ಅಮೆರಿಕದ ಪೂರ್ವ ಕರಾವಳಿಯಿಂದ ದೇಶದ ಮಧ್ಯ ಭಾಗದವರೆಗೆ ವ್ಯಾಪಕ ಪ್ರದೇಶದಲ್ಲಿ ಬಿಸಿಗಾಳಿ ತೀವ್ರಗೊಳ್ಳಲಿದೆ. 'ಹೀಟ್ ಡೋಮ್‌' ಪರಿಣಾಮದಿಂದ ಉಂಟಾಗಿರುವ ಈ ಬಿಸಿಗಾಳಿಯು ಗುರುವಾರದ ವೇಳೆಗೆ ಮಿಡ್‌ವೆಸ್ಟ್ ಹಾಗೂ ಮಿಸಿಸಿಪ್ಪಿ ಕಣಿವೆ ಪ್ರದೇಶದಲ್ಲಿ ತೀವ್ರವಾಗಲಿದ್ದು, ನಂತರ ಓಹಿಯೊ ಕಣಿವೆ ಮತ್ತು ಪೂರ್ವ ಕರಾವಳಿಯತ್ತ ವಿಸ್ತರಿಸಲಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ.

ಹಲವು ಪ್ರದೇಶಗಳಲ್ಲಿ 35ರಿಂದ 40.6 ಡಿಗ್ರಿ ಸೆಲ್ಸಿಯಸ್ ಉಷ್ಣಾಂಶ ದಾಖಲಾಗುವ ಸಾಧ್ಯತೆ ಇದೆ. ಹೆಚ್ಚಿನ ತೇವಾಂಶದಿಂದ ಜನರು ಅನುಭವಿಸುವ ಉಷ್ಣಾಂಶ (ಹೀಟ್ ಇಂಡೆಕ್ಸ್) 46 ಡಿಗ್ರಿ ಸೆಲ್ಸಿಯಸ್‌ವರೆಗೆ ತಲುಪಬಹುದು ಎಂದು ಮುನ್ಸೂಚನೆ ನೀಡಲಾಗಿದೆ.

ಗುರುವಾರ ಮತ್ತು ಶುಕ್ರವಾರ ಹಲವು ನಗರಗಳಲ್ಲಿ ದೈನಂದಿನ ತಾಪಮಾನ ದಾಖಲೆಗಳು ಮುರಿಯುವ ಸಾಧ್ಯತೆ ಇದ್ದು, ಕೆಲವು ಪ್ರದೇಶಗಳಲ್ಲಿ ಮಾಸಿಕ ಹಾಗೂ ಸಾರ್ವಕಾಲಿಕ ದಾಖಲೆಗಳೂ ನಿರ್ಮಾಣವಾಗುವ ನಿರೀಕ್ಷೆ ಇದೆ.

ತೀವ್ರ ಬಿಸಿಲಿನ ಹಿನ್ನೆಲೆಯಲ್ಲಿ ಸಾರ್ವಜನಿಕರು ಅನಗತ್ಯವಾಗಿ ಹೊರಗೆ ಹೋಗದಂತೆ, ಸಾಕಷ್ಟು ನೀರು ಕುಡಿಯುವಂತೆ ಹಾಗೂ ಹವಾನಿಯಂತ್ರಿತ ಅಥವಾ ತಂಪಾದ ಸ್ಥಳಗಳಲ್ಲಿ ಇರುವಂತೆ ಅಧಿಕಾರಿಗಳು ಸಲಹೆ ನೀಡಿದ್ದಾರೆ.

ನ್ಯೂಯಾರ್ಕ್ ನಗರದಲ್ಲಿ ಮೇಯರ್ ಝೋಹ್ರಾನ್ ಮಮ್ದಾನಿ ತುರ್ತು ಬಿಸಿಗಾಳಿ ಕಾರ್ಯಯೋಜನೆ ಜಾರಿಗೊಳಿಸಿದ್ದು, ಬುಧವಾರದಿಂದ ನೂರಾರು 'ಕೂಲಿಂಗ್ ಸೆಂಟರ್‌'ಗಳನ್ನು ತೆರೆಯಲಾಗುತ್ತಿದೆ.

ಮಿಚಿಗನ್ ರಾಜ್ಯದ ಡೆಟ್ರಾಯಿಟ್ ನಗರದಲ್ಲೂ ಸಾರ್ವಜನಿಕರಿಗಾಗಿ ಹವಾನಿಯಂತ್ರಿತ ಮನರಂಜನಾ ಕೇಂದ್ರಗಳನ್ನು ತೆರೆಯಲಾಗಿದೆ.

ವಿಶ್ವಕಪ್ ಪಂದ್ಯಗಳ ಮೇಲೂ ಪರಿಣಾಮ

ತೀವ್ರ ಬಿಸಿಲಿನ ಪರಿಣಾಮ ಫಿಫಾ ವಿಶ್ವಕಪ್ ಪಂದ್ಯಗಳ ಮೇಲೂ ಬೀಳುವ ಸಾಧ್ಯತೆ ಇದೆ. ಕೆಲವು ಪಂದ್ಯಗಳ ವೇಳೆ ಉಷ್ಣಾಂಶ ಆಟಗಾರರ ಸುರಕ್ಷತೆಯ ಮಿತಿಯನ್ನು ಮೀರಬಹುದು ಎಂದು ಜಾಗತಿಕ ಆಟಗಾರರ ಸಂಘ ಫಿಫ್‌ಪ್ರೊ ಎಚ್ಚರಿಕೆ ನೀಡಿದೆ.

ಫಿಲಡೆಲ್ಫಿಯಾದಲ್ಲಿ ನಡೆಯಲಿರುವ ವಿಶ್ವಕಪ್ ಅಭಿಮಾನಿಗಳ ಉತ್ಸವದ ಕೆಲವು ಕಾರ್ಯಕ್ರಮಗಳನ್ನು ತಂಪು ಟೆಂಟ್‌ಗಳಿಗೆ ಸ್ಥಳಾಂತರಿಸಲು ಅಧಿಕಾರಿಗಳು ನಿರ್ಧರಿಸಿದ್ದಾರೆ.

ಕೆನಡಾದಲ್ಲೂ ಬಿಸಿಗಾಳಿ

ಕೆನಡಾದ ಒಂಟಾರಿಯೊ ಪ್ರಾಂತ್ಯದಲ್ಲೂ ಉಷ್ಣಾಂಶ 37 ಡಿಗ್ರಿ ಸೆಲ್ಸಿಯಸ್ ತಲುಪುವ ನಿರೀಕ್ಷೆ ಇದೆ. ಈ ಹಿನ್ನೆಲೆಯಲ್ಲಿ ಎರಡನೇ ಹಂತದ 'ಆರೆಂಜ್ ಹೀಟ್ ವಾರ್ನಿಂಗ್ ಘೋಷಿಸಲಾಗಿದೆ.

ಟೊರಂಟೊ ಸೇರಿದಂತೆ ಹಲವು ನಗರಗಳಲ್ಲಿ 35 ಡಿಗ್ರಿ ಸೆಲ್ಸಿಯಸ್‌ಗೂ ಅಧಿಕ ಉಷ್ಣಾಂಶ ದಾಖಲಾಗುವ ಸಾಧ್ಯತೆ ಇದೆ. ಮಾಂಟ್ರಿಯಲ್ ಸೇರಿದಂತೆ ಪೂರ್ವ ಕೆನಡಾದ ಕೆಲವು ಪ್ರದೇಶಗಳಿಗೂ ಬಿಸಿಗಾಳಿಯ ಎಚ್ಚರಿಕೆ ನೀಡಲಾಗಿದೆ.

ಹವಾಮಾನ ತಜ್ಞರ ಪ್ರಕಾರ, ಹೀಟ್ ಡೋಮ್‌ ಹವಾಮಾನ ಬದಲಾವಣೆ ಹಾಗೂ ಹೆಚ್ಚುತ್ತಿರುವ ಜಾಗತಿಕ ತಾಪಮಾನದಿಂದ ಯುರೋಪ್, ಅಮೆರಿಕ ಮತ್ತು ಕೆನಡಾದಲ್ಲಿ ಬಿಸಿಗಾಳಿ ಹೆಚ್ಚುತ್ತಿದೆ.

ಆಧಾರ: ಬಿಬಿಸಿ, ರಾಯಿಟರ್ಸ್