కేంద్ర ప్రభుత్వం ప్రతిష్టాత్మకంగా చేపట్టనున్న 'అడ్వాన్స్‌డ్ మీడియం కంబాట్ ఎయిర్‌క్రాఫ్ట్ (AMCA) టెస్టింగ్ కాంప్లెక్స్' ప్రాజెక్టు ఆంధ్రప్రదేశ్‌లోని పుట్టపర్తికి దక్కడం ఇప్పుడు పొరుగు రాష్ట్రమైన తమిళనాడులో తీవ్ర రాజకీయ సంచలనంగా మారింది.

భారతదేశ రక్షణ రంగానికి చెందిన ఈ భారీ ప్రాజెక్టును దక్కించుకోవడానికి గత డీఎంకే (DMK) ప్రభుత్వం మూడేళ్లుగా తీవ్ర ప్రయత్నాలు చేసింది. హోసూరు విమానాశ్రయం సమీపంలో దాదాపు 100 ఎకరాల భూమిని కూడా ఇందుకోసం కేటాయించి, కేంద్రంతో సంప్రదింపులు జరిపింది. అయితే, చివరి నిమిషంలో ఈ ప్రాజెక్టు తమిళనాడు చేతుల్లోంచి జారిపోయి ఏపీ వరించడంతో, అక్కడ ప్రతిపక్షాలతో పాటు జాతీయ మీడియాలోనూ దీనిపై పెద్ద ఎత్తున చర్చ నడుస్తోంది.

Read Also : ఇంటి అద్దె కోసం భార్య, కూతురిపై అత్యాచారానికి అనుమతించిన తండ్రి

చంద్రబాబు రాజకీయ చతురత & ఎన్డీఏ కూటమి ప్రభావం

పుట్టపర్తిలో రక్షణ రంగానికి సంబంధించి తమిళనాడులోని హోసూరు స్థాయిలో తక్షణ మౌలిక సదుపాయాలు లేనప్పటికీ, ఈ ప్రాజెక్టు ఏపీకి తరలిపోవడం వెనుక ముఖ్యమంత్రి నారా చంద్రబాబు నాయుడు రాజకీయ వ్యూహం మరియు చతురత ప్రధాన కారణమని జాతీయ మీడియా విశ్లేషిస్తోంది. ప్రస్తుతం కేంద్రంలోని అధికార ఎన్డీఏ (NDA) కూటమిలో చంద్రబాబు అత్యంత కీలక భాగస్వామిగా ఉన్నారు. కేంద్ర ప్రభుత్వంపై ఉన్న ఈ రాజకీయ పలుకుబడిని ఉపయోగించి, రక్షణ శాఖకు చెందిన ఈ మెగా ప్రాజెక్టును ఆయన ఆంధ్రప్రదేశ్‌కు తీసుకురాగలిగారని నిపుణులు పేర్కొంటున్నారు. ఏపీ ప్రయోజనాల కోసం చంద్రబాబు కేంద్రం వద్ద అనుసరించిన వ్యూహం ఇక్కడ స్పష్టంగా పని చేసిందని రాజకీయ వర్గాలు భావిస్తున్నాయి.

పుట్టపర్తి అభివృద్ధికి సరికొత్త ఊతం

ఈ అడ్వాన్స్‌డ్ ఎయిర్‌క్రాఫ్ట్ టెస్టింగ్ కాంప్లెక్స్ ఏర్పాటుతో శ్రీ సత్యసాయి జిల్లాలోని పుట్టపర్తి రూపురేఖలు మారిపోనున్నాయి. దేశీయంగా తయారయ్యే అత్యాధునిక యుద్ధ విమానాల పరిశోధనలు, పరీక్షలు ఇక్కడే జరగనున్నాయి. దీనివల్ల పుట్టపర్తి పరిసర ప్రాంతాల్లో రక్షణ రంగానికి అనుబంధంగా ఉండే ఎన్నో అనుబంధ పరిశ్రమలు, సాంకేతిక సంస్థలు కొలువుదీరే అవకాశం ఉంది. స్థానిక యువతకు పెద్ద ఎత్తున హై-టెక్ ఉద్యోగాలు లభించడంతో పాటు, రాయలసీమ ప్రాంతంలో పారిశ్రామిక, ఆర్థిక వృద్ధి సరికొత్త పుంతలు తొక్కనుంది. తమిళనాడు వంటి పారిశ్రామిక దిగ్గజ రాష్ట్రాన్ని వెనక్కినెట్టి ఏపీ ఈ ప్రాజెక్టును సాధించడం చంద్రబాబు ప్రభుత్వానికి దక్కిన పెద్ద విజయంగా విశ్లేషకులు అభివర్ణిస్తున్నారు.