ముంబై ఇండియన్స్ కెప్టెన్ హార్దిక్ పాండ్య ఈ సీజన్‌లో ఆల్‌రౌండర్‌గా పూర్తిగా నిరాశపరుస్తున్నారు. ఇప్పటివరకు జరిగిన 7 మ్యాచుల్లో కేవలం 98 పరుగులు మాత్రమే చేసి బ్యాటింగ్ వైఫల్యాన్ని చాటుకున్నారు. అటు బౌలింగ్‌లోనూ పరిస్థితి ఏమాత్రం ఆశాజనకంగా లేదు. 228 పరుగులు సమర్పించుకుని కేవలం 3 వికెట్లు మాత్రమే తీశారు. ముఖ్యంగా 13కు పైగా ఉన్న ఎకానమీ రేటు జట్టును దెబ్బతీస్తోంది. నిన్నటి మ్యాచ్‌లో కీలక సమయంలో తొలి 2 ఓవర్లలోనే 38 పరుగులు ఇచ్చిన హార్దిక్, ఒత్తిడి తట్టుకోలేక చివరి ఓవర్లలో బౌలింగ్ చేయడానికే సాహసించకపోవడం నెటిజన్ల ఆగ్రహానికి కారణమవుతోంది.

Read Also : MI vs CSK Match Highlights: పవర్ ప్లేనే మా పతనాన్ని శాసించింది: హార్దిక్ పాండ్యా విశ్లేషణ

గుజరాత్ టైటాన్స్ సక్సెస్ vs ముంబై ఇండియన్స్ ఫెయిల్యూర్

గతంలో గుజరాత్ టైటాన్స్ (GT) జట్టును అద్భుతంగా నడిపించిన హార్దిక్, ముంబైకి వచ్చాక ఆ మ్యాజిక్ రిపీట్ చేయలేకపోతున్నారు. జీటీ కెప్టెన్‌గా 2022లో టైటిల్ అందించడమే కాకుండా, 2023లో జట్టును ఫైనల్‌కు చేర్చారు. కానీ ముంబైకి కెప్టెన్ అయ్యాక 2024లో పాయింట్ల పట్టికలో చివరి స్థానంలో నిలవగా, 2025లో అతి కష్టమ్మీద నాలుగో స్థానానికి చేరుకున్నారు. ప్రస్తుత సీజన్‌లో 7 మ్యాచుల్లో కేవలం 2 విజయాలే సాధించి ప్లేఆఫ్స్ అవకాశాలను సంక్లిష్టంగా మార్చుకున్నారు. స్టార్ ప్లేయర్లు ఉన్నప్పటికీ జట్టును సమన్వయం చేయడంలో హార్దిక్ విఫలమవుతున్నారనే అభిప్రాయం వ్యక్తమవుతోంది.

కెప్టెన్సీ మార్పుపై వస్తున్న విమర్శలు

రోహిత్ శర్మను కాదని హార్దిక్‌కు కెప్టెన్సీ ఇవ్వడంపై ముంబై అభిమానులు మొదటి నుంచీ అసంతృప్తితోనే ఉన్నారు. తాజా సీజన్ ప్రదర్శన ఆ అసంతృప్తిని మరింత పెంచింది. మైదానంలో హార్దిక్ తీసుకుంటున్న నిర్ణయాలు, బౌలింగ్ మార్పులు మరియు బ్యాటింగ్ ఆర్డర్ ప్రయోగాలు వికటిస్తున్నాయి. జట్టులో సమన్వయం లోపించినట్లు స్పష్టంగా కనిపిస్తోందని విశ్లేషకులు చెబుతున్నారు. మిగిలిన మ్యాచుల్లోనైనా హార్దిక్ తన వ్యక్తిగత ఫామ్ మెరుగుపరుచుకుని జట్టును గెలుపు బాట పట్టించకపోతే, ముంబై మేనేజ్‌మెంట్ భవిష్యత్తులో కఠిన నిర్ణయాలు తీసుకునే అవకాశం ఉంది.

Read Also hindi news: hindi.vaartha.com

Read Also Epaper : epaper.vaartha.com

Read Also :

టీఎంసీదే అధికారం: మమతా బెనర్జీ ధీమా