ఆర్పీఎఫ్ వీరకృత్యం: 'నన్హే ఫరిస్తే' ద్వారా 120 మంది చిన్నారుల రక్షణ.

RPF Nanhe Farishte: దక్షిణ మధ్య రైల్వేలో రైల్వే ప్రొటెక్షన్ ఫోర్స్ (RPF) నిర్వహించిన వివిధ భద్రతా కార్యక్రమాలు ఏప్రిల్ నెలలో అద్భుతమైన ఫలితాలను సాధించాయి.

రైల్వే సీపీఆర్వో శ్రీధర్ వెల్లడించిన వివరాల ప్రకారం, 'నన్హే ఫరిస్తే' పేరుతో చేపట్టిన ఆపరేషన్‌లో భాగంగా అక్రమ రవాణాకు గురవుతున్న 120 మంది చిన్నారులను సురక్షితంగా రక్షించి చైల్డ్ వెల్ఫేర్ కమిటీకి అప్పగించారు. అలాగే 'ఆపరేషన్ ఆహాత్' ద్వారా మానవ అక్రమ రవాణాదారుల ఆటకట్టించి, చిన్నారులను కాపాడటంలో ఆర్పీఎఫ్ విజయం సాధించింది.

RPF Nanhe Farishte:భారీగా పట్టుబడిన గంజాయి, దొంగిలించిన సొత్తు

నేరాల నియంత్రణతో పాటు ప్రయాణికుల సేవలోనూ ఆర్పీఎఫ్ ముందుంది. 'యాత్రి సురక్ష' కింద 79 మంది నేరస్థులను పట్టుకోగా, 'ఆపరేషన్ అమానత్' ద్వారా ప్రయాణికులు మర్చిపోయిన రూ. 83 లక్షలకు పైగా విలువైన వస్తువులను తిరిగి అందించారు. మరోవైపు, మత్తుపదార్థాల రవాణాను అరికట్టే 'నార్కోస్' ఆపరేషన్‌లో భాగంగా భారీగా గంజాయిని స్వాధీనం చేసుకుని 16 మందిని అరెస్టు చేశారు. ఈ చర్యల పట్ల ప్రయాణికులు మరియు పౌర సమాజం నుంచి ప్రశంసలు వ్యక్తమవుతున్నాయి.