షావోమి నుండి ఫ్లాగ్‌షిప్ మోడల్

Xiaomi : ప్రముఖ స్మార్ట్‌ఫోన్ బ్రాండ్ షావోమి (Xiaomi) భారత మార్కెట్లోకి సరికొత్త ఫ్లాగ్‌షిప్ మోడల్ 'షావోమి 17T' (Xiaomi 17T) ని అధికారికంగా విడుదల చేసింది.

ప్రపంచ ప్రఖ్యాత కెమెరా బ్రాండ్ ‘లైకా’ (Leica) భాగస్వామ్యంతో రూపొందిన ఈ మొబైల్ లాంచ్ విశేషాలు, దాని ధర వివరాలు ఇలా ఉన్నాయి.

షావోమి 17T స్మార్ట్‌ఫోన్ ప్రధానంగా ఫోటోగ్రఫీ ప్రియులను లక్ష్యంగా చేసుకుని సరికొత్త కెమెరా విప్లవానికి తెరలేపింది. ఈ సిరీస్‌లో మొదటిసారిగా లైకా ఆధారిత ట్రిపుల్ కెమెరా వ్యవస్థతో పాటు 50ఎంపి ప్రధాన కెమెరా, మరియు దూరపు వస్తువులను కూడా అత్యంత స్పష్టంగా బంధించేలా ‘లైకా 5x పెరిస్కోప్ టెలిఫోటో కెమెరా’ను అమర్చారు. కేవలం నిశ్చల చిత్రాలే కాకుండా, కదలికలను సహజంగా భద్రపరిచే ‘లైకా లైవ్ మూమెంట్’, సినిమాటిక్ డెప్త్ ఇచ్చే ‘లైకా లైవ్ పోర్ట్రెయిట్’ ఫీచర్లు ఇందులో ప్రత్యేక ఆకర్షణగా నిలిచాయి. ఇక డిస్‌ప్లే విషయానికి వస్తే.. 3500 నిట్స్ గరిష్ట బ్రైట్‌నెస్‌తో కూడిన 6.59-అంగుళాల 1.5K అమోలెడ్ (AMOLED) స్క్రీన్‌ను అందించారు. ఇది ఎండలో కూడా అద్భుతమైన దృశ్యమానతను ఇస్తుంది. అంతేకాకుండా, గంటల తరబడి ఫోన్ వాడేవారి కంటి రక్షణ కోసం TÜV రైన్‌ల్యాండ్ సర్టిఫికేషన్ పొందిన ‘షావోమి విజన్ కేర్’ ఇంటెలిజెంట్ సిస్టమ్‌ను ఇందులో చేర్చారు.

6500mAh మెగా బ్యాటరీ.. భారీ ఆఫర్లతో అందుబాటులోకి!

ఆధునిక వినియోగదారుల అవసరాలకు అనుగుణంగా షావోమి 17T లో ఏకంగా 6500mAh సామర్థ్యం గల భారీ సిలికాన్-కార్బన్ బ్యాటరీని అమర్చారు. దీనికి తోడు 67W హైపర్‌ఛార్జ్ సదుపాయం ఉండటం వల్ల ఫోన్ అత్యంత వేగంగా రీఛార్జ్ అవుతుంది. సాఫ్ట్‌వేర్ పరంగా ఈ ఫోన్ షావోమి HyperOS, గూగుల్ జెమిని ఏఐ (Google Gemini AI), మరియు సర్కిల్ టు సెర్చ్ వంటి ఫ్యూచరిస్టిక్ ఫీచర్లతో నడుస్తుంది. వైలెట్, బ్లూ, బ్లాక్ రంగులలో లభించే ఈ ఫోన్ 12GB+256GB వేరియంట్ ధర రూ. 59,999 కాగా, 12GB+512GB వేరియంట్ ధర రూ. 64,999 గా నిర్ణయించారు. ప్రారంభ ఆఫర్ కింద క్రెడిట్ కార్డ్ లావాదేవీలపై రూ. 5,000 తక్షణ బ్యాంక్ డిస్కౌంట్ లభిస్తుంది. అలాగే ఒక ఏడాది వరకు 60% అష్యూర్డ్ బైబ్యాక్ గ్యారెంటీతో పాటు గూగుల్ ఏఐ ప్రో, యూట్యూబ్ ప్రీమియం, జియో హాట్‌స్టార్ వంటి పలు ఉచిత డిజిటల్ సబ్‌స్క్రిప్షన్లను కంపెనీ ఆఫర్ చేస్తోంది. ఈ స్మార్ట్‌ఫోన్ అమ్మకాలు జూన్ 10, 2026 మధ్యాహ్నం 12 గంటల నుంచి అమెజాన్, ఎంఐ డాట్‌కామ్ మరియు రిటైల్ స్టోర్లలో ప్రారంభం కానున్నాయి.