Canada News: కెనడాలో భారత సంతతికి చెందిన ఒక పోలీస్ అధికారి విధి నిర్వహణలో ప్రాణాలు కోల్పోయారు. ఒంటారియో ప్రావిన్షియల్ పోలీస్ (ఓపీపీ) విభాగంలో పనిచేస్తున్న కానిస్టేబుల్ తరుణ్ బాలి, మంగళవారం ఒక దర్యాప్తు సందర్భంగా తీవ్రంగా గాయపడి మరణించినట్లు అధికారులు ధ్రువీకరించారు.

ఈ ఘటనకు సంబంధించి ఒక వ్యక్తిని అదుపులోకి తీసుకున్నట్లు పోలీసులు తెలిపారు.

ఒంటారియోలోని హియర్స్ట్ సమీపంలో మంగళవారం మధ్యాహ్నం 12:30 గంటల సమయంలో ఈ విషాదం చోటుచేసుకుంది. కెండల్ కన్సెషన్ రోడ్ 7, కన్సెషన్ రోడ్ 6 వద్ద అధికారులు ఒక కేసు దర్యాప్తు చేస్తుండగా ఈ ఘటన జరిగింది. ఈ క్రమంలో తీవ్రంగా గాయపడిన తరుణ్ బాలిని ఆసుపత్రికి తరలించగా, అప్పటికే ఆయన మరణించినట్లు వైద్యులు ప్రకటించారు.

Read Also : London Crime: లండన్‌లో భవనం పైనుంచి పడి భారతీయ కుటుంబం మృతి.. ఆత్మహత్యా? హత్యా?

Tragedy in Canada: Indian-origin police officer dies in the line of duty.

Canada News: కమిషనర్ థామస్ కారిక్ సంతాపం

రెండన్నరేళ్ల సర్వీసు ఉన్న తరుణ్ బాలి, డఫెరిన్ డిటాచ్‌మెంట్‌లో విధులు నిర్వహిస్తున్నారు. ప్రస్తుతం జేమ్స్ బే డిటాచ్‌మెంట్‌తో కలిసి ప్రత్యేక విధుల్లో భాగంగా హియర్స్ట్ ప్రాంతానికి వచ్చారు. ఆయన మరణవార్తను ఓపీపీ కమిషనర్ థామస్ కారిక్ సోషల్ మీడియా వేదికగా ధృవీకరించారు. “మా కానిస్టేబుల్ తరుణ్ బాలి విధి నిర్వహణలో మరణించారని చెప్పడానికి తీవ్రంగా చింతిస్తున్నాను. ఇతరులకు సేవ చేయడంలో ఆయన చూపిన ధైర్యం, నిబద్ధత మరువలేనివి. ఈ తీరని లోటును భరిస్తున్న ఆయన కుటుంబ సభ్యులకు, సహోద్యోగులకు నా ప్రగాఢ సానుభూతి” అని ఆయన పేర్కొన్నారు.

వివిధ విభాగాల ఆధ్వర్యంలో దర్యాప్తు

ఈ ఘటనపై ఓపీపీ క్రిమినల్ ఇన్వెస్టిగేషన్ బ్రాంచ్, చీఫ్ కరోనర్ కార్యాలయం, ఒంటారియో ఫోరెన్సిక్ పాథాలజీ సర్వీస్‌తో కలిసి దర్యాప్తు చేస్తోంది. బాలి మృతదేహానికి పరీక్షల నిమిత్తం టొరంటోలోని చీఫ్ కరోనర్ కార్యాలయానికి తరలించనున్నారు. హియర్స్ట్ నుంచి టొరంటో వరకు దాదాపు 10 గంటల పాటు సాగే ఈ ప్రయాణంలో అత్యవసర వాహనాల కాన్వాయ్ ఆయన భౌతికకాయానికి గౌరవ వందనంగా తోడుగా వెళ్లనుంది.

తరుణ్ బాలి మృతి పట్ల కెనడా వ్యాప్తంగా ఉన్న పోలీస్ సంఘాలు తీవ్ర సంతాపం వ్యక్తం చేశాయి. “ఇది ప్రతి పోలీస్ కుటుంబానికి ఒక పీడకల లాంటిది. ప్రజలను రక్షించే క్రమంలో మా సిబ్బంది రోజూ ఎలాంటి ప్రమాదాలను ఎదుర్కొంటారో ఈ ఘటన గుర్తుచేస్తోంది” అని ఓపీపీ అసోసియేషన్ ప్రెసిడెంట్ డేవిడ్ సబాటిని ఒక ప్రకటనలో ఆవేదన వ్యక్తం చేశారు. కెనడియన్ పోలీస్ అసోసియేషన్ కూడా బాలి కుటుంబానికి తమ ప్రగాఢ సానుభూతిని తెలియజేసింది. ఈ ఘటనపై ఏమైనా సమాచారం తెలిస్తే తమకు గానీ, క్రైమ్ స్టాపర్స్‌కు గానీ తెలియజేయాలని పోలీసులు ప్రజలను కోరారు.