డ్రైవర్ నిర్లక్ష్యం.. బస్సు ఢీకొని వ్యక్తి మృతి!

Kamareddy Bus Accident: కామారెడ్డి జిల్లా ఎల్లారెడ్డి పట్టణంలోని బస్ స్టాండ్ ప్రాంగణంలో మంగళవారం ఒక ఘోర ప్రమాదం చోటుచేసుకుంది. ఆర్టీసీ బస్సు డ్రైవర్ నిర్లక్ష్యం కారణంగా ఒక నిండు ప్రాణం బలికావడం స్థానికంగా కలకలం రేపింది.

బస్ స్టాండ్ లోపలే ఈ ప్రమాదం జరగడంతో ప్రయాణికులు ఒక్కసారిగా భయాందోళనకు గురయ్యారు.

ప్రమాదం జరిగిన తీరు

ప్రత్యక్ష సాక్షుల కథనం ప్రకారం.. బస్ స్టాండ్ ప్రాంగణంలో విజయ్ (38) అనే వ్యక్తి నడుచుకుంటూ వెళ్తుండగా, అదే సమయంలో డిపో నుంచి బయటకు వస్తున్న ఆర్టీసీ బస్సు ఆయనను బలంగా ఢీకొట్టింది. ఈ ప్రమాదంలో విజయ్ తీవ్రంగా గాయపడి అక్కడికక్కడే మృతి చెందారు. మృతుడు ఎల్లారెడ్డికి చెందిన వ్యక్తిగా గుర్తించారు.

Kamareddy Bus Accident: డ్రైవర్ నిర్లక్ష్యమే కారణమా?

బస్ స్టాండ్ వంటి రద్దీ ప్రాంతంలో బస్సును అతివేగంగా, నిర్లక్ష్యంగా నడపడం వల్లే ఈ ప్రమాదం జరిగిందని అక్కడ ఉన్న ప్రయాణికులు, స్థానికులు ఆరోపిస్తున్నారు. బస్సు డ్రైవర్ అజాగ్రత్తే విజయ్ మరణానికి కారణమని మృతుని బంధువులు ఆగ్రహం వ్యక్తం చేస్తున్నారు. సమాచారం అందుకున్న పోలీసులు ఘటనా స్థలానికి చేరుకుని పరిస్థితిని సమీక్షించారు. మృతదేహాన్ని పోస్టుమార్టం నిమిత్తం స్థానిక ఆసుపత్రికి తరలించి, కేసు నమోదు చేసి దర్యాప్తు జరుపుతున్నారు.