OG 2 update : టాలీవుడ్‌లో ఇప్పుడు మరోసారి ఓజీ 2 గురించి భారీ చర్చ మొదలైంది. డైరెక్టర్ సుజీత్ ప్రస్తుతం ఓజీ సీక్వెల్‌పై పూర్తిగా ఫోకస్ పెట్టినట్టు సినీ వర్గాల్లో టాక్ వినిపిస్తోంది.

పవర్ స్టార్ పవన్ కళ్యాణ్ హీరోగా వచ్చిన ఓజీ భారీ విజయాన్ని అందుకున్న తర్వాత నుంచే రెండో భాగంపై అభిమానుల్లో అంచనాలు పెరిగిపోయాయి.

ఓజీ సినిమా పవన్ కళ్యాణ్ కెరీర్‌లోనే స్టైలిష్ యాక్షన్ బ్లాక్‌బస్టర్‌గా నిలిచింది. సుజీత్ తెరకెక్కించిన యాక్షన్ సన్నివేశాలు, పవన్ పాత్ర డిజైన్ ప్రేక్షకులను బాగా ఆకట్టుకున్నాయి. ముఖ్యంగా పవన్ కళ్యాణ్‌ను చూపించిన తీరు అభిమానులకు ఫుల్ కిక్ ఇచ్చింది.

ఓజీ తర్వాత హీరో నానితో బ్లడీ రోమియో సినిమా చేయాలని సుజీత్ ప్లాన్ చేసిన సంగతి తెలిసిందే. అయితే డేట్స్ సమస్యలు, నిర్మాణ కారణాలతో ఆ సినిమా ఆలస్యమైందని సమాచారం. అలాగే నాని ప్రస్తుతం చేస్తున్న మరో సినిమా కారణంగా కూడా ఈ ప్రాజెక్ట్ ముందుకు వెళ్లలేదని టాలీవుడ్‌లో ప్రచారం జరుగుతోంది.

ఈ గ్యాప్‌ను ఉపయోగించుకుంటూ సుజీత్ ఇప్పుడు ఓజీ 2 కథపై కసరత్తు చేస్తున్నాడట. ఈసారి కథను మరింత భారీ స్థాయిలో తెరకెక్కించేందుకు సిద్ధమవుతున్నట్టు తెలుస్తోంది. మొదటి భాగంతో పోలిస్తే సీక్వెల్‌లో యాక్షన్, భావోద్వేగాలు ఇంకా ఎక్కువగా ఉండబోతున్నాయని సినీ వర్గాలు చెబుతున్నాయి.

అలాగే ఓజీ 2లో కొన్ని కొత్త పాత్రలను కూడా జోడించనున్నట్టు సమాచారం. పవన్ కళ్యాణ్ పాత్రను మరింత పవర్‌ఫుల్‌గా చూపించేందుకు ప్రత్యేకంగా స్క్రిప్ట్ రెడీ చేస్తున్నారని తెలుస్తోంది. అభిమానులు ఊహించని ట్విస్టులు కూడా సినిమాలో ఉండే అవకాశం ఉందని టాక్ వినిపిస్తోంది.

ఓజీ విజయోత్సవ వేడుకల సమయంలోనే పవన్ కళ్యాణ్ సీక్వెల్‌పై హింట్ ఇచ్చిన విషయం తెలిసిందే. అప్పటి నుంచే అభిమానులు ఓజీ 2 కోసం ఆసక్తిగా ఎదురుచూస్తున్నారు. ఇప్పుడు సుజీత్ స్క్రిప్ట్ పనులు ప్రారంభించాడనే వార్తలతో సోషల్ మీడియాలో మళ్లీ హైప్ మొదలైంది.