ഫുട്‌ബോളിന്റെ വേദപുസ്തകമായിരുന്നു ലയണല്‍ മെസി. സ്വർഗകവാടത്തില്‍ നിന്ന് പുറത്താക്കപ്പെട്ടവന്റെ പഴയ നിയമവും ഉത്ഥാനത്താൻ രക്ഷണകൃത്യം പൂർത്തിയാക്കിയ ക്രിസ്തുദേവന്റെ പുതിയ നിയമവും മെസിയിലുണ്ട്. 2014 ലെ ലോകകപ്പ് തോല്‍വി, കോപ്പ അമേരിക്കയിലെ തുടർ തോല്‍വികള്‍..! രാജ്യാന്തര കരിയറില്‍ കിരീടമില്ലാത്തവനെന്ന് മുദ്രകുത്തപ്പെട്ട് അർജന്റീന ആരാധകരടക്കം എഴുതിത്തള്ളിയവൻ...! രാജ്യാന്തര കരിയറിന് വിരാമമിടുന്നത് സകല കിരീടങ്ങളിലും മുത്തമിട്ട് പരിപൂർണനാക്കപ്പെട്ട്...!

2005 ഓഗസ്റ്റ് 17 നാണ് അർജന്റീനയ്ക്കായി മെസി രാജ്യാന്തര അരങ്ങേറ്റം കുറിക്കുന്നത്. നീണ്ട 21 വർഷത്തിനിടെ വേദനയുടെ കയ്പ്പുനീരും സ്വപ്‌നസാഫല്യത്തിന്റെ മേല്‍ത്തരം വീഞ്ഞും അയാള്‍ നുകർന്നു. 207 രാജ്യാന്തര മത്സരങ്ങളില്‍ നിന്ന് 125 ഗോളുകളും 60 അസിസ്റ്റുകളും. 2006 മുതല്‍ 2026 വരെ ആറ് ലോകകപ്പുകള്‍. 21 ഗോളുകളുമായി ലോകകപ്പ് ഗോള്‍വേട്ടയില്‍ രണ്ടാമൻ. ലോകകപ്പ് വേദിയില്‍ 34 മത്സരങ്ങളില്‍ കളിച്ചു, 23 ലും ജയം. ലോകകപ്പില്‍ ഏറ്റവും കൂടുതല്‍ അസിസ്റ്റുകളുള്ള താരം. പെനാല്‍റ്റി ഏരിയയ്ക്ക് പുറത്ത് നിന്ന് ലോകകപ്പില്‍ മാത്രം നേടിയത് ആറ് ഗോളുകള്‍. കളിച്ച ആറ് ലോകകപ്പുകളില്‍ മൂന്നിലും ഫൈനല്‍, അതില്‍ ഒരു കിരീടം. 2014 ലും 2022 ലും ലോകകപ്പിന്റെ താരം, രാജ്യാന്തര കരിയറിലെ പ്രകടനം കൂടി കണക്കിലെടുത്ത് എട്ട് ബലൻ ദ് ഓർ പുരസ്‌കാരങ്ങള്‍...! റെക്കോർഡ് പുസ്തകങ്ങളിലും മെസി കരകവിഞ്ഞൊഴുകി...!

2022 ഡിസംബർ 18 ന് ഖത്തറില്‍ കാല്‍പ്പന്ത് പോലെ ഉരുണ്ട് കിടക്കുന്ന ഈ ലോകത്തെ സാക്ഷിയാക്കി ലയണല്‍ ആന്ദ്രേ മെസിയും സ്വർഗത്തിലേക്ക് ആരോഹണം ചെയ്യപ്പെട്ടു, ലോക ഫുട്‌ബോളിലെ ഏറ്റവും സുന്ദരമായ കാഴ്ച. ഖത്തറില്‍ അയാള്‍ പരിപൂർണനാക്കപ്പെട്ടു. സ്വപ്ന സമാനമായ കരിയറില്‍ ഇനിയൊന്നും നേടിയെടുക്കാനില്ലെന്ന് ലോകത്തോട് വിളിച്ചു പറഞ്ഞു. അവഹേളനങ്ങളേയും പരിഹാസങ്ങളേയും അതിജീവിച്ചവൻ, കിരീട നഷ്ടങ്ങള്‍ക്ക് മുന്നില്‍ ഒരു കൊച്ചു കുഞ്ഞിനെ പോലെ വിങ്ങി പൊട്ടിയവൻ, മാറക്കാനയില്‍ കോപ്പയില്‍ മുത്തമിട്ട് ഉയിർപ്പിക്കപ്പെട്ടവൻ, ഒടുവില്‍ ഖത്തറില്‍ പരിപൂർണനാക്കപ്പെട്ട കാഴ്ചയോളം സുന്ദരമായ മറ്റൊന്നില്ല ഈ കാല്‍പ്പന്ത് ലോകത്ത്...