त्यांना पाच दिवसांची न्यायालयीन कोठडी देण्यात आली आहे.

मंगळवारी पहाटे बॅरिकेड्स ओलांडून परिसरात प्रवेश केल्याच्या आरोपावरून या तिघांना ताब्यात घेण्यात आले होते. अलीकडेच जंतरमंतरचा अधिकृत आंदोलनस्थळ म्हणून असलेला दर्जा रद्द करण्यात आला आहे. मुख्य निवडणूक आयुक्त ज्ञानेश कुमार यांच्या राजीनाम्याची मागणी करणाऱ्या घोषणा या तिघांनी दिल्याचे सांगण्यात येत आहे. मतदारयाद्यांच्या विशेष सखोल पुनरीक्षणाच्या (SIR) प्रक्रियेत कथित अनियमितता झाल्याच्या आरोपावरून CJP ने सुरू केलेले आंदोलन त्यांनी पुढे सुरू ठेवले.

भारताच्या डिजिटल पेमेंट व्यवस्थेत दिसेल समावेशक तंत्रज्ञानाची ताकद

दुग्धालयात राहुल गांधींना हवाय खिमा पाव…

आंदोलनजीवींना घेरी येईल हे आकडे पाहून…

दिवाळीनंतर युपीआय व्यवहारांवर शुल्क

सूत्रांनी दिलेल्या माहितीनुसार, या तिघांविरोधात अतिक्रमण करून प्रवेश करणे, प्रतिबंधात्मक आदेशांचे उल्लंघन करणे, शांतता राखण्याच्या हमीपत्राचा भंग करणे आणि सरकारी कर्मचाऱ्याला त्याची अधिकृत कर्तव्ये पार पाडण्यापासून रोखणे यांसह विविध आरोपांखाली गुन्हा दाखल करण्यात आला आहे. बुधवारी सकाळी त्यांना कार्यकारी दंडाधिकाऱ्यांच्या विशेष न्यायालयासमोर (SEM) हजर केले जाण्याची शक्यता आहे.

दरम्यान, CJP चा सहसंस्थापक अभिजीत दिपकेने 'एक्स'वर (X) एक छायाचित्र पोस्ट केले. या छायाचित्रात CJP चे नेते अजिंक्य शिंदे, आशुतोष रंका आणि सौरव दास संसद मार्ग पोलीस ठाण्याच्या आत दिसत आहेत. ताब्यात घेतल्यानंतरही त्यांचे मनोबल खचलेले नसल्याचे दिपकेने आपल्या पोस्टमध्ये म्हटले.

अधिकाऱ्यांनी दिलेल्या माहितीनुसार, शनिवारी दिल्लीतील एका आंदोलनादरम्यान ताब्यात घेतल्यानंतर दास यांनी एका वर्षापर्यंत शांतता राखण्याचे हमीपत्र स्वाक्षरी करून दिले होते. मात्र, CJP च्या कायदेशीर पथकाच्या प्रमुख रत्ना सिंह यांनी या तिघांना अटक करण्यात आली असून त्यांना संसद मार्ग पोलीस ठाण्यात ठेवण्यात आल्याचा दावा केला.

'एक्स'वरील पोस्टमध्ये सिंह यांनी आरोप केला की, या तिघांना पहाटे तीन वाजता खासगी व्हॅनमधून पोलीस ठाण्यात आणण्यात आले. तसेच, रात्री उशिरापर्यंत त्यांना त्यांच्या वकिलांना भेटण्याची परवानगी देण्यात आली नाही.

२४ तासांची मुदत संपण्याच्या जवळ आली असून, कार्यकारी दंडाधिकाऱ्यांच्या विशेष न्यायालयासमोर हजर केल्यानंतर या तिघांना तिहार तुरुंगात न्यायालयीन कोठडीत पाठवले जाऊ शकते, असेही त्यांनी म्हटले.

जंतरमंतरचा दर्जा रद्द

मतदारयाद्यांच्या विशेष सखोल पुनरीक्षणाच्या (SIR) प्रक्रियेत कथित अनियमितता झाल्याच्या आरोपावरून CJP आणि अन्य संघटनांनी केलेल्या आंदोलनांमुळे राजधानी दिल्लीमध्ये सुरक्षा व्यवस्था अधिक कडक करण्यात आली आहे. त्याच पार्श्वभूमीवर दिल्लीतील जंतरमंतरचा अधिकृत आंदोलनस्थळ म्हणून असलेला दर्जा रद्द करण्यात आला आहे.

११ ऑक्टोबर रोजी दिल्लीचे पोलीस आयुक्त अनुराग कुमार यांनी एक आदेश जारी करून रामलीला मैदान, बुराडी मैदान आणि सीबीडी मैदान ही ठिकाणे आंदोलन व निदर्शनांसाठी निश्चित केली.

या आदेशामुळे अधिकृत आंदोलनस्थळांच्या यादीतून जंतरमंतरला वगळण्यात आले आहे.