या छाप्यामध्ये त्यांच्या घरातून 7.65 mm ची एकूण 40 काडतुसे जप्त करण्यात आली आहेत. या घटनेमुळे पोलिसांना देखील धक्का बसला आहे.

चंद्रपूर शहरातील इंदिरानगर भागातील विक्रांत सहारे यांच्या घरावर पोलिसांनी छापा टाकला. पोलिसांची 4 तास शोध मोहिम सुरू होती. या छाप्यात एक तलवार, 1 मॅक्झिन आणि बेसबॉल बॅटसह, 40 काडतुसे, वाघनखे देखील जप्त करण्यात आली आहेत. विक्रांत सहारे व कुटुंबीयांची चौकशी केली जात आहे. विक्रांत सहारे हे शिवसेना ठाकरे गटाचे युवासेना जिल्हाप्रमुख आहेत, त्यांच्या घरातून हा शस्त्रसाठा जप्त करण्यात आल्याने जिल्ह्यात खळबळ उडाली आहे. पोलिस पुढील तपास करत आहेत.

दरम्यान, चंद्रपूर जिल्ह्यात गेल्या काही दिवसांपासून गोळीबारांच्या घटनांमध्ये वाढ झाली आहे. या पार्श्वभूमीवर पोलिसांनी अग्निशस्त्र व हत्यार विरोधी विशेष अभियान चालू केले आहे. या अभियानांतर्गत सहारे यांना शस्त्रे विकण्यासाठी काही तरुण येणार असल्याची गुप्त माहिती पोलिसांना मिळाली होती. त्यानुसार पोलिसांनी विक्रांत सहारे यांच्या घरावर छापा टाकला आणि विविध वस्तू मिळाल्या आहेत. पोलिसांनी निलेश पराते आणि अमोल कोलतवार या दोन विक्रेत्यांना देखील ताब्यात घेण्यात आले आहे.