Talliki Vandanam : ఆంధ్రప్రదేశ్ వ్యాప్తంగా పాఠశాల విద్యార్థుల కుటుంబాలు ఎంతగానో ఎదురుచూస్తున్న 'తల్లికి వందనం' (Talliki Vandanam) పథకం నిధుల విడుదలపై ప్రభుత్వం కీలక కసరత్తు చేస్తోంది.

సాధారణంగా గత ఏడాది జూన్ 12వ తేదీనే విద్యార్థుల తల్లుల బ్యాంకు ఖాతాల్లో ఒక్కొక్కరికి రూ. 13,000 చొప్పున నగదును సర్కార్ జమ చేసింది. అయితే, ఈ సంవత్సరం వివిధ రకాల పరిపాలనాపరమైన కారణాలు మరియు లబ్ధిదారుల వెరిఫికేషన్ ప్రక్రియ వల్ల ఈ నిధుల పంపిణీ కాస్త ఆలస్యం కానున్నట్లు తెలుస్తోంది. విశ్వసనీయ వర్గాల సమాచారం ప్రకారం.. ఈ పథకాన్ని రాబోయే జులై నెలలో లబ్ధిదారుల ఖాతాల్లోకి నేరుగా జమ (DBT) చేసేలా విద్యాశాఖ ప్రణాళికలు సిద్ధం చేస్తోంది. ఒకటో తరగతి నుంచి ఇంటర్మీడియట్ వరకు ప్రభుత్వ మరియు ప్రైవేట్ విద్యాసంస్థల్లో చదువుతున్న విద్యార్థులకు ఈ పథకం వర్తించనుంది.

Read Also : విద్య సమాజ శ్రేయస్సుకు ఉపయోగపడాలి.. గవర్నర్!

68 లక్షల మందికి లబ్ధి.. రేపటి నుంచే స్కూళ్లు రీఓపెన్!

ఈ విద్యా సంవత్సరంలో ‘తల్లికి వందనం’ పథకం ద్వారా రాష్ట్రవ్యాప్తంగా దాదాపు 68 లక్షల మంది విద్యార్థుల తల్లులకు ఆర్థిక సహాయం అందనుండటం విశేషం. గత ప్రభుత్వ నిబంధనలకు భిన్నంగా, ఒకే ఇంట్లో ఎంతమంది పిల్లలు ఉన్నా.. అర్హులైన పిల్లలందరికీ ఈ స్కీమ్‌ను వర్తింపజేయాలని కూటమి ప్రభుత్వం నిర్ణయించింది. ఇదిలా ఉండగా, ఎండల తీవ్రత తగ్గుముఖం పట్టడంతో ఎల్లుండి (జూన్ 12వ తేదీన) రాష్ట్రవ్యాప్తంగా పాఠశాలలు పునఃప్రారంభం (Schools Reopen) కానున్నాయి. స్కూళ్లు తెరిచిన వెంటనే విద్యార్థుల బయోమెట్రిక్ వివరాలు, ఆధార్ అనుసంధానం మరియు హాజరు శాతం వంటి అర్హతలను పరిశీలించి, జులైకల్లా నిధులు తల్లుల అకౌంట్లలో పడేలా అధికారులు ఏర్పాట్లు వేగవంతం చేశారు.