Mancherial Crime News: మంచిర్యాల జిల్లా జన్నారం మండలంలో విషాదం చోటుచేసుకుంది. టీవీ చూడొద్దని తల్లిదండ్రులు మందలించినందుకు మనస్తాపం చెందిన ఓ విద్యార్థిని బలవన్మరణానికి పాల్పడటం స్థానికంగా తీవ్ర కలకలం రేపింది.

ఈ ఘటనకు సంబంధించిన పూర్తి వివరాలను జన్నారం ఎస్సై జి. ఉదయ్ కిరణ్ వెల్లడించారు.

చిన్న కారణంతో నిండు ప్రాణం బలి

జన్నారం మండలం రోటిగూడ గ్రామానికి చెందిన మోత్కూరి అక్షయ (19) ప్రస్తుతం డిగ్రీ ప్రథమ సంవత్సరం చదువుతోంది. అయితే, అక్షయ తరచూ టీవీ చూస్తూ సమయాన్ని గడుపుతుండటంతో తల్లిదండ్రులు ఆమెను మందలించారు. చదువుపై దృష్టి పెట్టాలని, ఎక్కువ సేపు టీవీ చూడటం సరికాదని సూచించారు. తల్లిదండ్రుల మాటలతో తీవ్ర మనస్తాపానికి గురైన అక్షయ, ఇంట్లో ఎవరూ లేని సమయంలో పురుగుల మందు తాగింది.

Read Also: Suvendu Adhikari PA: సువేందు అధికారి పీఏ చంద్రనాథ్ రథ్ దారుణ హత్య?

Mancherial Crime News: పోలీసుల దర్యాప్తు

అపస్మారక స్థితిలో ఉన్న అక్షయను గమనించిన కుటుంబ సభ్యులు వెంటనే ఆసుపత్రికి తరలించినప్పటికీ, చికిత్స పొందుతూ ఆమె ప్రాణాలు కోల్పోయింది. సమాచారం అందుకున్న జన్నారం పోలీసులు ఘటనా స్థలానికి చేరుకుని వివరాలు సేకరించారు. చిన్న విషయానికే విద్యార్థిని ఆత్మహత్య చేసుకోవడం ఆ గ్రామంలో విషాద ఛాయలు నింపింది. ఈ మేరకు పోలీసులు కేసు నమోదు చేసుకుని దర్యాప్తు చేస్తున్నారు.