घटनेत ६१ जण जखमी
मध्य चीनमधील हुनान प्रांतात एका फटाका कारखान्यात मोठा स्फोट झाल्याची माहिती समोर आली आहे. चीनी अधिकाऱ्यांनी दिलेल्या माहितीनुसार, या स्फोटात २१ जणांचा मृत्यू झाला असून ६१ जण जखमी झाले आहेत.
स्फोटानंतर बचावकार्य वेगाने सुरू करण्यात आले आहे.
चीनी माध्यमांच्या वृत्तानुसार, हा स्फोट सोमवारी सायंकाळी सुमारे ४.४३ वाजता हुशेंग फटाके निर्मिती आणि डिस्प्ले करणाऱ्या कंपनीच्या कारखान्यात झाला. हा कारखाना हुनानची राजधानी चांग्शा येथील प्रांतीय स्तरावरील लियुयांग शहरात आहे. बचावकार्यासाठी पाच पथकांमधून ४८० हून अधिक बचावदल कर्मचारी पाठवण्यात आले असून तीन बचाव रोबोटही तैनात करण्यात आले आहेत. ज्या ठिकाणी स्फोट झाला त्या परिसरात दोन ब्लॅक पावडरचे गोदामही आहेत. त्यामुळे बचाव पथकांनी परिसरातील नागरिकांना सुरक्षित ठिकाणी हलवले असून दुसरा अपघात टाळण्यासाठी बफर झोन तयार केला आहे.
मंगळवारी सकाळी ८ वाजेपर्यंत, बचाव पथकांनी पहिल्या टप्प्यातील शोध मोहिमेनंतर मृत आणि जखमींची संख्या निश्चित केली होती. जखमींना उपचारासाठी रुग्णालयात दाखल करण्यात आले असून दुसऱ्या टप्प्यातील शोधकार्य सुरू आहे. आपत्कालीन व्यवस्थापन मंत्रालयाने बचावकार्यात मदत करण्यासाठी तज्ज्ञांची टीम घटनास्थळी पाठवली आहे. न्यूज एजन्सी शिन्हुआने दिलेल्या माहितीनुसार, कंपनीच्या प्रभारी व्यक्तीला पोलिसांनी ताब्यात घेतले असून अपघाताच्या कारणांची चौकशी सुरू आहे.
घरकाम ते आमदारकी: महिन्याला २,५०० रुपये कमावणाऱ्या भाजपच्या कलिता माझी कोण?
१२ वर्षांपूर्वीच अमित शाहांनी सांगितलेले पश्चिम बंगालचे भविष्य!
भारताला मिळणार एआय ऑर्बिटल डेटा सेंटर सॅटेलाइट!
आसाम काँग्रेसचे प्रदेशाध्यक्ष गौरव गोगोईंची हार
बचाव पथकांना फटाका कारखान्याच्या ३ किलोमीटर परिसरातील सर्व लोकांना स्थलांतरित करावे लागले. बचावकार्यादरम्यान दुसरे अपघात टाळण्यासाठी परिसरात ओलावा कायम ठेवण्यासारखे उपायही करण्यात आले. चीनचे राष्ट्रपती शी जिनपिंग यांनी अद्याप बेपत्ता असलेल्या लोकांचा शोध घेण्यासाठी आणि जखमींना वाचवण्यासाठी सर्वतोपरी प्रयत्न करण्याचे निर्देश दिले आहेत. तसेच या घटनेची सखोल चौकशी करून जबाबदारांवर कारवाई करण्याचेही त्यांनी सांगितले आहे.
लियुयांग शहर फटाके निर्मितीसाठी प्रसिद्ध असून, अहवालांनुसार ते जगातील सर्वात मोठे फटाके उत्पादन करणारे शहर मानले जाते. चीनमध्ये फटाक्यांच्या कारखान्यांमध्ये आणि दुकानांमध्ये यापूर्वीही स्फोटाच्या घटना घडल्या असून त्या अनेकदा जीवघेण्या ठरल्या आहेत. यापूर्वी फेब्रुवारीमध्ये हुबेई प्रांतातील एका फटाक्यांच्या दुकानात झालेल्या स्फोटात १२ जणांचा मृत्यू झाला होता.