Manu Bhaker vs Cricket Controversy: ఒలింపిక్ షూటర్ మను భాకర్‌కు ఎదురైన ఈ అనుభవం నిజంగానే మన క్రీడా సమాజం ఆలోచించాల్సిన విషయం. క్రికెట్ పట్ల మనకున్న విపరీతమైన ఆరాధన, ఇతర క్రీడల్లో దేశానికి కీర్తి తెచ్చిన అథ్లెట్ల కష్టాన్ని కొన్నిసార్లు ఎలా తక్కువ చేస్తోందో ఈ ఘటన నిరూపిస్తోంది.

Read Also: PBKS vs RR: పంజాబ్ కింగ్స్ మ్యాచ్‌కు వర్షం ముప్పు?

దేశం గర్వించదగ్గ షూటర్, డబుల్ ఒలింపిక్ పతక విజేత మను భాకర్‌కు ఎదురైన ఒక ప్రశ్న ఇప్పుడు దేశవ్యాప్తంగా చర్చకు దారితీసింది. ఎన్ఆర్ఏఐ (NRAI) వేడుకల్లో ఆమెను ఒక యువ క్రికెటర్ గురించి అభిప్రాయం అడగడం మన వ్యవస్థలోని ‘క్రికెట్ వ్యామోహం’ ఏ స్థాయిలో ఉందో స్పష్టం చేస్తోంది.

Manu Bhaker vs Cricket Controversy: అసలేం జరిగిందంటే?

నేషనల్ రైఫిల్ అసోసియేషన్ ఆఫ్ ఇండియా (NRAI) 75వ వార్షికోత్సవ వేడుకలకు ఒలింపిక్ పతక విజేత మను బాకర్ ముఖ్య అతిథిగా హాజరయ్యారు. ఒకే ఒలింపిక్స్‌లో రెండు పతకాలు సాధించిన ఘనత ఆమెది. అయితే అక్కడ ఆమెను షూటింగ్ గురించి కాకుండా 15 ఏళ్ల క్రికెట్ సంచలనం వైభవ్ సూర్యవంశీ గురించి ప్రశ్నలు అడిగారు మీడియా ప్రతినిధులు. దానికి ఆమె చాలా హుందాగా.."వయసు కేవలం అంకె మాత్రమే, సరైన గైడెన్స్ ఉంటే అతను పెద్ద స్టార్ అవుతాడు" అని సమాధానం చెప్పారు. కానీ ఒక ఒలింపిక్ విజేతను ఇలాంటి ప్రశ్న అడగడంపై క్రీడాభిమానులు మండిపడుతున్నారు.

Vaibhav Suryavanshi Question to Manu Bhaker

ఈ ఘటన కేవలం ఒక సోషల్ మీడియా వివాదం కాదు, మన క్రీడా సంస్కృతి ఆరోగ్యానికి పట్టిన ఎక్స్‌రే లాంటిది. మనం విజేతలను ప్రేమిస్తాం, కానీ వారు ప్రాతినిధ్యం వహించే క్రీడలను ప్రేమించడం ఇంకా నేర్చుకోలేదు. ఒలింపిక్స్ సమయంలో మాత్రమే ఇతర క్రీడలకు ప్రాధాన్యత ఇచ్చి, మిగతా సమయంలో వాటిని క్రికెట్ చట్రంలోకి నెట్టేయడం వల్ల ఆయా క్రీడల ఎదుగుదలకు ఆటంకం కలుగుతోంది. ఒక ఒలింపిక్ ఛాంపియన్‌ను క్రికెటర్‌పై అభిప్రాయం అడగడం అంటే, పరోక్షంగా ఆమె సాధించిన విజయాలకు తగినంత ప్రాధాన్యత లేదని చెప్పడమే అవుతుంది.