सौदी अरेबियातील पवित्र मक्का शहरातील एका मशिदीत कथित अनैतिक कृत्य केल्याच्या आरोपावरून दोन बांगलादेशी नागरिकांना फाशी देण्यात आल्याने तीव्र संताप व्यक्त केला जात आहे. या कारवाईनंतर संबंधित व्यक्तींनी नेमके कोणते कृत्य केले होते, त्यांच्यावरील खटला किती पारदर्शक होता, त्यांना निष्पक्ष सुनावणी मिळाली होती का आणि बांगलादेश सरकारला यापूर्वी या कारवाईची माहिती देण्यात आली होती का, असे अनेक संतप्त प्रश्न उपस्थित झाले आहेत.
सौदी अरेबियातील प्रसारमाध्यमांनी दिलेल्या वृत्तानुसार, १४ ऑक्टोबर रोजी या दोघांना मक्केतील एका मशिदीत कथित 'अनैतिक कृत्ये' केल्याच्या आरोपावरून फाशी देण्यात आली. मात्र, संबंधित कृत्य नेमके काय होते, याचा तपशील सौदी माध्यमांनी दिलेला नाही. सौदी अधिकाऱ्यांनीही याबाबत सार्वजनिकरीत्या अधिक माहिती दिलेली नाही. बांगलादेशकडूनही या घटनेबाबत कोणतीही माहिती न दिल्याबद्दल चिंता व्यक्त केली आहे.
सौदी अरेबिया हा जगातील सर्वाधिक मृत्युदंडाच्या शिक्षा देणाऱ्या देशांपैकी एक आहे. ह्युमन राइट्स वॉचच्या माहितीनुसार, २०२५ मध्ये सौदी अरेबियात किमान ३५६ जणांना मृत्युदंड देण्यात आला आहे. त्यापैकी बहुतांश प्रकरणे अंमली पदार्थांशी संबंधित अहिंसक गुन्ह्यांची होती.
विशेष म्हणजे, सौदी अरेबियाचे पंतप्रधान आणि युवराज मोहम्मद बिन सलमान यांनी २०२२ मधील एका मुलाखतीत फाशीची शिक्षा प्रामुख्याने खुनाच्या प्रकरणांपुरती मर्यादित करण्यात आल्याचे म्हटले होते. सौदी अरेबियामध्ये इस्लामी कायद्यानुसार प्रामुख्याने तीन प्रकारच्या कायदेशीर तरतुदींअंतर्गत फाशीच्या शिक्षा दिल्या जातात. त्यामध्ये 'किसास' म्हणजे प्रतिशोधात्मक शिक्षा, प्रामुख्याने खुनाच्या प्रकरणांत; 'हुदूद' म्हणजे विशिष्ट गुन्ह्यांसाठी निर्धारित शिक्षा; आणि 'ताझीर' म्हणजे न्यायिक अधिकारानुसार ठरवण्यात येणाऱ्या शिक्षा, ज्यामध्ये अंमली पदार्थांची तस्करी आणि इतर गुन्ह्यांचाही समावेश होऊ शकतो.
या दोन्ही बांगलादेशी नागरिकांना 'ताझीर'अंतर्गत मृत्युदंडाची शिक्षा सुनावण्यात आली होती. संबंधित न्यायिक अधिकाऱ्यांनी शिक्षा कायम ठेवल्यानंतर मक्का प्रदेशात फाशी देण्यास राजाज्ञेद्वारे मंजुरी देण्यात आल्याचे वृत्त आहे.
परदेशी नागरिकांना मृत्युदंड देण्यासंदर्भातील हा अलीकडील काळातील दुसरा चर्चेत आलेला प्रकार आहे. यापूर्वी सौदी अरेबियात राहणाऱ्या श्रीलंकेतील हिंदू नागरिक अनोजन सिवारासा यांना ईशनिंदेच्या आरोपावरून मृत्युदंड सुनावण्यात आला होता. मात्र, श्रीलंकेने हस्तक्षेप केल्यानंतर त्यांची शिक्षा रद्द करण्यात आल्याचे वृत्त आहे.
सलग तिसऱ्या दिवशी मुंबईच्या हवेचा दर्जा घसरला
सणासुदीपूर्वी आरबीआयकडून बँकांना एक लाख कोटींचा निधी उपलब्ध
भारत-न्यूझीलंड मुक्त व्यापार करारातून २० अब्ज डॉलरची गुंतवणूक
ते बांगलादेशी नागरिक कोण होते?
सौदी अरेबियातील प्रसारमाध्यमांनी गृह मंत्रालयाच्या हवाल्याने दिलेल्या वृत्तानुसार, मृत्युदंड देण्यात आलेल्या दोघांची नावे नजरुल इस्लाम अब्दुल बशीर आणि सिटी अख्तर अशी आहेत. मक्का शहरातील एका मशिदीत कथित अनैतिक कृत्य केल्याचा आरोप त्यांच्यावर होता. मात्र, सौदी प्रशासनाने यापलीकडे फारशी माहिती दिलेली नाही. कथित कृत्य नेमके काय होते, त्यांना कधी अटक करण्यात आली आणि त्यांच्यावरील खटल्याची प्रक्रिया कशी पार पडली, याचा तपशील सार्वजनिक करण्यात आलेला नाही.
सोशल मीडियावर हे दोघे एकमेकांचे प्रेमसंबंध असलेले जोडपे होते आणि त्यांनी मशिदीत एकमेकांच्या कपाळाचे चुंबन घेतले होते, अशा प्रकारचे दावे केले जात आहेत. काही पोस्टमध्ये हे कृत्य केवळ कपाळावर चुंबन घेण्यापुरते मर्यादित असल्याचाही दावा करण्यात आला आहे.