शशी थरूर यांचे स्पष्टीकरण
भारतात सत्ताबदल घडवून आणण्यासाठी बांगलादेश आणि फ्रान्समधील घटनांच्या धर्तीवर कट रचला जात असल्याचा आरोप काँग्रेसने फेटाळून लावला आहे. काँग्रेसचे खासदार शशी थरूर यांनी, 'भारत हा बांगलादेश किंवा फ्रान्स नाही,' असे स्पष्ट करत विरोधकांची मागणी सरकार उलथवून टाकण्याची नसून मुक्त आणि निष्पक्ष निवडणुका सुनिश्चित करण्याची असल्याचे सांगितले.
मतदार याद्यांच्या विशेष सखोल पुनरावलोकन प्रक्रियेवरून (एसआयआर) सुरू असलेल्या वादाच्या पार्श्वभूमीवर त्यांनी सोमवारी (१९ ऑक्टोबर) ही भूमिका मांडली.
केंद्रीय मंत्री किरेन रिजिजू यांनी विरोधकांवर भारतात हिंसाचार घडवून आणण्याचा कट रचल्याचा आरोप केला होता. त्याला उत्तर देताना थरूर यांनी बांगलादेश आणि फ्रान्समधील परिस्थितीची भारताशी तुलना करणे योग्य नसल्याचे सांगितले. फ्रान्समध्ये झालेली जाळपोळ, बस आणि पोलीस ठाण्यांना आग लावण्यासारख्या हिंसक घटनांचे काँग्रेस कधीही समर्थन करणार नाही, असे थरूर यांनी स्पष्ट केले. विरोधकांचा विश्वास शांततापूर्ण आंदोलनावर असून, लोकशाही व्यवस्थेत आपले म्हणणे मांडण्याचा नागरिकांना अधिकार असल्याचेही त्यांनी नमूद केले.
सत्ताबदलाच्या मागणीचा चुकीचा अर्थ लावला जात असल्याचा आरोप करत थरूर म्हणाले की, विरोधकांची भूमिका घटनात्मक प्रश्नांशी संबंधित आहे. सरकार पाडण्यासाठी हिंसाचार घडवून आणण्याचा त्यांचा उद्देश नसल्याचे त्यांनी स्पष्ट केले. मतदार याद्यांच्या विशेष सखोल पुनरावलोकन प्रक्रियेवरून काँग्रेसने निवडणूक आयोगावर प्रश्न उपस्थित केले आहेत. या प्रक्रियेदरम्यान मोठ्या संख्येने मतदारांची नावे यादीतून वगळली गेल्याचा आरोप थरूर यांनी केला. ही प्रक्रिया त्रुटीपूर्ण, अनियमित आणि काही अंशी बेकायदेशीर असल्याचा दावा करत त्यांनी संबंधित बदल मागे घेण्याची मागणी केली.
लोकशाहीत निवडणूक प्रक्रिया पारदर्शक आणि विश्वासार्ह असणे गरजेचे आहे. निवडणूक आयोगासारख्या घटनात्मक संस्थांनी संविधानाने निश्चित केलेल्या जबाबदाऱ्यांनुसार काम करावे, अशी अपेक्षा थरूर यांनी व्यक्त केली. संस्थांच्या अस्तित्वाला आव्हान देण्याऐवजी त्यांच्या कामकाजातील त्रुटींवर प्रश्न उपस्थित करत असल्याचेही त्यांनी म्हटले.
भारत-अमेरिका व्यापार करार अंतिम टप्प्यात
टायगर गोळीबारप्रकरणी तिघांना रेल्वेत पकडले
'लष्कर' संस्थापक सदस्य मोहम्मद सरवर पायऱ्यांवरून पडून गतप्राण
टायगर श्रॉफ गोळीबारप्रकरणी आरोपींचे धागेदोरे हाती; फडणवीसांची माहिती
लोकशाही ही कोणत्याही एका व्यक्तीची किंवा राजकीय पक्षाची देणगी नसून ती जपण्याची जबाबदारी सामान्य नागरिकांची आहे, असे थरूर यांनी म्हटले. प्रत्येक भारतीय नागरिकाला देशातील लोकशाही व्यवस्थेचे संरक्षण करण्याचा अधिकार असल्याचे त्यांनी सांगितले. निवडणूक आयोगाच्या कामकाजावर टीका करणे म्हणजे घटनात्मक संस्थांना आव्हान देणे नव्हे, तर त्या संस्थांनी आपली जबाबदारी योग्य प्रकारे पार पाडावी, अशी मागणी करणे, असे शशी थरूर यांनी सांगितले.