చిరంజీవి 'ఇంద్ర' కటౌట్‌లో తొడ కొడుతున్నట్లుగా తనని పెట్టుకుని ఫన్నీ ఎడిట్ ఫొటోను షేర్ చేస్తూ.. ''హ్యాపీ బర్త్‌డే 'T-REX' మెగాస్టార్ చిరంజీవి సర్! మన సినిమా షూటింగ్ ప్రారంభించి మీతో జీవితాంతం గుర్తుండిపోయే జ్ఞాపకాలను సృష్టించుకోవడానికి ఎంతో ఆసక్తిగా ఎదురుచూస్తున్నాను'' అంటూ శ్రీకాంత్ ఓదెల ట్వీట్ చేశారు. అయితే ఆయన చిరంజీవిని ఉద్దేశించి ఉపయోగించిన 'T-REX' అనే పదం వెనుక ఉన్న అసలు అర్థం ఏమిటనే దానిపై నెటిజన్లు, మెగా అభిమానులు నెట్టింట తెగ సెర్చ్ చేస్తూ చర్చించుకుంటున్నారు.

ఈ క్రమంలో ఓ నెటిజన్ 'T-Rex' పదం వెనుక ఉన్న సైంటిఫిక్ అండ్ పవర్‌ఫుల్ బ్యాక్‌గ్రౌండ్‌ను వివరిస్తూ పెట్టిన పోస్ట్ వైరల్ అవుతోంది. ''సుమారు 6.6 కోట్ల సంవత్సరాల క్రితం మెక్సికోలోని యుకటాన్ ద్వీపకల్పం వద్ద దాదాపు 10 నుంచి 15 కిలోమీటర్ల వెడల్పున్న భారీ గ్రహశకలం (Asteroid) భూమిని ఢీకొట్టింది (ప్రస్తుతం దీనిని చిక్సులూబ్ క్రేటర్ అంటారు). ఆ భారీ విధ్వంసం ధాటికి భూమిపై ఉన్న తిరుగులేని రాక్షస డైనోసార్లు మొత్తం పూర్తిగా అంతరించిపోయాయి. అలా అంతమైపోయిన డైనోసార్ జాతుల్లో అత్యంత బలమైన, క్రూరమైన అగ్ర పాలకుడినే 'టి-రెక్స్' (Tyrannosaurus Rex) అంటారు'' అంటూ ఆ నెటిజన్ వివరించారు. అంటే సినీ ప్రపంచంలో ఎవరూ ఎదురునిలవలేని అత్యంత శక్తివంతమైన ఏకైక రాజుగా చిరంజీవిని శ్రీకాంత్ పోల్చారని అభిమానులు కొనియాడుతున్నారు.