Ketan Agarwal's Family Function: ప్రాణాలు కోల్పోవడానికి కొన్ని రోజుల ముందు 26 ఏళ్ల కేతన్ అగర్వాల్ ఎంత సంతోషంగా ఉన్నాడో తెలిపే ఒక వీడియో ప్రస్తుతం సోషల్ మీడియాలో వైరల్ అవుతోంది.
మే 7న జరిగిన ఒక ప్రైవేట్ కుటుంబ వేడుకలో ప్రదర్శన ఇచ్చిన ప్రముఖ గాయని రీతూ శర్మ ఈ వీడియోను పంచుకుంటూ, కేతన్ అగర్వాల్తో తనకు జరిగిన చివరి సంభాషణను గుర్తుచేసుకున్నారు. కేతన్ కాబోయే భార్య సియా గోయల్ తల్లిదండ్రులతో కలిసి అగర్వాల్ కుటుంబం జరుపుకున్న ఈ వేడుక, రెండు కుటుంబాల మధ్య ఉన్న సత్సంబంధాలను స్పష్టం చేస్తోంది.
‘మాయరా’ వేడుకలో నృత్యాలు – సంబరాలు
ఇది కేతన్ కజిన్ (బంధువు) వివాహానికి ముందు జరిగే ‘మాయరా’ (Mayra) అనే సాంప్రదాయ ఆచార వేడుక అని రీతూ శర్మ వివరించారు. ఈ ఆచారంలో భాగంగా, వధువు తరఫు మేనమామ (ఇక్కడ కేతన్ తండ్రి విశాల్) తన సోదరి బిడ్డ పెళ్లి ఖర్చుల కోసం బహుమతులు (మాయరా) తీసుకువస్తారు. ఈ వేడుకకు సియా గోయల్ హాజరు కాకపోయినప్పటికీ, ఆమె తల్లిదండ్రులు ప్రవీణ్ గోయల్, పూజా గోయల్ హాజరయ్యారు. వేడుకలో అందరూ కలిసి పాటలకు అనుగుణంగా నృత్యం చేస్తూ ఎంతో ఉల్లాసంగా గడిపారు. మొదటి వీడియోలో కేతన్ తండ్రి విశాల్, సియా తల్లిదండ్రులతో కలిసి ప్రసిద్ధ బాలీవుడ్ సాంగ్ “యమ్మ యమ్మ… బస్ ఆజ్ కీ రాత్ హై జిందగీ, కల్ హమ్ కహా తుమ్ కహా” అనే పాటకు స్టెప్పులేశారు. మరో వీడియోలో కేతన్, సియా తండ్రి ప్రవీణ్తో కలిసి ‘గదర్’ సినిమాలోని ‘మై నిక్లా గడ్డి లేకే’ పాటకు ఎంతో ఆనందంగా డ్యాన్స్ చేస్తూ కనిపించాడు.
Ketan Agarwal’s Family Function
Ketan Agarwal’s Family Function: “దయచేసి భోజనం చేయండి”.. మర్చిపోలేని చివరి మాటలు
రీతూ శర్మ ఆ కుటుంబంలో ప్రదర్శన ఇవ్వడం ఇది మూడవసారి. కేతన్ ఎంతో అమాయక స్వభావం కలవాడని, ప్రతి కార్యక్రమంలోనూ చురుకుగా పాల్గొంటూ అందరితో కలిసిపోయేవాడని ఆమె పేర్కొన్నారు. ఆ రాత్రి ప్రోగ్రామ్ ముగిసిన తర్వాత కేతన్ తనతో మాట్లాడిన చివరి మాటలను శర్మ గుర్తుచేసుకున్నారు. “రీతూ మేడమ్ మీరు అద్భుతంగా పాడారు. ఇది ఒక అందమైన సాయంత్రం, అంతా బాగా జరిగింది. దయచేసి భోజనం చేయండి” అని కేతన్ నాతో అన్నాడు. అక్కడి నుండి వెళ్లే ముందు నన్ను రెండు మూడు సార్లు తిన్నారా లేదా అని అడిగాడు. ఆ చివరి సంభాషణను నేను ఎప్పటికీ మర్చిపోలేను అని అన్నారు.
Epaper: epaper.vaartha.com