తమిళ ప్రజలు ఎంతో ఆసక్తిగా ఎదురుచూస్తున్న తరుణం రానే వచ్చింది. తమిళనాడు కొత్త ముఖ్యమంత్రిగా టీవీకే (TVK) అధినేత విజయ్ నేడు ప్రమాణ స్వీకారం చేయనున్నారు.

చెన్నైలోని నెహ్రూ ఇండోర్ స్టేడియం ఈ చారిత్రాత్మక వేడుకకు వేదిక కానుంది. నేడు ఉదయం 10 గంటలకు గవర్నర్ ఆయన చేత ప్రమాణ స్వీకారం చేయించనున్నారు. ఇప్పటికే స్టేడియం పరిసరాలు విజయ్ అభిమానులు, పార్టీ కార్యకర్తలతో కిక్కిరిసిపోయాయి. ‘సినిమా హీరో నుంచి ప్రజా నాయకుడి వరకు’ సాగిన ఆయన ప్రయాణం నేడు అత్యున్నత శిఖరానికి చేరుతోంది. ఈ వేడుకను కళ్లారా చూసేందుకు తమిళనాడు నలుమూలల నుంచి అశేష జనవాహిని చెన్నైకి తరలివచ్చింది.

Read Also : తమిళనాడు సీఎంగా విజయ్ ప్రమాణ స్వీకారం.. అతిథుల జాబితాలో ప్రముఖులు!

తరలిరానున్న రాజకీయ దిగ్గజాలు.. అతిథుల జాబితాలో హేమాహేమీలు

విజయ్ ప్రమాణ స్వీకార కార్యక్రమానికి జాతీయ స్థాయి రాజకీయ నేతలు హాజరుకావడం విశేషం. కాంగ్రెస్ పార్టీ అగ్రనేతలు మల్లికార్జున ఖర్గే, రాహుల్ గాంధీ ఈ వేడుకకు విచ్చేస్తున్నారు. విజయ్ ప్రభుత్వానికి మద్దతు ఇస్తున్న కూటమి పార్టీల నేతలతో పాటు, పొరుగు రాష్ట్రాల ముఖ్యమంత్రులు కూడా హాజరయ్యే అవకాశం ఉంది. కేవలం రాజకీయ నేతలే కాకుండా, దక్షిణాది సినీ పరిశ్రమకు చెందిన ప్రముఖ నటులు, దర్శకులు ఈ వేడుకలో భాగస్వాములు కానున్నారు. కట్టుదిట్టమైన భద్రతా ఏర్పాట్ల మధ్య జరుగుతున్న ఈ కార్యక్రమం, తమిళనాడులో మారిన రాజకీయ సమీకరణాలకు అద్దం పడుతోంది.

కోట్లాది మంది ఆశలు.. విజయ్ ముందున్న సవాళ్లు

అభిమానులు ‘దళపతి’గా పిలుచుకునే విజయ్ నుంచి ప్రజలు భారీ మార్పును కోరుకుంటున్నారు. విద్య, వైద్యం మరియు అవినీతి రహిత పాలనపై ఆయన ఇచ్చిన హామీలు ఏ మేరకు నెరవేరుతాయోనని సామాన్యులు ఆశగా ఎదురుచూస్తున్నారు. సంప్రదాయ రాజకీయ పార్టీలను కాదని, ఒక కొత్త శక్తికి పట్టం కట్టిన తమిళ ప్రజల నమ్మకాన్ని నిలబెట్టుకోవాల్సిన బాధ్యత ఇప్పుడు విజయ్‌పై ఉంది. ప్రమాణ స్వీకారం ముగిసిన వెంటనే ఆయన కీలక ఫైళ్లపై సంతకం చేసే అవకాశం ఉందని సమాచారం. ఈ క్రతువుతో తమిళనాడులో ‘విజయ్ శకం’ అధికారికంగా ప్రారంభం కాబోతోంది.