తెలంగాణ రాజకీయాల్లో మరోసారి గులాబీ పార్టీని లక్ష్యంగా చేసుకుని అధికార కాంగ్రెస్ పార్టీ విమర్శల పదును పెంచింది. రాబోయే రోజుల్లో భారత్ రాష్ట్ర సమితి (BRS) పార్టీ కాస్తా 'ఎమ్మార్ఎస్' (MRS - మెదక్ రీజినల్ పార్టీ)గా మారిపోవడం ఖాయమని రాష్ట్ర రెవెన్యూ, సమాచార శాఖ మంత్రి పొంగులేటి శ్రీనివాస రెడ్డి తీవ్ర వ్యాఖ్యలు చేశారు.

గతంలో ఉద్యమ పార్టీగా ఉద్భవించిన టీఆర్ఎస్.. ఆ తర్వాత జాతీయ రాజకీయాలంటూ బీఆర్ఎస్‌గా రూపాంతరం చెందిందని, కానీ ప్రస్తుతం ఆ పార్టీ పరిస్థితి నానాటికీ దిగజారుతోందని ఆయన విమర్శించారు. ఒకప్పుడు రాష్ట్రమంతటా విస్తరించిన ఈ పార్టీ, భవిష్యత్తులో కేవలం ఒకే ఒక్క జిల్లాకు పరిమితం కాక తప్పదని ఆయన జోస్యం చెప్పారు.

Read Also : చిలాపూర్, రేగులపల్లిలో అర్ధరాత్రి వరుస చైన్ స్నాచింగ్స్!

విపక్షంలో ఉండి వేసే వేషాలు.. ఆ భాషే దానికి కారణం!

ఇటీవల ఇచ్చిన ఒక ప్రత్యేక ఇంటర్వ్యూలో మంత్రి పొంగులేటి బీఆర్ఎస్ వైఫల్యాలపై లోతైన విశ్లేషణ చేశారు. అధికారంలో ఉన్నప్పుడు ఒకలా, ప్రతిపక్షంలోకి వచ్చాక మరోలా ప్రవర్తిస్తున్న గులాబీ నేతల వైఖరిని ఆయన ఎండగట్టారు. విపక్ష హోదాలో ఉండి బీఆర్ఎస్ నాయకులు వేస్తున్న వేషాలు, ప్రజల ముందు వారు వాడుతున్న భాష వల్లే ఆ పార్టీ పతనం మరింత వేగవంతం అవుతోందని మండిపడ్డారు. బాధ్యతాయుతమైన ప్రతిపక్షంగా వ్యవహరించడం చేతకాక, కేవలం రాజకీయ పంతాల కోసం వాడుతున్న అసభ్య పదజాలమే వారిని ప్రజలకు మరింత దూరం చేస్తోందని, అందుకే రాబోయే ఎన్నికల్లో ఆ పార్టీ ఒకటో రెండో సీట్లకే పరిమితం కాబోతోందని స్పష్టం చేశారు.

మెదక్ ప్రాంతీయ పార్టీగా మార్పు.. గులాబీ కోటలోనే దెబ్బ కొడతాం!

బీఆర్ఎస్ అధినేత కేసీఆర్ ప్రాతినిధ్యం వహిస్తున్న గజ్వేల్, అలాగే కేటీఆర్, హరీష్ రావుల నియోజకవర్గాలు పూర్వపు మెదక్ జిల్లా పరిధిలోనే ఉండటాన్ని ప్రస్తావిస్తూ పొంగులేటి ఈ ‘ఎమ్మార్ఎస్’ వ్యంగ్యాస్త్రాన్ని సంధించారు. రాష్ట్రంలోని మిగిలిన అన్ని జిల్లాల్లో బీఆర్ఎస్ తన ఉనికిని కోల్పోయిందని, కేవలం మెదక్ జిల్లాలోని కొన్ని స్థానాలకే ఆ పార్టీ పరిమితం కానుందని క్షేత్రస్థాయి పరిస్థితులు చెబుతున్నాయన్నారు. ప్రజా సంక్షేమాన్ని విస్మరించి కేవలం ఫామ్‌హౌస్‌లకే పరిమితమైన నేతలకు తెలంగాణ ప్రజలు ఇప్పటికే బుద్ధి చెప్పారని, భవిష్యత్తులో ఆ జిల్లాలో కూడా కాంగ్రెస్ హవా సాగుతుందని మంత్రి పొంగులేటి ధీమా వ్యక్తం చేశారు.