Chandrababu Naidu: ఆంధ్రప్రదేశ్ రాష్ట్ర చారిత్రక, ఆధ్యాత్మిక, మరియు సాంస్కృతిక వైభవాన్ని ప్రపంచానికి చాటిచెప్పేలా 2027 గోదావరి పుష్కరాలను అత్యంత వైభవంగా నిర్వహించాలని ముఖ్యమంత్రి నారా చంద్రబాబు నాయుడు అధికారులను ఆదేశించారు.

సచివాలయంలో మంగళవారం నిర్వహించిన ఉన్నత స్థాయి సమీక్షా సమావేశంలో మంత్రుల కమిటీ, వివిధ శాఖల అధికారులతో కలిసి ఆయన పుష్కరాల ఏర్పాట్లపై చర్చించారు. ఈ ప్రతిష్టాత్మక వేడుకను విజయవంతం చేయడానికి అన్ని ప్రభుత్వ శాఖలు ఒక తాటిపైకి వచ్చి, సమన్వయంతో పనిచేయాలని సీఎం స్పష్టం చేశారు.

cm chandrababu review

Read also: Amalapuram Minor Abortion:మైనర్ గర్భస్రావం కేసుపై కలెక్టర్ సీరియస్!

పుష్కరాల నాటికి పోలవరం పూర్తి.. ‘అఖండ గోదావరి కారిడార్’ ఏర్పాటు

ఈ పుష్కరాల నాటికే ప్రతిష్టాత్మక పోలవరం ప్రాజెక్టును పూర్తి చేసి జాతికి అంకితం చేస్తామని, ఇది పుష్కరాలకు వచ్చే భక్తులకు ఒక ప్రత్యేక పర్యాటక ఆకర్షణగా నిలుస్తుందని ముఖ్యమంత్రి పునరుద్ఘాటించారు. ధవళేశ్వరం బ్యారేజీ నుండి పోలవరం ప్రాజెక్టు వరకు ఉన్న మొత్తం ప్రాంతాన్ని ‘అఖండ గోదావరి కారిడార్’గా అద్భుతంగా తీర్చిదిద్దాలని అధికారులకు సూచించారు. పుష్కరాల కోసం తాత్కాలిక ఏర్పాట్లు కాకుండా, గోదావరి బేసిన్ ప్రాంతంలో శాశ్వత ప్రాతిపదికన మౌలిక సదుపాయాలను కల్పించాలని, ఇవి భవిష్యత్తులో ఆస్తులుగా మిగలాలని ఆకాంక్షించారు. ఈ మెగా ఈవెంట్ ద్వారా రాజమహేంద్రవరం నగరం ఒక ప్రధాన మహానగరంగా రూపాంతరం చెందుతుందని ఆయన ధీమా వ్యక్తం చేశారు.

Chandrababu Naidu: 525 పుష్కర ఘాట్ల గుర్తింపు.. 10 కోట్ల మంది భక్తులు వచ్చే అవకాశం

పుష్కరాల ఏర్పాట్లలో భాగంగా పోలవరం, ఏలూరు, తూర్పు గోదావరి, పశ్చిమ గోదావరి, డాక్టర్ బి.ఆర్. అంబేద్కర్ కోనసీమ, మరియు కాకినాడ జిల్లాల పరిధిలో మొత్తం 525 పుష్కర ఘాట్లను సిద్ధం చేయాలని ప్రభుత్వం నిర్ణయించింది. ఈ పుణ్యస్నానాల కోసం దాదాపు 9.95 కోట్ల మంది భక్తులు తరలివచ్చే అవకాశం ఉందని అధికార యంత్రాంగం అంచనా వేస్తోంది. ఇంతటి భారీ జనసందోహం రానున్న నేపథ్యంలో రద్దీని నియంత్రించడానికి రోడ్డు, రైల్వే రవాణా వ్యవస్థలను పటిష్టం చేయాలని, భక్తుల సౌకర్యార్థం పుష్కర ఘాట్లకు క్రమపద్ధతిలో డిజిటల్ నంబర్లను కేటాయించాలని సీఎం ఆదేశించారు.

కేంద్ర సహాయం కోసం లేఖ.. జూన్ 24న కౌంట్‌డౌన్ ప్రారంభం

పుష్కరాల నిర్వహణకు అవసరమైన ఆర్థిక సహాయంతో పాటు, భక్తుల రవాణా కోసం ప్రత్యేక రైళ్లను నడపాలని కోరుతూ కేంద్ర రైల్వే మంత్రి అశ్విని వైష్ణవ్‌కు లేఖ రాయాలని అధికారులకు సీఎం చంద్రబాబు సూచించారు. అలాగే, డిప్యూటీ సీఎం పవన్ కల్యాణ్ క్షేత్రస్థాయి పర్యటనల ద్వారా అందించిన కీలక సిఫార్సులను కూడా పుష్కరాల మాస్టర్ ప్లాన్‌లో చేర్చాలని అధికారులను ఆదేశించారు. జూన్ 24వ తేదీ నాటికి పూర్తి స్థాయి కార్యాచరణ ప్రణాళికను సిద్ధం చేసి సమర్పించాలని, ఆ తర్వాతే 2027 పుష్కరాలకు సంబంధించిన అధికారిక కౌంట్‌డౌన్ ప్రారంభమవుతుందని ముఖ్యమంత్రి వెల్లడించారు.