Ramani Kalyanam Movie: సూర్య వశిష్ట, దీప్షిక చంద్రన్, విజయ్ ఆదిరెడ్డి దర్శకత్వంలో తెరకెక్కిన సరికొత్త చిత్రం 'రమణి కళ్యాణం'. కైట్స్ క్రియేటివ్స్ బ్యానర్‌పై వైవిధ్యమైన కథతో ఈ సినిమా రూపుదిద్దుకుంది.

కేవలం గ్లామర్, కమర్షియల్ హంగులకే పరిమితం కాకుండా.. ప్రేమ, గాఢమైన భావోద్వేగాలు, జీవితంపై ఆశను రేకెత్తించే ఒక మంచి ఎమోషనల్ ప్రేమకథగా దర్శకుడు ఈ చిత్రాన్ని ప్రేక్షకుల ముందుకు తీసుకొచ్చారు.

Read Also : Peddi Hellallallo Song Promo:పెద్ది నుంచి ఐటెం సాంగ్ ప్రోమో విడుదల

Ramani Kalyanam movie review

కథ

సంజన (దీప్షిక చంద్రన్) చిన్నప్పుడే జరిగిన ఒక ప్రమాదంలో తన కంటి చూపును కోల్పోతుంది. అయినప్పటికీ ఆమె జీవితంపై ఏమాత్రం నమ్మకం కోల్పోకుండా, తనకు ఎలాంటి లోపం లేదన్న ధైర్యంతో ఆత్మవిశ్వాసంతో ముందుకు సాగుతుంది. ఒకవైపు పబ్‌లో సింగర్‌గా, మరోవైపు ఆర్జేగా పనిచేస్తూ నలుగురు అనాథ పిల్లలు, ఓ బామ్మతో కలిసి ఆనందంగా జీవిస్తుంది. మరోవైపు, రాజ్ (సూర్య వశిష్ట) ఒక ప్రమాదం కారణంగా నడవలేక వీల్‌చైర్‌కే పరిమితమవుతాడు. ఈ లోపం వల్ల జీవితంపై పూర్తిగా నిరాశతో ఉన్న రాజ్‌కు, సంజనతో జరిగిన ఒక చిన్న గొడవ పరిచయంగా మారుతుంది. ఆ పరిచయం కాస్తా క్రమంగా బలమైన ప్రేమగా రూపాంతరం చెందుతుంది. ఇద్దరూ ఒకరికి ఒకరు అండగా నిలుస్తూ తమ బంధాన్ని పెళ్లి వరకు తీసుకెళ్లాలని నిర్ణయించుకుంటారు. కానీ, రాజ్ గతం ఏంటి? అతని ఆరోగ్య సమస్యలు, సంజన జీవితంలో దాగున్న రహస్యాలు వారి ప్రేమను ఎలాంటి మలుపు తిప్పాయి? అనేదే ఈ సినిమా కథ.

విశ్లేషణ

టీజర్, ట్రైలర్ నుంచే ‘నడవలేని అబ్బాయి - చూపులేని అమ్మాయి’ మధ్య ప్రేమకథ అనే కాన్సెప్ట్ ప్రేక్షకుల్లో మంచి ఆసక్తిని కలిగించింది. సినిమా మొదటి భాగం మొత్తం పాత్రల పరిచయం, వారి శారీరక లోపాలు, వారి మధ్య పెరిగే అనుబంధం చుట్టూ నెమ్మదిగా సాగుతుంది. ఇక ఇంటర్వెల్ సమయానికి వచ్చే ఊహించని ఎమోషనల్ మలుపు సెకండ్ హాఫ్‌పై క్యూరియాసిటీని పెంచుతుంది.

నటీనటుల ప్రదర్శన

నటీనటుల విషయానికి వస్తే.. హీరోయిన్ దీప్షిక చంద్రన్ ఈ సినిమాలో ప్రధాన ఆకర్షణగా నిలిచింది. చూపులేని అమ్మాయి పాత్రలో ఆమె పండించిన హావభావాలు, నటన చాలా సహజంగా అనిపిస్తాయి. హీరో సూర్య వశిష్ట కూడా వీల్‌చైర్‌కే పరిమితమైన నిరాశాపూరితమైన వ్యక్తిగా తన పాత్రను చాలా చక్కగా మోశాడు. ప్రముఖ కమెడియన్ శ్రీనివాస రెడ్డి ఈసారి కామెడీ కాకుండా ఒక మంచి ఎమోషనల్ పాత్రలో కనిపించి మెప్పించారు. యాంకర్ శ్యామల, చైతన్య జొన్నలగడ్డ, ప్రభావతి తదితరులు తమ పాత్రల పరిధి మేరకు న్యాయం చేశారు.

సాంకేతిక అంశాలు

సాంకేతిక పరంగా సినిమాటోగ్రఫీ చాలా కలర్‌ఫుల్‌గా ఉండి విజువల్స్ పరంగా ఆకట్టుకుంటుంది. బ్యాక్‌గ్రౌండ్ మ్యూజిక్ ముఖ్యమైన భావోద్వేగ సన్నివేశాలను బాగా ఎలివేట్ చేసింది. అయితే పాటలు అంతగా గుర్తుండవు, కేవలం సాధారణంగా అనిపిస్తాయి. ఎడిటింగ్‌పై మరికొంత శ్రద్ధ పెట్టి, ఫస్ట్ హాఫ్‌లోని కొన్ని ల్యాగ్ సన్నివేశాలను తగ్గించి ఉంటే సినిమా మరింత క్రిస్ప్‌గా ఉండేది. ఛాలెంజింగ్ పాత్రలతో ఒక స్వచ్ఛమైన ప్రేమకథను తెరకెక్కించడంలో దర్శకుడు తన ప్రతిభను చాటుకున్నారు. కైట్స్ క్రియేటివ్స్ నిర్మాణ విలువలు కథకు తగ్గట్టుగా బాగున్నాయి.