ಪ್ರಮುಖ ಪ್ರಶ್ನೋತ್ತರ

ನೀಟ್ ಪರೀಕ್ಷೆಯು ಗ್ರಾಮೀಣ ವಿದ್ಯಾರ್ಥಿಗಳಿಗೆ ಹೇಗೆ ತೊಂದರೆ ಉಂಟುಮಾಡುತ್ತದೆ?

ನೀಟ್ ಪರೀಕ್ಷೆಯು ಸಿಬಿಎಸ್‌ಇ ಮತ್ತು ಎನ್‌ಸಿಇಆರ್‌ಟಿ ಪಠ್ಯಕ್ರಮವನ್ನು ಆಧರಿಸಿರುವುದರಿಂದ, ಸರ್ಕಾರಿ ಶಾಲೆ ಮತ್ತು ಸ್ಥಳೀಯ ಭಾಷೆಯಲ್ಲಿ ಓದಿದ ವಿದ್ಯಾರ್ಥಿಗಳಿಗೆ ಸ್ಪರ್ಧಿಸುವುದು ಕಷ್ಟಕರವಾಗಿದೆ.

ವೈದ್ಯಕೀಯ ಸೀಟುಗಳ ವಿಕೇಂದ್ರೀಕರಣದಿಂದ ಆಗುವ ಲಾಭವೇನು?

ತಾಲೂಕು ಮಟ್ಟದಲ್ಲಿ ಸೀಟುಗಳನ್ನು ವಿಕೇಂದ್ರೀಕರಿಸುವುದರಿಂದ ಸ್ಥಳೀಯ ವಿದ್ಯಾರ್ಥಿಗಳಿಗೆ ಹೆಚ್ಚು ಅವಕಾಶ ಸಿಗುತ್ತದೆ ಮತ್ತು ಅವರು ತಮ್ಮ ಭಾಗದ ಗ್ರಾಮೀಣ ಪ್ರದೇಶಗಳಲ್ಲಿ ಸೇವೆ ಸಲ್ಲಿಸುವ ಸಾಧ್ಯತೆ ಹೆಚ್ಚಿರುತ್ತದೆ.

ಸರ್ಕಾರವು ನೀಟ್‌ನಿಂದ ವಿನಾಯಿತಿ ಪಡೆಯಲು ಯಾವ ಕಾನೂನು ಹಾದಿ ಅನುಸರಿಸಬಹುದು?

ತಮಿಳುನಾಡು ಮಾದರಿಯಂತೆ, ರಾಜ್ಯ ವಿಧಾನಸಭೆಯಲ್ಲಿ ಮಸೂದೆಯನ್ನು ಅಂಗೀಕರಿಸಿ, ಸಂವಿಧಾನದ 254(2)ನೇ ಪರಿಚ್ಛೇದದ ಅಡಿಯಲ್ಲಿ ರಾಷ್ಟ್ರಪತಿಗಳ ಅನುಮತಿ ಪಡೆಯುವ ಮೂಲಕ ನೀಟ್‌ನಿಂದ ವಿನಾಯಿತಿ ಪಡೆಯಬಹುದು.

ವರ್ಚುವಲ್ ಪೂಲ್ ವ್ಯವಸ್ಥೆ ಎಂದರೇನು?

ಈ ವ್ಯವಸ್ಥೆಯಲ್ಲಿ ರಾಜ್ಯದ ಎಲ್ಲಾ ವೈದ್ಯಕೀಯ ಸೀಟುಗಳನ್ನು ಒಟ್ಟುಗೂಡಿಸಿ, ಪ್ರತಿ ಜಿಲ್ಲೆ ಮತ್ತು ತಾಲೂಕಿನ ಜನಸಂಖ್ಯೆಗೆ ಅನುಗುಣವಾಗಿ ಸಮಾನವಾಗಿ ಹಂಚಲಾಗುತ್ತದೆ, ಇದರಿಂದ ನಗರ-ಗ್ರಾಮೀಣ ಅಸಮಾನತೆ ಕಡಿಮೆಯಾಗುತ್ತದೆ.

ವೈದ್ಯಕೀಯ ಶಿಕ್ಷಣದಲ್ಲಿ ನಿಜವಾದ ಮೆರಿಟ್ ಯಾವುದು?

ಕೇವಲ ಒಂದೇ ಪ್ರವೇಶ ಪರೀಕ್ಷೆಯ ಅಂಕಗಳಿಗಿಂತ, ಎಲ್ಲರಿಗೂ ಸಮಾನ ಅವಕಾಶ ನೀಡಿ ತಮ್ಮ ಸಮುದಾಯಕ್ಕೆ ಸೇವೆ ಸಲ್ಲಿಸುವ ಅವಕಾಶ ಕಲ್ಪಿಸುವುದೇ ನಿಜವಾದ ಮೆರಿಟ್ ಎಂದು ಲೇಖನ ಪ್ರತಿಪಾದಿಸುತ್ತದೆ.

ಪ್ರಮುಖ ಅಂಕಿಅಂಶಗಳು

15,3952026ನೇ ಸಾಲಿನಲ್ಲಿ ಲಭ್ಯವಿರುವ ಎಂಬಿಬಿಎಸ್ ಸೀಟುಗಳುಶೇ 37ಖಾಲಿ ಇರುವ ಪ್ರಾಥಮಿಕ ಆರೋಗ್ಯ ಅಧಿಕಾರಿಗಳ ಹುದ್ದೆಗಳುಶೇ 67ಖಾಲಿ ಇರುವ ದಾದಿಯರ ಹುದ್ದೆಗಳು19ಬೆಂಗಳೂರಿನಲ್ಲಿರುವ ವೈದ್ಯಕೀಯ ಕಾಲೇಜುಗಳು

ಎಐ ಬಳಸಿ ಸಂಸ್ಕರಿಸಲಾಗಿದೆ. ಪಿವಿ ಡಿಜಿಟಲ್ ತಂಡ ಪರಿಶೀಲಿಸಿದೆ

ಕರ್ನಾಟಕದ ವೈದ್ಯಕೀಯ ಶಿಕ್ಷಣ ವ್ಯವಸ್ಥೆಯು ಒಂದು ಗಂಭೀರವಾದ ಸಮಸ್ಯೆಯನ್ನು ಎದುರಿಸುತ್ತಿದೆ. ರಾಜ್ಯವು ದೇಶದಲ್ಲೇ ಅತಿಹೆಚ್ಚು ಎಂಬಿಬಿಎಸ್ ಸೀಟುಗಳನ್ನು ಹೊಂದಿದ್ದರೂ (2026ರಲ್ಲಿ 75 ವೈದ್ಯಕೀಯ ಕಾಲೇಜುಗಳಲ್ಲಿ ಒಟ್ಟು 15,395 ಸೀಟುಗಳು ಲಭ್ಯವಿವೆ), ನಮ್ಮ ಗ್ರಾಮೀಣ ಪ್ರದೇಶಗಳು ವೈದ್ಯರ ತೀವ್ರ ಕೊರತೆಯಿಂದ ಬಳಲುತ್ತಿವೆ. ಪ್ರಾಥಮಿಕ ಆರೋಗ್ಯ ಕೇಂದ್ರಗಳಲ್ಲಿ 1,290 ಎಂಬಿಬಿಎಸ್ ವೈದ್ಯರ ಹುದ್ದೆಗಳು ಮತ್ತು 924 ತಜ್ಞ ವೈದ್ಯರ ಹುದ್ದೆಗಳು ಖಾಲಿ ಇವೆ. ಶೇ 37 ಪ್ರಾಥಮಿಕ ಆರೋಗ್ಯ ಅಧಿಕಾರಿಗಳು, ಶೇ 27 ವೈದ್ಯಾಧಿಕಾರಿಗಳು ಮತ್ತು ಶೇ 67 ಸಿಬ್ಬಂದಿ ದಾದಿಯರ ಹುದ್ದೆಗಳು ಖಾಲಿ ಇವೆ. ಈ ಕೊರತೆಯು ಗ್ರಾಮೀಣ ಮತ್ತು ದೂರದ ಪ್ರದೇಶಗಳಲ್ಲಿ ಆರೋಗ್ಯ ಸೇವೆಯ ಪ್ರವೇಶವನ್ನು ತೀವ್ರವಾಗಿ ಪರಿಣಾಮ ಬೀರಿದೆ.

ಸಮಸ್ಯೆಯ ಬೇರು: ಅತಿಕೇಂದ್ರೀಕೃತ ವ್ಯವಸ್ಥೆ

ಈ ಅಸಮತೋಲನದ ಮೂಲ ಕಾರಣವೆಂದರೆ ಅತಿಕೇಂದ್ರೀಕೃತ ವ್ಯವಸ್ಥೆ. ರಾಜ್ಯದ 75 ವೈದ್ಯಕೀಯ ಕಾಲೇಜುಗಳಲ್ಲಿ ಬೆಂಗಳೂರು ನಗರ ಜಿಲ್ಲೆಯಲ್ಲಿ, 19 ಕಾಲೇಜುಗಳು ಇವೆ. ಇದರಲ್ಲಿ 2 ಡೀಮ್ಡ್ ವಿಶ್ವವಿದ್ಯಾಲಯಗಳು, 3 ಸರ್ಕಾರಿ ಕಾಲೇಜುಗಳು ಮತ್ತು 14 ಖಾಸಗಿ ಕಾಲೇಜುಗಳು ಸೇರಿವೆ. ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ 8 ಕಾಲೇಜುಗಳು ಇವೆ. ಉಳಿದ 31 ಜಿಲ್ಲೆಗಳಲ್ಲಿ ಅತ್ಯಂತ ಕಡಿಮೆ ಸಂಖ್ಯೆಯ ವೈದ್ಯಕೀಯ ಕಾಲೇಜುಗಳಿವೆ. ಕೆಲವು ಜಿಲ್ಲೆಗಳಲ್ಲಿ ಯಾವುದೇ ವೈದ್ಯಕೀಯ ಕಾಲೇಜು ಇಲ್ಲ. ಇದರರ್ಥ, ಗ್ರಾಮೀಣ ತಾಲೂಕಿನ ವಿದ್ಯಾರ್ಥಿಯು ಬೆಂಗಳೂರು, ಮಂಗಳೂರು ಅಥವಾ ಮೈಸೂರಿನ ವಿದ್ಯಾರ್ಥಿಯೊಂದಿಗೆ ಅಸಮಾನವಾದ ಕ್ಷೇತ್ರದಲ್ಲಿ ಸ್ಪರ್ಧಿಸಬೇಕಾಗುತ್ತದೆ.

ನೀಟ್: ಗ್ರಾಮೀಣ ವಿದ್ಯಾರ್ಥಿಗಳಿಗೆ ಅಡಚಣೆ

ನೀಟ್ ಅನ್ನು ಏಕೀಕೃತ ರಾಷ್ಟ್ರೀಯ ಪ್ರವೇಶ ಪರೀಕ್ಷೆಯನ್ನಾಗಿ ಅಳವಡಿಸಿಕೊಳ್ಳುವುದು ಗುಣಮಟ್ಟವನ್ನು ಪ್ರಮಾಣೀಕರಿಸಲು ಮತ್ತು ಭ್ರಷ್ಟಾಚಾರವನ್ನು ನಿರ್ಮೂಲನೆ ಮಾಡಲು ಭರವಸೆ ನೀಡಿತ್ತು. ಆದರೆ ವಾಸ್ತವದಲ್ಲಿ, ಇದು ಸ್ಥಳೀಯ ವಿದ್ಯಾರ್ಥಿಗಳಿಗೆ ರಚನಾತ್ಮಕ ಅಡಚಣೆಯನ್ನು ಸೃಷ್ಟಿಸಿದೆ.

ನೀಟ್ ಪರೀಕ್ಷೆಯು ಎನ್‌ಸಿಇಆರ್‌ಟಿ ಪಠ್ಯಕ್ರಮವನ್ನು ಆಧರಿಸಿ ರೂಪುಗೊಂಡಿರುವುದರಿಂದ, ರಾಜ್ಯ ಶಿಕ್ಷಣ ಮಂಡಳಿಯ ಪಠ್ಯಕ್ರಮದಲ್ಲಿ ಓದಿದ ವಿದ್ಯಾರ್ಥಿಗಳು ಸ್ಪರ್ಧೆಯಲ್ಲಿ ಹಿನ್ನಡೆ ಅನುಭವಿಸುತ್ತಿದ್ದಾರೆ. ವಿಶೇಷವಾಗಿ ತಮಿಳು ಮಾಧ್ಯಮದ ವಿದ್ಯಾರ್ಥಿಗಳ ಮೇಲೆ ಇದರ ಪರಿಣಾಮ ಹೆಚ್ಚು ಗೋಚರಿಸಿದೆ. ನೀಟ್ ಜಾರಿಗೆ ಬರುವ ಮೊದಲು ವೈದ್ಯಕೀಯ ಪ್ರವೇಶದಲ್ಲಿ ಸುಮಾರು ಶೇ 20ರಷ್ಟಿದ್ದ ತಮಿಳು ಮಾಧ್ಯಮ ವಿದ್ಯಾರ್ಥಿಗಳ ಪ್ರಾತಿನಿಧ್ಯ, ನೀಟ್ ನಂತರ ಶೇ 2ಕ್ಕಿಂತಲೂ ಕಡಿಮೆಗೆ ಕುಸಿದಿದೆ. ಕರ್ನಾಟಕದಲ್ಲಿಯೂ ಇದೇ ಪರಿಸ್ಥಿತಿ ಇದೆ. ನೀಟ್ ಭಾರಿ ಪ್ರಮಾಣದಲ್ಲಿ ಸಿಬಿಎಸ್‌ಇ ಹಿನ್ನೆಲೆಯ, ನಗರದ ತರಬೇತಿ ಕೇಂದ್ರಗಳಿಗೆ ಹೋಗಬಲ್ಲ ವಿದ್ಯಾರ್ಥಿಗಳಿಗೆ ಅನುಕೂಲ ಮಾಡಿಕೊಡುತ್ತದೆ. ಇದು ಗ್ರಾಮೀಣ ಪ್ರದೇಶಗಳ ಕರ್ನಾಟಕ ರಾಜ್ಯ ಮಂಡಳಿ ಮತ್ತು ಕನ್ನಡ ಮಾಧ್ಯಮ ಶಾಲೆಗಳ ಪ್ರತಿಭಾವಂತ ವಿದ್ಯಾರ್ಥಿಗಳನ್ನು ಪರಿಣಾಮಕಾರಿಯಾಗಿ ಹೊರಗಿಡುತ್ತದೆ.

ಕರ್ನಾಟಕ ವಿಧಾನಸಭೆಯು ನೀಟ್ ಅನ್ನು ರದ್ದುಪಡಿಸಲು ಮತ್ತು ರಾಜ್ಯ ಪ್ರವೇಶ ಪರೀಕ್ಷೆಯನ್ನು (ಕೆಸೆಟ್) ಮರಳಿ ತರಲು ತೀರ್ಮಾನ ಮಾಡಿದೆ . ನೀಟ್, 'ಬಡ ಮತ್ತು ಗ್ರಾಮೀಣ ವಿದ್ಯಾರ್ಥಿಗಳ ವೈದ್ಯಕೀಯ ಶಿಕ್ಷಣದ ಅವಕಾಶಗಳನ್ನು ತೀವ್ರವಾಗಿ ಪರಿಣಾಮ ಬೀರುತ್ತದೆ, ಶಾಲಾ ಶಿಕ್ಷಣವನ್ನು ಅಪ್ರಸ್ತುತಗೊಳಿಸುತ್ತದೆ ಮತ್ತು ಸರ್ಕಾರಿ ವೈದ್ಯಕೀಯ ಕಾಲೇಜುಗಳಲ್ಲಿ ವಿದ್ಯಾರ್ಥಿಗಳನ್ನು ಸೇರಿಸಿಕೊಳ್ಳುವ ರಾಜ್ಯ ಸರ್ಕಾರಗಳ ಹಕ್ಕನ್ನು ಕಸಿದುಕೊಳ್ಳುತ್ತದೆ' ಎಂದು ತೀರ್ಮಾನವು ಹೇಳಿದೆ.

ಕಾನೂನು ಆಧಾರ: ಶಿಕ್ಷಣವು ಸಮವರ್ತಿ ಪಟ್ಟಿಯಲ್ಲಿದೆ

ಶಿಕ್ಷಣವು ಭಾರತೀಯ ಸಂವಿಧಾನದ ಸಮವರ್ತಿ ಪಟ್ಟಿಯಲ್ಲಿ ಬರುತ್ತದೆ. ಇದರರ್ಥ ರಾಜ್ಯಗಳು ತಮ್ಮ ಜನಸಂಖ್ಯೆಗೆ ಉನ್ನತ ಶಿಕ್ಷಣವು ಹೇಗೆ ಸೇವೆ ಸಲ್ಲಿಸಬೇಕು ಎಂಬುದನ್ನು ನಿರ್ಧರಿಸುವ ಹಂಚಿಕೆಯ ಹಕ್ಕನ್ನು ಹೊಂದಿವೆ. ತಮಿಳುನಾಡು ಪ್ರಯತ್ನಿಸಿದ ಶಾಸನಬದ್ಧ ಮಾದರಿಯನ್ನು ಕರ್ನಾಟಕವು ಅನುಸರಿಸಬೇಕು. ತಮಿಳುನಾಡು ನೀಟ್‌ನಿಂದ ವಿನಾಯಿತಿ ಪಡೆಯಲು ರಾಜ್ಯ ವಿಧಾನಸಭೆಯಲ್ಲಿ ಮಸೂದೆಯನ್ನು ಅಂಗೀಕರಿಸಿತು. ಆದರೆ ರಾಷ್ಟ್ರಪತಿಗಳು ಅದಕ್ಕೆ ಅನುಮತಿ ನೀಡಲಿಲ್ಲ, ಇದರಿಂದಾಗಿ ರಾಜ್ಯವು ಸುಪ್ರೀಂ ಕೋರ್ಟ್‌ಗೆ ಮೊರೆ ಹೋಯಿತು.

ಸಂವಿಧಾನದ 254(2) ಪರಿಚ್ಚೇದದ ಅಡಿಯಲ್ಲಿ ಮಸೂದೆಯು ಅನುಮತಿ ಪಡೆದುಕೊಂಡಿದೆ ಎಂದು ಪರಿಗಣಿಸಬೇಕೆಂದು ತಮಿಳುನಾಡು ಕೋರಿದೆ. ಈ ಪರಿಚ್ಚೇದದ ಪ್ರಕಾರ, ಸಮವರ್ತಿ ಪಟ್ಟಿಯ ವಿಷಯದಲ್ಲಿ ರಾಜ್ಯ ಕಾಯ್ದೆಯು ಕೇಂದ್ರ ಕಾಯ್ದೆಗೆ ವಿರುದ್ಧವಾಗಿದ್ದರೆ, ರಾಷ್ಟ್ರಪತಿಗಳ ಅನುಮತಿಯೊಂದಿಗೆ ಅದು ಆ ರಾಜ್ಯದಲ್ಲಿ ಜಾರಿಯಲ್ಲಿರುತ್ತದೆ. ಕರ್ನಾಟಕವು ಈ ಮಾರ್ಗವನ್ನು ಅನುಸರಿಸಬೇಕು. ನೀಟ್‌ ನಿಂದ ವಿನಾಯಿತಿ ಪಡೆಯಲು ರಾಜ್ಯ ವಿಧಾನಸಭೆಯಲ್ಲಿ ಮಸೂದೆಯನ್ನು ಅಂಗೀಕರಿಸಿ, ರಾಷ್ಟ್ರಪತಿಗಳ ಅನುಮತಿ ಪಡೆಯಬೇಕು.

ಸ್ಥಳೀಯ ವೈದ್ಯರು ಎನ್ನುವ ಪರಿಕಲ್ಪನೆ

ಸಾರ್ವಜನಿಕ ಆರೋಗ್ಯಕ್ಕೆ ಸಂಬಂಧಿಸಿದ ದತ್ತಾಂಶಗಳು ಒಂದು ಮಹತ್ವದ ಸಂಗತಿಯನ್ನು ನಿರಂತರವಾಗಿ ತೋರಿಸುತ್ತವೆ. ಗ್ರಾಮೀಣ ಪ್ರದೇಶಗಳಲ್ಲಿ ಜನಿಸಿ, ಬೆಳೆದು, ಶಿಕ್ಷಣ ಪಡೆದವರು ವೈದ್ಯರಾದ ಬಳಿಕ ಮತ್ತೆ ಅದೇ ಅಥವಾ ಇಂತಹ ಗ್ರಾಮೀಣ ಪ್ರದೇಶಗಳಲ್ಲಿ ಸೇವೆ ಸಲ್ಲಿಸುವ ಸಾಧ್ಯತೆ ಹೆಚ್ಚು. ಗ್ರಾಮೀಣ ಛತ್ತೀಸಗಢದಲ್ಲಿ ನಡೆದ ಅಧ್ಯಯನವೂ ಇದನ್ನೇ ದೃಢಪಡಿಸಿದೆ. ಗ್ರಾಮೀಣ ಜೀವನಶೈಲಿಯೊಂದಿಗೆ ಇರುವ ಆತ್ಮೀಯತೆ, ಸ್ಥಳೀಯ ಸಮುದಾಯದೊಂದಿಗಿನ ಬಾಂಧವ್ಯ ಹಾಗೂ ಸೇವೆಯನ್ನು ವೈಯಕ್ತಿಕ ಜವಾಬ್ದಾರಿ ಎಂದು ನೋಡುವ ಮನೋಭಾವ ಇಂತಹ ವೈದ್ಯರನ್ನು ಗ್ರಾಮೀಣ ಪ್ರದೇಶಗಳಲ್ಲೇ ಉಳಿಯುವಂತೆ ಮಾಡುತ್ತದೆ. ತಮಿಳುನಾಡಿನ ಅನುಭವವೂ ಇದೇ ಚಿತ್ರಣವನ್ನು ನೀಡುತ್ತದೆ. ಅಲ್ಲಿಯ ಸ್ಥಳೀಯ ಗ್ರಾಮೀಣ ವಿದ್ಯಾರ್ಥಿಗಳು ವೈದ್ಯರಾದಾಗ, ತಮ್ಮ ಊರುಗಳಲ್ಲಿನ ಪ್ರಾಥಮಿಕ ಆರೋಗ್ಯ ಕೇಂದ್ರಗಳು ಮತ್ತು ಸುತ್ತಮುತ್ತಲಿನ ಸಮುದಾಯಗಳಲ್ಲಿ ಸೇವೆ ಸಲ್ಲಿಸುವ ಸಾಧ್ಯತೆ ಗಮನಾರ್ಹವಾಗಿ ಹೆಚ್ಚಿರುತ್ತದೆ.

ತಾಲ್ಲೂಕು ಮಟ್ಟಕ್ಕೆ ವೈದ್ಯಕೀಯ ಸೀಟುಗಳನ್ನು ವಿಕೇಂದ್ರೀಕರಿಸುವ ಮೂಲಕ, ಕರ್ನಾಟಕವು ನೈಸರ್ಗಿಕವಾಗಿ 'ಸ್ಥಳೀಯ ವೈದ್ಯರ' ಪೀಳಿಗೆಯನ್ನು ಬೆಳೆಸುತ್ತದೆ. ಸಾರ್ವಜನಿಕ ಹೊಣೆಗಾರಿಕೆಯನ್ನು ಖಚಿತಪಡಿಸಿಕೊಳ್ಳಲು, ಈ ತಾಲ್ಲೂಕು ಕೋಟಾ ಸೀಟುಗಳನ್ನು ಪದವಿಯ ನಂತರ ಅವರ ಸ್ವಂತ ಜಿಲ್ಲೆಗಳಲ್ಲಿ ಕಡ್ಡಾಯವಾದ ಮೂರು ವರ್ಷಗಳ ಸಾರ್ವಜನಿಕ ಸೇವಾ ಬಾಂಡ್‌ಗೆ ಕಾನೂನುಬದ್ಧವಾಗಿ ಜೋಡಿಸಬೇಕು.

'ವರ್ಚುವಲ್ ಪೂಲ್' ವ್ಯವಸ್ಥೆ

ಈ ನಗರ ಪಕ್ಷಪಾತವನ್ನು ಸರಿಪಡಿಸಲು, ರಾಜ್ಯವು ವರ್ಚುವಲ್ ಪೂಲ್' ವ್ಯವಸ್ಥೆಯನ್ನು ಪರಿಚಯಿಸಬೇಕು. ಈ ಚೌಕಟ್ಟಿನ ಅಡಿಯಲ್ಲಿ, ರಾಜ್ಯದಾದ್ಯಂತ ವೈದ್ಯಕೀಯ ಸೀಟುಗಳನ್ನು ಒಟ್ಟುಗೂಡಿಸಿ ಪ್ರತಿ ಜಿಲ್ಲೆ ಮತ್ತು ತಾಲೂಕಿನ ಜನಸಂಖ್ಯೆಯ ಆಧಾರದ ಮೇಲೆ ಗಣಿತೀಯವಾಗಿ ವಿತರಿಸಲಾಗುತ್ತದೆ.

ಪ್ರಸ್ತುತ ವೈದ್ಯಕೀಯ ಪ್ರವೇಶ ವ್ಯವಸ್ಥೆಯಲ್ಲಿ ಸುಮಾರು ಶೇ 80ರಷ್ಟು ಸೀಟುಗಳು ನಗರ ಕೇಂದ್ರಗಳಲ್ಲಿ ಕೇಂದ್ರೀಕೃತವಾಗಿದ್ದು, ಗ್ರಾಮೀಣ ತಾಲೂಕುಗಳಿಗೆ ಕೇವಲ ಶೇ 20ರಷ್ಟು ಅವಕಾಶ ಮಾತ್ರ ಲಭ್ಯವಿದೆ. ಇದಕ್ಕೆ ಬದಲಾಗಿ, ಪ್ರತಿ ತಾಲೂಕಿಗೂ ನಿಗದಿತ ಸೀಟುಗಳನ್ನು ಮೀಸಲಿಟ್ಟು, ಸಮಾನ ವಿತರಣಾ ಮ್ಯಾಟ್ರಿಕ್ಸ್ ಮೂಲಕ ಎಲ್ಲ ಪ್ರದೇಶಗಳ ವಿದ್ಯಾರ್ಥಿಗಳಿಗೆ ಸಮಾನ ಅವಕಾಶ ಕಲ್ಪಿಸಬೇಕು.

ಆಯಾ ತಾಲ್ಲೂಕಿನೊಳಗೆ ತಮ್ಮ ಶಾಲಾ ಶಿಕ್ಷಣವನ್ನು (1ನೇ ತರಗತಿಯಿಂದ 10ನೇ ತರಗತಿಯವರೆಗೆ) ಪೂರ್ಣಗೊಳಿಸಿದ ವಿದ್ಯಾರ್ಥಿಗಳಿಗೆ ಮಾತ್ರ ಸೀಟುಗಳನ್ನು ಮೀಸಲಿಡಬೇಕು. ಗ್ರಾಮೀಣ ವಿದ್ಯಾರ್ಥಿಯು ತಮ್ಮ ಸ್ವಂತ ತಾಲ್ಲೂಕಿನ ಸಹಪಾಠಿಗಳ ವಿರುದ್ಧ ಮಾತ್ರ ಸ್ಪರ್ಧಿಸಬೇಕಾಗುತ್ತದೆ, ಇದು ಸಂಪೂರ್ಣವಾಗಿ ಸಮಾನ ಅವಕಾಶವನ್ನು ಒದಗಿಸುತ್ತದೆ.

ಅಡೆತಡೆಗಳು ಮತ್ತು ಪರಿಹಾರಗಳು

ವಾದ: ಈ ಮಾದರಿಯು ಕೇಂದ್ರ ಸರ್ಕಾರ ಮತ್ತು ಸುಪ್ರೀಂ ಕೋರ್ಟ್ನಿಂದ ಕಾನೂನು ಅಡೆತಡೆಗಳನ್ನು ಎದುರಿಸುತ್ತದೆ.

ಪರಿಹಾರ: ನೀತಿ ಬದಲಾವಣೆಗಳು ಯಾವಾಗಲೂ ಶಾಸನಬದ್ಧ ಧೈರ್ಯದಿಂದ ಪ್ರಾರಂಭವಾಗುತ್ತವೆ. ಕರ್ನಾಟಕವು ತಮಿಳುನಾಡಿನ ಮಾದರಿಯನ್ನು ಅನುಸರಿಸಿ ರಾಜ್ಯ ವಿಧಾನಸಭೆಯಲ್ಲಿ ಮಸೂದೆಯನ್ನು ಅಂಗೀಕರಿಸಬೇಕು. ನಂತರ ಸಂವಿಧಾನದ ಆರ್ಟಿಕಲ್ 254(2) ಅಡಿಯಲ್ಲಿ ರಾಷ್ಟ್ರಪತಿಗಳ ಅನುಮತಿಯನ್ನು ಪಡೆಯಬೇಕು. ಇದು ನೀಟ್‌ನಿಂದ ವಿನಾಯಿತಿ ಪಡೆಯಲು ಕಾನೂನುಬದ್ಧ ಮಾರ್ಗವಾಗಿದೆ.

ವಾದ: ಸೀಟುಗಳನ್ನು ಸಣ್ಣ ಭೌಗೋಳಿಕ ತುಣುಕುಗಳಾಗಿ ವಿಭಜಿಸುವುದು 'ಮೆರಿಟ್' ಅನ್ನು ದುರ್ಬಲಗೊಳಿಸುತ್ತದೆ.

ಪರಿಹಾರ: ನಿಜವಾದ ಮೆರಿಟ್ ಅನ್ನು ಕೇವಲ ಒಂದೇ ಪ್ರಮಾಣಿತ ಪ್ರವೇಶ ಪರೀಕ್ಷೆಯ ಅಂಕಗಳ ಮೂಲಕ ಅಳೆಯಲು ಸಾಧ್ಯವಿಲ್ಲ. ಪ್ರತಿಯೊಬ್ಬ ಮಗುವಿಗೂ - ಅದು ಬೆಂಗಳೂರಿನ ನಗರ ಪ್ರದೇಶದಲ್ಲಿರಲಿ ಅಥವಾ ಬೀದರ್‌ನಂತಹ ದೂರದ ಗ್ರಾಮದಲ್ಲಿರಲಿ - ವೈದ್ಯರಾಗುವ ಮತ್ತು ತಮ್ಮ ಸಮುದಾಯಕ್ಕೆ ಸೇವೆ ಸಲ್ಲಿಸುವ ಸಮಾನ ಅವಕಾಶ ದೊರೆಯುವುದೇ ನಿಜವಾದ ಮೆರಿಟ್. ಆದರೆ, ನೀಟ್ ವ್ಯವಸ್ಥೆಯು ದುಬಾರಿ ಖಾಸಗಿ ಕೋಚಿಂಗ್ ಪಡೆಯುವ ಆರ್ಥಿಕ ಸಾಮರ್ಥ್ಯ ಹೊಂದಿರುವ ವಿದ್ಯಾರ್ಥಿಗಳಿಗೆ ಹೆಚ್ಚಿನ ಅನುಕೂಲ ಕಲ್ಪಿಸುತ್ತದೆ. ಈ ಹಿನ್ನೆಲೆಯಲ್ಲಿ, ಇಂದಿನ ವ್ಯವಸ್ಥೆಯಲ್ಲಿ 'ಮೆರಿಟ್' ಎನ್ನುವುದು ಪ್ರತಿಭೆಗಿಂತ ಹೆಚ್ಚಾಗಿ ಆರ್ಥಿಕ ಸಾಮರ್ಥ್ಯವನ್ನು ಪ್ರತಿಬಿಂಬಿಸುವ ಮಾನದಂಡವಾಗಿ ಪರಿಣಮಿಸಿದೆ.

ಕರ್ನಾಟಕದಲ್ಲಿ ವಿಕೇಂದ್ರೀಕರಣದ ಯಶಸ್ಸು

ಕರ್ನಾಟಕವು ಈಗಾಗಲೇ ವೈದ್ಯಕೀಯ ಶಿಕ್ಷಣದ ವಿಕೇಂದ್ರೀಕರಣದಲ್ಲಿ ಪ್ರಗತಿ ಸಾಧಿಸಿದೆ. ರಾಜ್ಯವು ತಾಲೂಕು ಆಸ್ಪತ್ರೆಗಳಲ್ಲಿ ಡಿಎನ್‌ಬಿ (Diplomate of National Board) ತರಬೇತಿಯನ್ನು ವಿಸ್ತರಿಸಿದ ಮೊದಲ ರಾಜ್ಯವಾಗಿದೆ. ಈ ಸಾರ್ವಜನಿಕ-ಖಾಸಗಿ ಸಹಭಾಗಿತ್ವ ಮಾದರಿಯು ತಾಲೂಕು ಮತ್ತು ಜಿಲ್ಲಾ ಆಸ್ಪತ್ರೆಗಳಲ್ಲಿ ಸ್ನಾತಕೋತ್ತರ ವೈದ್ಯಕೀಯ ಶಿಕ್ಷಣವನ್ನು ತಂದಿದೆ. 36 Dಡಿಎನ್‌ಬಿ ತರಬೇತಿ ಕೇಂದ್ರಗಳು ರಾಜ್ಯದಾದ್ಯಂತ ಇವೆ. ಇದು ವಿಕೇಂದ್ರೀಕೃತ ವೈದ್ಯಕೀಯ ಶಿಕ್ಷಣವು ಸಾಧ್ಯ ಎಂದು ಸಾಬೀತುಪಡಿಸುತ್ತದೆ. ಈಗ ಇದೇ ಮಾದರಿಯನ್ನು ಎಂಬಿಬಿಎಸ್ ಸೀಟುಗಳಿಗೂ ಅನ್ವಯಿಸಬೇಕು.

ಆರೋಗ್ಯ ಸೇವೆ ಮೂಲತಃ ಸ್ಥಳೀಯ ಅಗತ್ಯಗಳನ್ನು ಆಧರಿಸಿರುತ್ತದೆ. ಆದ್ದರಿಂದ ವೈದ್ಯಕೀಯ ಶಿಕ್ಷಣವೂ ಸ್ಥಳೀಯ ಅಗತ್ಯಗಳಿಗೆ ಸ್ಪಂದಿಸುವಂತಿರಬೇಕು. ಇಂದು ಬೆಂಗಳೂರಿನಲ್ಲೇ 19 ವೈದ್ಯಕೀಯ ಕಾಲೇಜುಗಳಿದ್ದರೆ, ಕೆಲವು ಜಿಲ್ಲೆಗಳಲ್ಲಿ ಒಂದೇ ಒಂದು ವೈದ್ಯಕೀಯ ಕಾಲೇಜೂ ಇಲ್ಲ. ಇಂತಹ ಅಸಮಾನತೆಯ ನಡುವೆ, ಎನ್‌ಸಿಇಆರ್‌ಟಿ ಆಧಾರಿತ ಹಾಗೂ ನಗರ-ಕೇಂದ್ರಿತ ನೀಟ್ ವ್ಯವಸ್ಥೆಯು ಗ್ರಾಮೀಣ ಮತ್ತು ರಾಜ್ಯ ಶಿಕ್ಷಣ ಮಂಡಳಿಯ ವಿದ್ಯಾರ್ಥಿಗಳಿಗೆ ಇನ್ನಷ್ಟು ಹಿನ್ನಡೆಯನ್ನು ಉಂಟುಮಾಡುತ್ತಿದೆ. ಇದಕ್ಕೆ ಪರ್ಯಾಯವಾಗಿ, ತಾಲೂಕು ಮಟ್ಟದಲ್ಲಿ ವೈದ್ಯಕೀಯ ಸೀಟುಗಳನ್ನು ಸಮಾನವಾಗಿ ಹಂಚುವ ವ್ಯವಸ್ಥೆಯು ಗ್ರಾಮೀಣ ಪ್ರತಿಭೆಗಳಿಗೆ ನ್ಯಾಯಯುತ ಅವಕಾಶ ಕಲ್ಪಿಸಬಹುದು. ತಮಿಳುನಾಡು ಈ ದಿಕ್ಕಿನಲ್ಲಿ ಈಗಾಗಲೇ ಚರ್ಚೆ ಮತ್ತು ಹೋರಾಟವನ್ನು ಆರಂಭಿಸಿದೆ. ಕರ್ನಾಟಕವೂ ವೈದ್ಯಕೀಯ ಶಿಕ್ಷಣದಲ್ಲಿ ಸಮಾನತೆ ಮತ್ತು ಪ್ರಾದೇಶಿಕ ನ್ಯಾಯವನ್ನು ಸಾಧಿಸುವ ನಿಟ್ಟಿನಲ್ಲಿ ಧೈರ್ಯದ ಹೆಜ್ಜೆ ಇಡಬೇಕಾದ ಸಮಯ ಬಂದಿದೆ.

ಕರ್ನಾಟಕವು ತನ್ನ ವೈದ್ಯಕೀಯ ಶಿಕ್ಷಣ ನೀತಿಯನ್ನು ಮರುಪರಿಶೀಲಿಸಿ, ಸೀಟುಗಳ ಹಂಚಿಕೆಯಲ್ಲಿ ಸಮಾನ ಅವಕಾಶಕ್ಕೆ ಆದ್ಯತೆ ನೀಡಬೇಕು. "ನಮ್ಮ ಜಿಲ್ಲೆ, ನಮ್ಮ ವೈದ್ಯರು" ಎಂಬುದು ಕೇವಲ ಘೋಷಣೆಯಲ್ಲ; ರಾಜ್ಯದ ಆರೋಗ್ಯ ವ್ಯವಸ್ಥೆಯನ್ನು ಬಲಪಡಿಸುವ ದೂರದೃಷ್ಟಿಯ ಪರಿಕಲ್ಪನೆಯಾಗಬೇಕು.