పాలిటెక్నిక్ కళాశాలలు, ఐటీఐలు, వృత్తి విద్యా సంస్థలను యంగ్ ఇండియా స్కిల్స్ యూనివర్సిటీ (YISU) పరిధిలోకి తీసుకురావడాన్ని తీవ్రంగా వ్యతిరేకిస్తూ విద్యార్థులు తరగతులను పూర్తిగా బహిష్కరించి కళాశాల ప్రధాన ద్వారం ఎదుట బైఠాయించి నిరసన వ్యక్తం చేశారు.

అసలేమిటీ 'శక్తి' (SHAKTI) విధానం? విద్యార్థుల అభ్యంతరాలేమిటి?

రాష్ట్ర ప్రభుత్వం యువతలో పారిశ్రామిక నైపుణ్యాలను పెంచే లక్ష్యంతో SHAKTI (Skill-based Human Resources & Academic Knowledge Training Initiatives) విధానాన్ని రూపొందించింది. ఇందులో భాగంగా ప్రభుత్వ పాలిటెక్నిక్ కళాశాలలు, ఐటీఐలను నూతనంగా ఏర్పాటైన 'యంగ్ ఇండియా స్కిల్స్ యూనివర్సిటీ'తో అనుసంధానం చేయాలని ప్రభుత్వం నిర్ణయించింది.అయితే, ఈ విధానంపై పాలిటెక్నిక్ విద్యార్థులు, అధ్యాపకులు తీవ్ర అభ్యంతరాలు వ్యక్తం చేస్తున్నారు:

• డిప్లొమా ఉనికికి ముప్పు: దశాబ్దాలుగా ప్రత్యేక సాంకేతిక విద్యా గుర్తింపు ఉన్న పాలిటెక్నిక్ డిప్లొమా ఇంజనీరింగ్‌ను సాధారణ నైపుణ్య శిక్షణ కోర్సుల స్థాయికి కుదిస్తున్నారని విద్యార్థులు ఆందోళన చెందుతున్నారు.
• ఉన్నత విద్యా అవకాశాలు దెబ్బతినే ప్రమాదం: ఈ విలీనం వల్ల బీటెక్ ప్రవేశాల కోసం నిర్వహించే ECET (ఈసెట్) అర్హత, లేటరల్ ఎంట్రీ ప్రవేశాలు మరియు ఉన్నత విద్యా అవకాశాలకు గండిపడుతుందని భయపడుతున్నారు.
• కోర్సు నిర్మాణం, పరీక్షల్లో గందరగోళం: అకడమిక్ మేధావులు, విద్యార్థి సంఘాలతో సంప్రదింపులు జరపకుండా ఏకపక్షంగా కార్మిక, శిక్షణ విభాగాల పరిధిలోకి మార్చడం విద్యా ప్రమాణాలను దెబ్బతీస్తుందని పేర్కొంటున్నారు.

లెక్చరర్ల మద్దతు - "మా డిప్లొమా.. మా ఐడెంటిటీ" నినాదాలు

విద్యార్థులు చేపట్టిన ఈ ఆందోళనకు కళాశాల లెక్చరర్లు కూడా నల్లబ్యాడ్జీలు ధరించి మద్దతు పలికారు. "మా డిప్లొమా.. మా ఐడెంటిటీ.. మాకు న్యాయం కావాలి" అంటూ విద్యార్థులు ప్లకార్డులు ప్రదర్శిస్తూ నినాదాలు చేశారు. ప్రభుత్వం తీసుకువచ్చిన కొత్త విధానం వల్ల డిప్లొమా ఇంజనీరింగ్ కోర్సు ప్రమాణాలు పూర్తిగా నీరుగారిపోతాయని విద్యార్థులు ఆందోళన వ్యక్తం చేశారు. విద్యా నిపుణులు, మేధావులతో ఎలాంటి సంప్రదింపులు జరపకుండా ఏకపక్షంగా నిర్ణయాలు తీసుకోవడం వల్ల కోర్సుల నిర్మాణం, పరీక్షా విధానం, ఉన్నత విద్యార్హతలపై తీవ్ర ప్రతికూల ప్రభావం పడుతుందని ఆవేదన వ్యక్తం చేశారు.

Shakti Policy GO 97 protest : జాతీయ రహదారిపై ఉద్రిక్తత - డీఎస్పీ, సీఐల జోక్యం

మంగళవారం నాడు విద్యార్థులు సంగారెడ్డి-నాందేడ్-అకోలా 161 జాతీయ రహదారిపై బైఠాయించేందుకు యత్నించగా, జోగిపేట సీఐ అనిల్ కుమార్ అక్కడికి చేరుకుని అనుమతి లేదని స్పష్టం చేస్తూ వారిని నిలువరించారు. అనంతరం సంగారెడ్డి డీఎస్పీ సత్తయ్యగౌడ్ కళాశాలను సందర్శించి విద్యార్థులతో మాట్లాడారు. శాంతియుతంగా కళాశాల ఆవరణలోనే నిరసన తెలుపుకోవాలని, ప్రజలకు ఎలాంటి ఇబ్బందులు కలిగించవద్దని సూచించారు. అనంతరం విద్యార్థులు జిల్లా కలెక్టర్‌కు వినతిపత్రం అందజేసేందుకు సంగారెడ్డికి తరలివెళ్లారు.

భారీ పోలీసు బందోబస్తు - సమస్యను పరిష్కరించాలని డిమాండ్

మూడో రోజు కూడా తరగతులు జరగకపోవడంతో విద్యా కార్యకలాపాలు పూర్తిగా స్తంభించిపోయాయి. ఎలాంటి అవాంఛనీయ సంఘటనలు జరగకుండా కళాశాల పరిసర ప్రాంతాల్లో పోలీసులు భారీ బందోబస్తు ఏర్పాటు చేసి పరిస్థితిని సమీక్షిస్తున్నారు. తమ భవిష్యత్తుకు భరోసా కల్పించే వరకు ఆందోళన విరమించే ప్రసక్తే లేదని విద్యార్థులు స్పష్టం చేశారు. ప్రభుత్వం తక్షణమే జోక్యం చేసుకుని జీవో నంబర్ 97ను వెనక్కి తీసుకోవాలని విజ్ఞప్తి చేస్తున్నారు.

Epaper: epaper.vaartha.com

కోయిల్‌సాగర్ ప్రాజెక్ట్ నుంచి సాగునీరు విడుదల