పశ్చిమ బెంగాల్ ముఖ్యమంత్రి మమతా బెనర్జీ, కేంద్ర ఎన్నికల సంఘం (EC) తీసుకున్న తాజా నిర్ణయంపై ధర్మపోరాటానికి దిగారు. కౌంటింగ్ ప్రక్రియలో కేంద్ర ప్రభుత్వ అధికారుల జోక్యంపై అభ్యంతరం వ్యక్తం చేస్తూ ఆమె సుప్రీంకోర్టును ఆశ్రయించారు.

ఓట్ల లెక్కింపు సమయం దగ్గరపడుతున్న వేళ, కౌంటింగ్ సూపర్వైజర్లుగా కేంద్ర ప్రభుత్వ అధికారులు లేదా ప్రభుత్వ రంగ సంస్థల (PSU) ఉద్యోగులను నియమించాలని ఎన్నికల సంఘం తీసుకున్న నిర్ణయంపై టీఎంసీ (TMC) తీవ్ర ఆగ్రహం వ్యక్తం చేసింది. ఈ నిబంధనను సవాలు చేస్తూ సుప్రీంకోర్టులో పిటిషన్ దాఖలు చేసింది. ఎన్నికల ఫలితాల పారదర్శకతను దెబ్బతీసేలా ఈ నిర్ణయం ఉందని, దీనిపై అత్యవసర విచారణ జరపాలని మమతా బెనర్జీ నేతృత్వంలోని ప్రభుత్వం అత్యున్నత న్యాయస్థానాన్ని కోరింది.

Read Also : ముంబై పుచ్చకాయ మరణాలు.. ఫోరెన్సిక్ నివేదికలో సంచలన విషయాలు

నిబంధనపై అభ్యంతరం.. టీఎంసీ వాదన ఇదే

కౌంటింగ్ కేంద్రాల్లో ప్రతి టేబుల్ వద్ద ఉండే సూపర్వైజర్ లేదా అసిస్టెంట్లలో కచ్చితంగా ఒకరు కేంద్ర ప్రభుత్వ అధికారి ఉండాలని పశ్చిమ బెంగాల్ అదనపు సీఈఓ (CEO) ప్రకటించారు. అయితే, కేంద్ర ప్రభుత్వం ఒక రాజకీయ పార్టీ నియంత్రణలో ఉంటుందని, అటువంటప్పుడు కేంద్ర ప్రభుత్వ ఉద్యోగులు కౌంటింగ్ ప్రక్రియలో ఉంటే వారు అధికార పార్టీ ఒత్తిడికి లోనయ్యే లేదా ప్రభావితమయ్యే అవకాశం ఉందని టీఎంసీ వాదిస్తోంది. ఇది నిష్పాక్షికంగా జరగాల్సిన లెక్కింపు ప్రక్రియను తప్పుదోవ పట్టించడమేనని ఆ పార్టీ ఆరోపిస్తోంది.