மில்க் ஷேக்… கோடை தொடங்கியதும் டிரெண்டிங்கில் வந்துவிட்டது. குடிப்பதற்கும் நல்ல உணர்வையும், நாக்குக்கு சுவையையும் தருகிறது.

ஆனால், மில்க் ஷேக் ஆரோக்கியமானதா என்று கேட்டால் யோசித்துதான் பதில் சொல்ல வேண்டியிருக்கும்.

ஏனெனில், பெரும்பாலும் கடைகளில் காய்ச்சாத பாலை அப்படியே பச்சையாக மில்க் ஷேக்குக்கு பயன்படுத்துகிறார்கள். பாலைக் காய்ச்சி, ஆற வைத்து, பின்பு குளிர்ந்த பிறகுதான் பயன்படுத்த வேண்டும். தொற்று அபாயம் உள்ள பச்சைப்பாலில் பழம், ஐஸ்கட்டியுடன் ஒன்றாக அடித்துக் கொடுக்கிறார்கள். எனவே, முடிந்தவரை வெளியிடங்களில் மில்க் ஷேக்கை தவிர்ப்பதே நல்லது. முடிந்தால் வீட்டிலேயே தயார் செய்து பருகுங்கள்.

ஆரஞ்சு, பழைய மாம்பழம், சாத்துக்குடி போன்ற புளிப்பு வகைப் பழங்களோடு பாலைச் சேர்க்கக் கூடாது. திரிந்து போய்விடும். கொய்யா, ஆப்பிள், ஃப்ரெஷ் மாம்பழம், சீத்தாப்பழம் போன்ற பழங்களை மில்க் ஷேக்குக்கு பயன்படுத்தலாம்.

பழங்களில் இருக்கும் இயற்கையான இனிப்புச்சுவையே போதுமானது. முடிந்தவரை சர்க்கரை சேர்க்காமல் பருகுவதே நல்லது. இல்லாவிட்டால் மிகவும் குறைவான அளவு சேர்த்துக் கொள்ளலாம். செரிமான சக்தி குறைந்தவர்கள் மில்க் ஷேக்கை தவிர்க்க வேண்டும். யாருக்கு செரிமான சக்தி நன்றாக இருக்கிறதோ, அவர்களுக்கு மில்க் ஷேக் நல்லது.