Vengalaraya Sagar Canal: బొబ్బిలి నియోజకవర్గ పరిధిలోని రైతాంగానికి సాగునీటి కష్టాలు తీర్చి, ప్రతి ఎకరాకూ నీరందించడమే లక్ష్యంగా కూటమి ప్రభుత్వం కార్యాచరణ ప్రారంభించింది.
బొబ్బిలి మండలం కోటిగెడ్డ నుంచి రామన్నదొరవలస మీదుగా గున్నతోటవలస దగ్గర ఉన్న కమలాపు చెరువు వరకు గల వెంగళరాయసాగర్ కాలువ (Vengalaraya Sagar Canal) పూడికతీత పనులను స్థానిక శాసనసభ్యులు ఆర్.వీ.ఎస్.కే.కే. రంగారావు (బేబీ నాయన) సోమవారం నాడు ఇరిగేషన్ శాఖ ఉన్నతాధికారులతో కలిసి క్షేత్రస్థాయిలో పరిశీలించారు.
కాలువలో దశాబ్దాలుగా పేరుకుపోయిన పూడికల వల్ల సాగునీరు చిట్టచివరి భూములకు అందక రైతులు పడుతున్న ఇబ్బందులను స్థానిక రైతాంగం ఎమ్మెల్యే బేబీ నాయన దృష్టికి తీసుకువెళ్లారు. దీనిపై తక్షణమే స్పందించిన ఆయన, రాష్ట్ర జలవనరుల శాఖ మంత్రి నిమ్మల రామానాయుడుతో ప్రత్యేకంగా మాట్లాడి, అత్యవసర నిధులను మంజూరు చేయించడంతో ఈ పనులు శరవేగంగా ప్రారంభమయ్యాయి.
Read also: Jnaneswari Missing : జ్ఞానేశ్వరి మిస్సింగ్కు నెల రోజులు: అయినా దొరకని ఆచూకీ
4-5 కిలోమీటర్ల అదనపు కాలువ తవ్వకం - చెక్ డ్యామ్ ద్వారా నీటి మళ్లింపు
ఈ సందర్భంగా ఎమ్మెల్యే బేబీ నాయన క్షేత్రస్థాయిలో సాగుతున్న పూడికతీత పనులను, జేసీబీ యంత్రాల పనితీరును పరిశీలించి అధికారులకు పలు సూచనలు చేశారు. అనంతరం ఆయన మీడియాతో మాట్లాడుతూ.. “ఎన్నో సంవత్సరాలుగా ఈ వెంగళరాయసాగర్ కాలువలో భారీగా పూడికలు పేరుకుపోయాయి. దీనివల్ల ప్రవహించే అరకొర నీటితోనే రైతులు ఎంతో కాలంగా ఇబ్బందులు పడుతూ పంటలు పండించుకుంటున్నారు. ఈ శాశ్వత సమస్య పరిష్కారానికి సరికొత్త ప్రణాళికను సిద్ధం చేశాం” అని తెలిపారు.
సాగునీటి ప్రణాళిక ముఖ్యాంశాలు:
- అదనపు కాలువ: కోటిగెడ్డ నుంచి రామన్నదొరవలస వరకు సుమారు 4 నుండి 5 కిలోమీటర్ల మేర అదనంగా సరికొత్త కాలువ తవ్వకం పనులు చేపట్టనున్నారు.
- చెక్ డ్యామ్ అనుసంధానం: బీసీ వెల్ఫేర్ హాస్టల్ వెనుక ఉన్న చెక్ డ్యామ్ దగ్గర నుండి గున్నతోటవలస సమీపంలోని కమలాపు చెరువుకు సాగునీరు సాఫీగా అందేలా పక్కా చర్యలు చేపడుతున్నారు.
Vengalaraya Sagar Canal: సీఎం, డిప్యూటీ సీఎం, ఇరిగేషన్ మంత్రికి కృతజ్ఞతలు
బొబ్బిలి ప్రాంత రైతుల అభ్యర్థనను సానుకూలంగా స్వీకరించి, అత్యంత వేగంగా నిధులు విడుదల చేసి పనులు ప్రారంభించేందుకు సహకరించిన రాష్ట్ర ముఖ్యమంత్రి నారా చంద్రబాబు నాయుడు, ఉప-ముఖ్యమంత్రి పవన్ కళ్యాణ్, మరియు జలవనరుల శాఖ మంత్రి డాక్టర్ నిమ్మల రామానాయుడులకు ఎమ్మెల్యే బేబీ నాయన నియోజకవర్గ రైతాంగం తరఫున ప్రత్యేక కృతజ్ఞతలు తెలియజేశారు. నియోజకవర్గంలో సాగునీటి మౌలిక వసతుల కల్పనలో ఎలాంటి రాజీ పడేది లేదని ఆయన స్పష్టం చేశారు.
ఈ క్షేత్రస్థాయి పరిశీలన కార్యక్రమంలో బొబ్బిలి మండలం తెలుగుదేశం పార్టీ (TDP) అధ్యక్షులు వాసిరెడ్డి సత్యనారాయణ, గున్నతోటవలస సర్పంచ్ సింగనపల్లి ఈశ్వరరావు, వివిధ గ్రామాల సర్పంచులు, ఇరిగేషన్ ఈఈ, డీఈ, ఏఈలు, కూటమి సీనియర్ నాయకులు మరియు పెద్ద సంఖ్యలో స్థానిక రైతులు పాల్గొన్నారు.
Epaper: epaper.vaartha.com