Food Safety Rules: దేశంలో ఆహార వ్యాపార రంగంలో నిబంధనల భారాన్ని తగ్గించి, వ్యాపార సౌలభ్యాన్ని (ఈజ్ ఆఫ్ డూయింగ్ బిజినెస్) మరింతగా పెంచే లక్ష్యంతో కేంద్ర ప్రభుత్వం ఒక కీలక నిర్ణయం తీసుకుంది.
ఆహార భద్రత, ప్రమాణాల నిబంధనలు-2011కు (FSSAI Rules) సవరణలు చేస్తూ కేంద్ర ఆరోగ్య, కుటుంబ సంక్షేమ మంత్రిత్వ శాఖ అధికారిక నోటిఫికేషన్ జారీ చేసింది. ఈ సరికొత్త మార్పుల ద్వారా ఆహార పదార్థాలను స్వయంగా తయారు చేయని (నాన్-మాన్యుఫ్యాక్చరింగ్) వ్యాపార సంస్థలకు కొన్ని ప్రధానమైన నిబంధనల నుంచి శాశ్వత మినహాయింపు లభించింది.
Read also: Narcotic drugs : మాదక ద్రవ్యాల అడ్డుకట్టకు గట్టి కృషి
Changes to food safety regulations… major relief for retailers.
Food Safety Rules: తయారీ సంస్థలకే ‘స్టాక్ రొటేషన్’ రూల్స్.. రిటైలర్లకు మినహాయింపు
తాజా సవరణల ప్రకారం.. స్టాక్ రొటేషన్, రోజువారీ రికార్డుల నిర్వహణ వంటి కఠిన నిబంధనలు ఇకపై కేవలం ఆహార పదార్థాలను స్వయంగా తయారు చేసే (మాన్యుఫ్యాక్చరింగ్) సంస్థలకు మాత్రమే వర్తిస్తాయి. గతంలో లైసెన్స్ పొందిన అన్ని రకాల ఆహార వ్యాపార సంస్థలు తప్పనిసరిగా రికార్డులను నిర్వహించడంతో పాటు ‘ఫస్ట్ ఇన్, ఫస్ట్ అవుట్’ (FIFO) లేదా ‘ఫస్ట్ ఎక్స్పైరీ, ఫస్ట్ అవుట్’ (FEFO) పద్ధతులను పాటించాల్సి ఉండేది. అయితే, ఇప్పుడు సాధారణ రిటైలర్లు, ఇతర అనుబంధ విక్రయ సంస్థలకు ఈ నిబంధనల నుంచి ప్రభుత్వం పూర్తి ఉపశమనం కల్పించింది. ఆహార భద్రత, నాణ్యత, ఉత్పత్తుల ట్రేసబిలిటీ (మూలాలను గుర్తించడం) వంటి అంశాల దృష్ట్యా తయారీ రంగంలో ఈ నిబంధనలు అత్యవసరం కాబట్టి, వాటిని కేవలం తయారీదారులకే పరిమితం చేస్తూ ప్రభుత్వం నిర్ణయం తీసుకుంది.
నిబంధనల భారం తగ్గింపు.. వ్యాపార సౌలభ్యమే లక్ష్యం
ఈ మార్పుల వల్ల ముఖ్యంగా చిన్న, మధ్య తరహా వ్యాపారాలపై (MSME) నిబంధనల భారం గణనీయంగా తగ్గుతుందని, వారి రోజువారీ వ్యాపార కార్యకలాపాలు ఎంతో సులభతరం అవుతాయని కేంద్ర మంత్రిత్వ శాఖ తన ప్రకటనలో పేర్కొంది. దేశంలో ప్రమాద ఆధారిత (రిస్క్-బేస్డ్) నియంత్రణను ప్రోత్సహించడమే లక్ష్యంగా చేపట్టిన విస్తృత సంస్కరణల్లో ఈ సవరణలు ఒక భాగమని స్పష్టం చేసింది. గత కొన్నేళ్లుగా ఆహార వ్యాపారుల కోసం ప్రభుత్వం అనేక సులభతర చర్యలు తీసుకున్న విషయాన్ని కేంద్రం గుర్తు చేసింది. శాశ్వత లైసెన్సులు, రిజిస్ట్రేషన్ల జారీ, టర్నోవర్ పరిమితుల సవరణ, వీధి వ్యాపారులకు ద్వంద్వ నిబంధనల తొలగింపు, రిస్క్-బేస్డ్ తనిఖీ వ్యవస్థ అమలు వంటివి ఇందులో ఉన్నాయని వివరించింది.
రాష్ట్రాలు, కేంద్ర పాలిత ప్రాంతాలతో పాటు ఆహార వ్యాపార రంగంలోని భాగస్వాములతో విస్తృత సంప్రదింపుల తర్వాతే ఈ సంస్కరణలకు తుదిరూపు ఇచ్చామని మంత్రిత్వ శాఖ తెలిపింది. అనవసరమైన నియంత్రణ భారాన్ని తగ్గిస్తూనే, సమర్థవంతమైన పర్యవేక్షణను కొనసాగించాలని నీతి ఆయోగ్ ఏర్పాటు చేసిన ఉన్నత స్థాయి కమిటీ చేసిన సిఫార్సులకు అనుగుణంగానే ఈ మార్పులు చేశామని స్పష్టం చేసింది. శాస్త్రీయ ఆధారిత నిబంధనలు, భాగస్వాముల సంప్రదింపుల ద్వారా దేశంలో ఆహార భద్రతా వ్యవస్థను మరింత బలోపేతం చేయడానికి కేంద్రం కట్టుబడి ఉందని పునరుద్ఘాటించింది.