अल्पसंख्याकांच्या सुरक्षेबाबत चिंता
बांगलादेशातील अल्पसंख्याकांच्या सुरक्षेबाबत आणखी एक चिंताजनक घटना समोर आली आहे. मयमनसिंह जिल्ह्यातील बेगुनबारी परिसरात एका हिंदू व्यक्तीचा मृतदेह ड्रममध्ये तरंगताना आढळून आला.
स्थानिक माध्यमांच्या माहितीनुसार, स्लुइस गेटजवळ हा मृतदेह आढळला. मृत व्यक्तीची ओळख ५० वर्षीय निरंजन चंद्र सूत्रधार अशी झाली आहे. ते मयमनसिंह येथील अठारबारी बिल्डिंग परिसरात भागीदारीत दागिन्यांचे दुकान चालवत होते.
बांगलादेशातील प्रमुख बंगाली दैनिक 'द डेली इत्तेफाक'च्या वृत्तानुसार, निरंजन यांची हत्या कोणी केली आणि त्यामागील नेमका हेतू काय होता, हे अद्याप स्पष्ट झालेले नाही. शुक्रवारपर्यंत या प्रकरणात कोणालाही अटक करण्यात आलेली नव्हती. कोतवाली मॉडेल पोलीस ठाण्याचे अधिकारी मुहम्मद शिबिरुल इस्लाम यांनी सांगितले की, मृत व्यक्तीच्या डोक्यावर आणि छातीवर धारदार शस्त्राने वार केल्याच्या खुणा आढळल्या आहेत. पोलिसांच्या प्राथमिक अंदाजानुसार, निरंजन यांची हत्या केल्यानंतर त्यांचा मृतदेह ड्रममध्ये टाकून पाण्यात फेकण्यात आला.
पोलिसांनी दिलेल्या माहितीनुसार, ड्रममधून सापडलेल्या मृतदेहाच्या पँटच्या खिशात मयमनसिंह हिंदू को-ऑपरेटिव्ह क्रेडिट युनियन लिमिटेडचे एक टोकन आढळले. या टोकनच्या आधारे पोलिसांनी संस्थेशी संपर्क साधला. त्यानंतर मृत व्यक्तीची ओळख निरंजन चंद्र सूत्रधार अशी पटवण्यात आली. पुढे त्यांची पत्नी सुमिता राणी सूत्रधार आणि मुलगा जॉय सूत्रधार यांनी मृतदेहाची ओळख पटवली.
या ताज्या घटनेमुळे बांगलादेशातील हिंदू अल्पसंख्याक समुदायावरील हल्ल्यांबाबत पुन्हा चिंता व्यक्त केली जात आहे. या घटनांचा सिलसिला मुहम्मद युनूस यांच्या नेतृत्वाखालील मागील अंतरिम सरकारच्या काळात सुरू झाल्याचा दावा करण्यात आला असून, सध्याच्या बांगलादेश नॅशनलिस्ट पार्टी (बीएनपी)च्या सरकारच्या काळातही तो सुरू असल्याचे म्हटले जात आहे.
भारताचा कबड्डीत पुन्हा सुवर्णविजय!
इस्लामाबाद सील! रस्त्यांवर कंटेनर, लोखंडी काटे अन् २२ हजार सुरक्षारक्षक
नागालँडमध्ये बनावट दारूच्या सेवनानंतर १९ जण दगावले
राज्यातील २६५ तालुक्यांत दुष्काळ जाहीर
या मुद्द्यावर अलीकडेच अवामी लीगनेही प्रश्न उपस्थित केले होते. २००१ ते २००६ या कालावधीत बीएनपी-जमात-ए-इस्लामी आघाडीच्या पाच वर्षांच्या सत्ताकाळाचा संदर्भ देत पक्षाने दावा केला की, त्या काळात देशभरातील अल्पसंख्याक समुदायांवर झालेल्या अत्याचारांसारखी परिस्थिती २०२६ मध्ये पुन्हा पाहायला मिळत आहे. पक्षाने म्हटले, 'मंदिरांवर हल्ले, घरांना आग लावणे, जमिनीवर कब्जा करणे, महिलांवर क्रूर लैंगिक हिंसाचार आणि असंख्य हिंदूंना बांगलादेश सोडण्यास भाग पाडणे, हे सर्व आज २०२६ मध्ये पुन्हा आपल्या डोळ्यांसमोर घडत आहे.'