Hyderabad Real Estate: భాగ్యనగరంలో రియల్ ఎస్టేట్ రంగం ఒక్కసారిగా నెమ్మదించింది. గత నాలుగేళ్లలో ఎన్నడూ లేని విధంగా ఇళ్ల అమ్మకాలు భారీగా పడిపోయాయి.
క్రెడాయ్ హైదరాబాద్ మరియు క్రె మెట్రిక్స్ సంయుక్తంగా వెల్లడించిన నివేదిక ప్రకారం, 2026 ఆర్థిక సంవత్సరం మొదటి అర్ధభాగంలో హైదరాబాద్ మార్కెట్ తీవ్ర మందగమనాన్ని చవిచూసింది. గతేడాదితో పోలిస్తే ఇళ్ల విక్రయాలు ఏకంగా 13 శాతం మేర తగ్గాయి. గత ఆరు నెలల్లో నగరంలో కేవలం 26,068 ఇళ్లు మాత్రమే అమ్ముడయ్యాయి. 2022 సంవత్సరం తర్వాత ఆరు నెలల వ్యవధిలో ఇంత తక్కువ స్థాయిలో ఇళ్ల అమ్మకాలు జరగడం ఇదే తొలిసారి అని గణాంకాలు చెబుతున్నాయి.
Read Also : Telangana Paddy Bonus: సన్న వడ్ల రైతులకు గుడ్ న్యూస్
Real estate collapses in Bhagyanagar.
Hyderabad Real Estate: తగ్గుతున్న కొనుగోళ్లు.. ఆకాశాన్ని తాకుతున్న ఇళ్ల ధరలు!
సాధారణంగా మార్కెట్‌లో డిమాండ్ లేదా విక్రయాలు తగ్గినప్పుడు ధరలు తగ్గుతాయని ఆశిస్తారు. కానీ హైదరాబాద్ రియల్ ఎస్టేట్ మార్కెట్‌లో సీన్ పూర్తి భిన్నంగా ఉంది. అమ్మకాలు క్షీణిస్తున్నప్పటికీ బిల్డర్లు మాత్రం ధరలను తగ్గించేందుకు మొగ్గు చూపడం లేదు. గత ఏడాది మొదటి ఆరు నెలల కాలంలో అమ్ముడైన ఇంటి సగటు ధర రూ. 1.85 కోట్లుగా నమోదు కాగా, ఈ ఏడాది అది 10 శాతం పెరిగి రూ. 2.03 కోట్లకు చేరింది. విక్రయాల సంఖ్య తగ్గినప్పటికీ, ప్రీమియం హౌసింగ్ విభాగంలో లావాదేవీల వల్ల గత ఆరు నెలల్లో మొత్తం రూ. 52,913 కోట్ల విలువైన నివాస గృహాల విక్రయాలు జరిగాయి.
హైదరాబాద్ రియల్ ఎస్టేట్ రంగానికి ప్రధాన చోదక శక్తిగా ఉండే ఎన్‌ఆర్‌ఐ (NRI) కొనుగోళ్లు ఈసారి గణనీయంగా తగ్గాయి. ముఖ్యంగా అమెరికాలో ఉద్యోగ భద్రతపై హెచ్చుతగ్గులు, వీసా నిబంధనలు కఠినతరం కావడం ఇందుకు ప్రధాన కారణాలని విశ్లేషకులు భావిస్తున్నారు. దీనికి తోడు ఇటీవల గల్ఫ్ ప్రాంతంలో తలెత్తిన ఉద్రిక్తతలు మరియు యుద్ద వాతావరణం కొనుగోలుదారుల విశ్వాసాన్ని దెబ్బతీశాయి. విదేశీ పరిణామాల ప్రభావంతో పాటు స్థానిక కొనుగోలుదారులు కూడా ప్రస్తుతం కొత్త ఆస్తుల కొనుగోలు విషయంలో ఆచితూచి అడుగులు వేస్తున్నారు.
పెరుగుతున్న ఇన్వెంటరీ
ఒకవైపు ఇళ్ల అమ్మకాలు ఏటికేడాది మందగిస్తున్నప్పటికీ, బిల్డర్లు మాత్రం కొత్త ప్రాజెక్టులను మార్కెట్లోకి తీసుకురావడం ఆపలేదు. గడచిన ఆరు నెలల కాలంలోనే రికార్డు స్థాయిలో 49,656 కొత్త నివాస గృహాలు మార్కెట్లోకి వచ్చాయి. దీంతో ప్రస్తుతం హైదరాబాద్ నగరంలో అమ్ముడుపోకుండా మిగిలిపోయిన ఇళ్ల (Unsold Inventory) సంఖ్య ఏకంగా 1.42 లక్షలకు చేరింది. అయితే ఈ నిల్వల్లో వెంటనే నివాసానికి సిద్ధంగా ఉన్నవి కేవలం 20 శాతం మాత్రమే కాగా, మిగిలినవన్నీ వివిధ నిర్మాణ దశల్లో ఉన్నాయి. రాబోయే పండుగల సీజన్‌లో మార్కెట్ తిరిగి పుంజుకుంటుందని రియల్టర్లు ఆశాభావంతో ఉన్నారు.