భూమి అంతా కెమికల్స్‌తో నిండిపోయింది: బండి సంజయ్

Union Minister Bandi Sanjay : దేశంలో ఆహార కల్తీ, రసాయనాలతో కూడిన సాగు విధానాలపై కేంద్ర హోం శాఖ సహాయ మంత్రి బండి సంజయ్‌ కుమార్ తీవ్ర ఆందోళన వ్యక్తం చేశారు.

కరీంనగర్ జిల్లా జమ్మికుంట కృషి విజ్ఞాన కేంద్రంలో కిసాన్ మోర్చా ఆధ్వర్యంలో నిర్వహించిన 'ప్రకృతి వ్యవసాయంపై రైతు సమ్మేళనం'లో ఆయన ముఖ్య అతిథిగా పాల్గొన్నారు. ఈ సందర్భంగా ఆయన మాట్లాడుతూ తన జీవితంలో ఎదురైన ఒక చేదు అనుభవాన్ని పంచుకున్నారు. గత 20 ఏళ్లలో తనకు ఎప్పుడూ జ్వరం రాలేదని, బీపీ, షుగర్ వంటి ఆరోగ్య సమస్యలు కూడా లేవని బండి సంజయ్ గుర్తు చేసుకున్నారు. అయితే, ఇటీవల హైదరాబాద్ నగరంలో పాలు తాగడం వల్ల తాను ఏకంగా మూడు రోజుల పాటు ఆసుపత్రి పాలవ్వాల్సి వచ్చిందని సంచలన వ్యాఖ్యలు చేశారు. ప్రస్తుత రోజుల్లో మార్కెట్‌లో దొరికే పాలు, రసాయనాలతో పండించే మామిడికాయలు తినాలంటేనే ప్రజలు భయపడే పరిస్థితి నెలకొందని ఆయన ఆవేదన వ్యక్తం చేశారు.

Union Minister Bandi Sanjay

ప్రకృతి వ్యవసాయానికి బడ్జెట్‌లో రూ.2,400 కోట్లు

ప్రస్తుతం భూమి అంతా కెమికల్స్ (రసాయన ఎరువులు) తో నిండిపోయిందని, మనుషులకు వస్తున్న రోగాలకు మనమే కారకులమని బండి సంజయ్ పేర్కొన్నారు.

రసాయన సాగును దూరం చేసి, ప్రకృతి వ్యవసాయం (Natural Farming) వైపు రైతులను ప్రోత్సహించేందుకు కేంద్ర ప్రభుత్వం బడ్జెట్‌లో రూ.2,400 కోట్లు కేటాయించిందని తెలిపారు.
ప్రకృతి వ్యవసాయం ప్రారంభించిన మొదటి రెండు, మూడు సంవత్సరాలు ఆశించిన లాభాలు రాకపోయినా, ఆ తర్వాత నాణ్యమైన దిగుబడితో రైతన్నలు కోటీశ్వరులు కావడం ఖాయమని స్పష్టం చేశారు.
ఆర్గానిక్ (సేంద్రీయ) ఉత్పత్తులకు మార్కెట్‌లో భారీ డిమాండ్ ఉందని, ప్రజలు ఎంత ధరైనా పెట్టి కొనేందుకు సిద్ధంగా ఉన్నారని పేర్కొన్నారు.

Union Minister Bandi Sanjay : యూరియా దిగుమతులపై వేల కోట్ల భారం.. కరీంనగర్‌లో సరికొత్త లక్ష్యం!

మన దేశంలో యూరియా కోసం బడ్జెట్‌లో రూ.2 లక్షల కోట్లు ఖర్చు చేస్తున్నామని, అందులో రూ.1.20 లక్షల కోట్ల సొమ్మును విదేశాలకు పంపి యూరియా దిగుమతి చేసుకోవడం బాధాకరమని కేంద్రమంత్రి అన్నారు. కరీంనగర్ రైతుల కోసం భరోసా: > రాబోయే రెండు సంవత్సరాలలో కరీంనగర్ పార్లమెంట్ నియోజకవర్గ పరిధిలో దాదాపు 25,000 మంది అన్నదాతలను ప్రకృతి వ్యవసాయం వైపు మళ్లించేలా చర్యలు తీసుకుంటామని హామీ ఇచ్చారు. ఈ విధానంలో పండించిన పంటలకు మంచి మద్దతు ధర లభించేలా చూస్తామని రైతులకు భరోసా ఇచ్చారు.