Tharu tribe dowry ban : దేశవ్యాప్తంగా కట్న వేధింపుల కేసులు పెరుగుతున్న సమయంలో బీహార్ రాష్ట్రంలోని పశ్చిమ చంపారన్ జిల్లాలో నివసిస్తున్న థారు గిరిజన తెగ సమాజం ఒక ఆదర్శంగా నిలుస్తోంది.

బగాహా పోలీస్ జిల్లా పరిధిలోని గోబర్హియా పోలీస్ స్టేషన్‌కు చెందిన థారు గ్రామాల్లో గత పది సంవత్సరాలుగా ఒక్క కట్నం కేసు కూడా నమోదు కాలేదు. ఇది యాదృచ్ఛికం కాదు — వారి బలమైన సామాజిక నియమాలు, సంప్రదాయాల పట్ల గౌరవం కారణంగా సాధ్యమైంది.

థారు తెగలో పెళ్లిలో కట్నం తీసుకోవడం మహా పాపంగా భావిస్తారు. ఎవరైనా ఈ నియమాన్ని ఉల్లంఘించినట్లయితే సంప్రదాయ పెద్దల సమక్షంలో పంచాయతీ నిర్వహించి, తప్పు నిర్ధారణ అయితే జరిమానా నుంచి సామాజిక బహిష్కరణ వరకు కఠిన శిక్షలు విధిస్తారు. ఈ సామాజిక ఒత్తిడి చట్టపరమైన చర్యలకంటే వేగంగా పనిచేస్తుందని స్థానికులు చెబుతున్నారు.

ఈ ప్రాంతంలో సుమారు 20కి పైగా థారు గ్రామాలు ఉండగా, గత దశాబ్ద కాలంలో ఒక్క కట్న కేసు కూడా రాలేదని పోలీసులు ధ్రువీకరించారు. ఇక్కడ వివాహాన్ని పవిత్ర బంధంగా భావిస్తారు; వ్యాపార లావాదేవీగా చూడరు. పెళ్లి ఖరారైన తర్వాత శుభసూచకంగా రూ.5 లేదా రూ.11 మాత్రమే ఇస్తారు.

ఏటా వందలాది పెళ్లిళ్లు జరిగే ఈ సమాజంలో డాక్టర్లు, ఇంజనీర్లు, ప్రభుత్వ ఉద్యోగులు ఉన్నప్పటికీ, కట్నం అనే దురాచారానికి దూరంగా ఉంటున్నారు. చట్టాల కంటే సమాజ సంకల్పం బలంగా ఉంటే మార్పు సాధ్యమని థారు తెగ దేశానికి సందేశం ఇస్తోంది.