Korean Kanakaraju: ఆంధ్రప్రదేశ్ను దేశంలోనే అగ్రగామి సినిమా హబ్గా మార్చేందుకు ప్రభుత్వం ప్రత్యేక ప్రణాళికలతో అడుగులు వేస్తోందని రాష్ట్ర పర్యాటక, సాంస్కృతిక, సినిమాటోగ్రఫీ శాఖ మంత్రి కందుల దుర్గేశ్ స్పష్టం చేశారు.
విశాఖపట్నంలోని గురజాడ కళాక్షేత్రంలో జరిగిన 'కొరియన్ కనకరాజు' సినిమా విజయోత్సవ సభకు ఆయన ముఖ్య అతిథిగా విచ్చేసి చిత్ర యూనిట్ను అభినందించారు.
మెరుగైన మౌలిక వసతులు – నిర్మాతలకు ప్రభుత్వ ప్రోత్సాహం
రాష్ట్రంలో సినిమా రంగాన్ని అభివృద్ధి చేసేందుకు డబ్బింగ్ థియేటర్లు, రీ-రికార్డింగ్ స్టూడియోలు, అధునాతన షూటింగ్ లొకేషన్ల వంటి సదుపాయాలను వేగవంతంగా కల్పిస్తామని మంత్రి తెలిపారు. ఇండస్ట్రీలో పెట్టుబడులు పెట్టేందుకు ముందుకు వచ్చేవారికి భూ కేటాయింపులతో పాటు ప్రభుత్వం తరఫున పూర్తి స్థాయి సహకారం లభిస్తుందని ఆయన భరోసా ఇచ్చారు.
సీఎం చంద్రబాబు, డిప్యూటీ సీఎం పవన్ కల్యాణ్ మార్గదర్శకత్వంలో అభివృద్ధి
ముఖ్యమంత్రి నారా చంద్రబాబు నాయుడు ఆలోచనలు మరియు ఉప ముఖ్యమంత్రి పవన్ కల్యాణ్ సహకారంతో ఏపీని సినిమా నిర్మాణానికి ప్రధాన వేదికగా మారుస్తామని మంత్రి వివరించారు. ఈ ప్రాజెక్టుల ద్వారా స్థానిక కళాకారులు, సాంకేతిక నిపుణులు మరియు యువతకు భారీగా ఉపాధి అవకాశాలు లభిస్తాయని ఆయన ఆకాంక్షించారు.
Korean Kanakaraju: ‘కొరియన్ కనకరాజు’ చిత్ర బృందానికి ప్రత్యేక అభినందనలు
ఈ సందర్భంగా ‘కొరియన్ కనకరాజు’ సినిమా విజయంపై మంత్రి మాట్లాడుతూ.. హీరో వరుణ్ తేజ్ వైవిధ్యమైన నటనతో అలరించారని కొనియాడారు. కమెడియన్ సత్య, హీరోయిన్ రితికా నాయక్ నటనతో పాటు రాయలసీమ యాస, జీవనశైలిని అద్భుతంగా చూపించారన్నారు. బలమైన కథ, స్క్రీన్ప్లేతో తెరకెక్కించిన దర్శకుడు మేర్లపాక గాంధీ, నిర్మాతలు రాజీవ్ రెడ్డి, సాయిబాబు జాగర్లమూడిలను ఆయన ప్రత్యేకంగా ప్రశంసించారు.