విజయ్ విజయంపై స్పందించిన తండ్రి చంద్రశేఖర్

Tamil Nadu Election results: తమిళనాడు అసెంబ్లీ ఎన్నికల ఫలితాల్లో తమిళగ వెట్రి కళగం (TVK) సృష్టిస్తున్న ప్రభంజనంపై విజయ్ తండ్రి, ప్రముఖ దర్శకుడు ఎస్.ఏ.

చంద్రశేఖర్ ఉద్వేగభరితంగా స్పందించారు. 107కు పైగా స్థానాల్లో టీవీకే ఆధిక్యం సాధిస్తూ విజయపథంలో దూసుకుపోతున్న తరుణంలో ఆయన మీడియాతో ముచ్చటించారు. “ఒక తండ్రిగా ఈరోజు నేను ఎంతో గర్వపడుతున్నాను. విజయ్ పట్టుదల, ప్రజల పట్ల అతనికున్న ప్రేమే ఈరోజు అతడిని ఈ స్థితిలో నిలబెట్టాయి” అని ఆయన కొనియాడారు.

Tamil Nadu Election results: ముందే చెప్పిన విజయ్

విజయ్ రాజకీయాల్లోకి రావడం వెనుక ఉన్న ఆత్మవిశ్వాసాన్ని చంద్రశేఖర్ ఈ సందర్భంగా గుర్తు చేసుకున్నారు. “నేను తమిళనాడు ముఖ్యమంత్రిని అవుతాను అని విజయ్ గతంలోనే నాతో చెప్పాడు. ఆ మాటను ఈరోజు నిజం చేసి చూపించాడు. గత రెండేళ్లుగా అతను పడుతున్న శ్రమను నేను దగ్గరుండి చూశాను. ఎన్నికల ప్రచారంలో అతను ఎక్కడా ఒక్క శాతం కూడా సందేహ పడలేదు. ఎవరితోనూ పొత్తులు లేకుండా, తన సొంత బలంతోనే బరిలోకి దిగి ఈ చారిత్రాత్మక విజయాన్ని అందుకున్నాడు” అని వివరించారు.

Chandrasekhar is excited about his son’s success.

ప్రతి ఇంట్లో సభ్యుడిగా..

విజయ్ కేవలం ఒక సినిమా స్టార్‌గా మాత్రమే కాకుండా, ప్రజల గుండెల్లో చోటు సంపాదించుకున్నాడని చంద్రశేఖర్ విశ్లేషించారు. “తమిళ ప్రజలు విజయ్‌ను తమ సొంత కొడుకుగా, అన్నగా భావిస్తారు. యువత అతడిని అన్న అని పిలుచుకుంటే.. వృద్ధులు తమ మనవడిగా చూసుకుంటారు. గత 30 ఏళ్లుగా సమాజానికి ఏదో ఒకటి చేయాలనే తపన విజయ్ మనసులో ఉంది. ఆ నిరంతర ఆలోచనే ఈరోజు అతడిని ముఖ్యమంత్రి పీఠానికి చేరువ చేసింది” అని ఆయన పేర్కొన్నారు.

సంబరాల్లో విజయ్ కుటుంబం

విజయ్ నివాసం వద్ద ప్రస్తుతం పండుగ వాతావరణం నెలకొంది. తన కుమారుడి విజయం ఖాయం కావడంతో చంద్రశేఖర్ మరియు కుటుంబ సభ్యులు ఆనందబాష్పాలు రాల్చారు. ఒకరినొకరు ఆలింగనం చేసుకుని శుభాకాంక్షలు తెలుపుకుంటున్న వీడియోలు ప్రస్తుతం సోషల్ మీడియాలో విపరీతంగా వైరల్ అవుతున్నాయి. అభిమానులు కూడా తమ ‘దళపతి’ తదుపరి ముఖ్యమంత్రి కాబోతున్నాడనే వార్తతో తమిళనాట రోడ్లపైకి వచ్చి సంబరాలు జరుపుకుంటున్నారు.