ডিজিটেল ডেস্ক: সাম্প্ৰতিক সময়ত ক্ৰমান্বয়ে বৃদ্ধি পোৱা এবিধ অতি গুৰুতৰ ৰোগ হৈছে পাকস্থলীৰ কৰ্কট ৰোগ। ইয়াক গেষ্ট্ৰিক কৰ্কট বুলিও কোৱা হয়। ই এনে এক ৰোগ, যাৰ প্ৰাৰম্ভিক লক্ষণবোৰ চিনাক্ত কৰাটো সহজ নহয়। ফলত অধিকাংশই একেবাৰে শেষ পৰ্যায়তহে এই ৰোগত আক্ৰান্ত হোৱা বুলি জানিব পাৰি প্ৰাণ হেৰুৱায়।
পাকস্থলীৰ কৰ্কট ৰোগৰ লক্ষণবোৰ প্ৰাৰম্ভিক পৰ্যায়ত প্ৰায়ে অস্পষ্ট হয়, যাৰ বাবে ভুক্তভোগীয়ে এই বিষয়ে জ্ঞাত নহয়। কিন্তু লক্ষণ চিনি লৈ সময়মতে চিকিৎসা কৰিলে এই ৰোগৰ পৰা বাচি থাকিব পাৰি। পাকস্থলীৰ কৰ্কট ৰোগৰ লক্ষণবোৰ হৈছে-
ভোক নোহোৱা, ওজন হ্ৰাস
যদি কোনো কাৰণ নোহোৱাকৈ হঠাতে ভোক আৰু ওজন হ্ৰাস হয়, ই পাকস্থলীৰ কৰ্কট ৰোগৰ লক্ষণ হ'ব পাৰে।
এই ৰোগৰ ফলত খাদ্য গিলিবলৈ কঠিন হ'ব পাৰে, যাৰ ফলত ওজন হ্ৰাস হ'ব পাৰে। পাকস্থলীৰ কৰ্কট ৰোগৰ প্ৰাৰম্ভিক দিনবোৰত ৰোগীসকলে অতি ভোক অনুভৱ কৰে। মানুহে প্ৰায়ে এনে লক্ষণবোৰ স্বাভাৱিক বুলি ভাবি উপেক্ষা কৰে।
পেট ফুলা, গেছ, পেটৰ বিষ
এই ৰোগৰ ফলত গেছ বা পেট ফুলিব পাৰে। অৱশ্যে, এই লক্ষণটো সাধাৰণ গেষ্ট্ৰিকৰ সমস্যাতকৈ কিছু পৃথক। ই দীঘলীয়া সময়ৰ বাবে থাকে। সকলোয়েই পেটৰ বিষৰ সমস্যাক স্বাভাৱিক গেছ বা ঋতুস্ৰাৱৰ বিষ বুলি ভুল কৰে। কিন্তু এই বিষ বা গেছৰ সমস্যা পাকস্থলীৰ কৰ্কট ৰোগৰ অন্যতম লক্ষণ হ'ব পাৰে। সেয়েহে, দীঘলীয়া সময়ৰ বাবে পেটৰ বিষ বা ক্ৰেম্পৰ দৰে অনুভৱ কৰিলে বিশেষজ্ঞৰ পৰামৰ্শ গ্ৰহণ কৰিব।
ৰক্তক্ষৰণ
পেটত ৰক্তক্ষৰণ হ'লে বমিৰ ৰূপত হ'ব পাৰে বা শৌচৰ সৈতে হ'ব পাৰে। যদি এনে হয় ই কৰ্কট ৰোগৰ লক্ষণ। ইয়াক তৎক্ষণাৎ পৰীক্ষা কৰাটো আপোনাৰ বাবে অতি জৰুৰী।
ওকালি অহা, বমি হোৱা
যদি আপোনাৰ নিৰন্তৰ ওকালি আহে আৰু বমি হয়, ই পাকস্থলীৰ কৰ্কট ৰোগৰ লক্ষণ হ'ব পাৰে। এনে হলে ভুলতো উপেক্ষা নকৰি বিশেষজ্ঞৰ পৰামৰ্শ ল’ব।
সোৱাদৰ পৰিৱৰ্তন
পাকস্থলীৰ কৰ্কট ৰোগৰ ফলত সোৱাদৰ পৰিৱৰ্তনো হ'ব পাৰে। খাদ্য সামগ্ৰীৰ সোৱাদ স্বাভাৱিকতকৈ পৃথক হ'ব পাৰে বা খাদ্যাভ্যাস সলনি হ'ব পাৰে। এনে হ'লে ই এজন ব্যক্তিৰ মানসিক অৱস্থাতো প্ৰভাৱ পেলাব পাৰে।
এই লক্ষণবোৰ সহজভাৱে লোৱাৰ ফলত আৰু ইয়াক আন এটা সমস্যাৰ লক্ষণ বুলি বিবেচনা কৰাটো বিপদজনক হ'ব পাৰে। যদি এই লক্ষণসমূহৰ যিকোনো এটাও আপোনাৰ শৰীৰত দেখা যায়, আপুনি লগে লগে চিকিৎসকৰ সৈতে যোগাযোগ কৰিব।