకూల నిర్ణయాలను ఈ వేదికపై ప్రస్తావించారు.

కార్యకర్తలకు రూ. 160 కోట్ల సంక్షేమం.. సీఎం లోకల్ అలర్ట్

"నాయకులను తయారు చేసే ఒక గొప్ప విశ్వవిద్యాలయం తెలుగుదేశం పార్టీ. ఇక్కడ శిక్షణ పొందిన నేతలే దేశవ్యాప్తంగా రాణిస్తున్నారు. సోషల్ రీ-ఇంజనీరింగ్ ద్వారా అందరికీ సమాన అవకాశాలు కల్పించడమే పార్టీ లక్ష్యం" అని చంద్రబాబు స్పష్టం చేశారు. పార్టీకి అసలైన బలం కార్యకర్తలేనని కొనియాడిన ఆయన.. వారి సంక్షేమం కోసం ఇప్పటివరకు రూ. 160 కోట్లు ఖర్చు చేశామని వెల్లడించారు. 'మై హెల్త్ యాప్' (My Health App) ద్వారా పార్టీ కుటుంబ సభ్యులైన కార్యకర్తలు, వారి కుటుంబాల ఆరోగ్య బాధ్యతను టీడీపీయే తీసుకుంటుందని భరోసా ఇచ్చారు. ఎథికల్ ఎకనామిక్ ఎంపవర్‌మెంట్‌తో పాటు కార్యకర్తల పిల్లల విద్య, ఉద్యోగ అవకాశాలకు పార్టీ అండగా ఉంటుందన్నారు. చివరగా, రాబోయే స్థానిక సంస్థల ఎన్నికలకు కేడర్ అంతా తక్షణమే సిద్ధం కావాలని పిలుపునిచ్చారు. ఏ ఎన్నికైనా మనకు 'గెలుపే' ఏకైక లక్ష్యం కావాలని, "హెల్తీ, వెల్తీ, హ్యాపీ ఏపీ" నిర్మాణంలో భాగస్వాములు కావాలని చంద్రబాబు దిశానిర్దేశం చేశారు.