Janasena : తెలంగాణ రాష్ట్ర ఆవిర్భావ దినోత్సవాన్ని పురస్కరించుకుని జూన్ 2వ తేదీన హైదరాబాద్ వేదికగా జనసేన పార్టీ భారీ బహిరంగ సభకు శ్రీకారం చుట్టింది.

‘తెలంగాణ నవ నిర్మాణ సంకల్ప సభ – జనసేన సాధక్ సమ్మేళనం’ పేరిట నిర్వహించనున్న ఈ సమావేశానికి జనసేన అధినేత పవన్ కల్యాణ్ ముఖ్య అతిథిగా హాజరుకానున్నారు. రాబోయే గ్రేటర్ హైదరాబాద్ (GHMC) ఎన్నికలతో పాటు భవిష్యత్తు మున్సిపల్, సార్వత్రిక ఎన్నికలను దృష్టిలో ఉంచుకుని తెలంగాణలో పార్టీని క్షేత్రస్థాయి నుంచి బలోపేతం చేయడంపై ఆయన శ్రేణులకు దిశానిర్దేశం చేయనున్నారు. ఆంధ్రప్రదేశ్‌లో సాధించిన భారీ విజయం ఇచ్చిన ఊపుతో, ఇప్పుడు తెలంగాణ రాజకీయాలపై కూడా పవన్ కల్యాణ్ ప్రత్యేక దృష్టి సారించడం రాజకీయ వర్గాల్లో హాట్ టాపిక్‌గా మారింది.

Read Also : పవన్ కళ్యాణ్ క్షమాపణ చెప్పాల్సిందే: పొన్నం ప్రభాకర్ సంచలన వ్యాఖ్యలు!

రేగుతున్న రాజకీయ దుమారం – కాంగ్రెస్, బీఆర్ఎస్ పార్టీల తీవ్ర అభ్యంతరం

పవన్ కల్యాణ్ హైదరాబాద్ వేదికగా ఈ సభను నిర్వహించ తలపెట్టడం తెలంగాణ రాజకీయాల్లో తీవ్ర ఉత్కంఠను, వివాదాన్ని రేకెత్తిస్తోంది. గతంలో తెలంగాణ ప్రాంతం మరియు ఇక్కడి నాయకులపై పవన్ కల్యాణ్ అనుచిత వ్యాఖ్యలు చేశారని, ఇప్పుడు ఏ మొహం పెట్టుకుని హైదరాబాద్‌లో సభ పెడుతున్నారంటూ అధికార కాంగ్రెస్ మరియు ప్రధాన ప్రతిపక్షం బీఆర్ఎస్ (గతంలో TRS) నేతలు మండిపడుతున్నారు. తెలంగాణ ఆవిర్భావ దినోత్సవం నాడే ఈ సభను నిర్వహించడం వెనుక రాజకీయ ప్రయోజనాలు ఉన్నాయంటూ వారు ఆరోపిస్తున్నారు. విపక్షాల నుంచి వ్యతిరేకత వ్యక్తమవుతున్న నేపథ్యంలో, జూన్ 2న జరగబోయే ఈ సమ్మేళనంలో పవన్ కల్యాణ్ ఎలాంటి వ్యాఖ్యలు చేయబోతున్నారు, తెలంగాణలో జనసేన వ్యూహం ఎలా ఉండబోతుందనే అంశంపై సర్వత్రా ఆసక్తి నెలకొంది.