కుల వివక్షకు ప్రేమజంట బలి!

Siddipet crime: సిద్దిపేట జిల్లా చేర్యాల మండలంలోని ముస్త్యాల గ్రామంలో అత్యంత విషాదకర ఘటన వెలుగుచూసింది. ప్రేమించి పెళ్లి చేసుకున్న ముస్త్యాల గ్రామానికి చెందిన అనుముల రాకేష్ రెడ్డి (25), తరిగొప్పుల హారిక (22) ప్రాణాలు తీసుకోవడం స్థానికంగా కలకలం రేపింది.

వీరిద్దరూ మూడు నెలల క్రితమే ప్రేమ వివాహం చేసుకోగా, కులాలు వేరు కావడంతో రాకేష్ రెడ్డి కుటుంబ సభ్యులు వీరి బంధాన్ని అంగీకరించలేదు. పెళ్లయిన కొద్దిరోజులకే దంపతులు గ్రామానికి తిరిగి వచ్చినప్పటికీ, కుటుంబ సభ్యుల నుంచి ఆదరణ లభించకపోవడంతో తీవ్ర మనస్తాపానికి గురయ్యారు.

వరుస ఆత్మహత్యలు.. కౌన్సిలింగ్ ఇచ్చినా మారని పరిస్థితి

Unable to bear the loss of her husband, wife commits suicide-creates a stir in Siddipet.

కుటుంబ సభ్యుల నిరాకరణతో మనస్తాపం చెందిన హారిక గతంలోనే ఆత్మహత్యాయత్నానికి పాల్పడింది. ఈ క్రమంలో పోలీసులు జోక్యం చేసుకుని రాకేష్ రెడ్డి తల్లిదండ్రులకు కౌన్సిలింగ్ ఇచ్చారు. త్వరలోనే సాంప్రదాయబద్ధంగా వివాహం జరిపిస్తామని వారు పోలీసులకు హామీ ఇచ్చారు. అయితే, ఆ ప్రక్రియలో జాప్యం జరుగుతుండటంతో తీవ్ర ఒత్తిడికి లోనైన రాకేష్ రెడ్డి పురుగుల మందు తాగి ఆత్మహత్య చేసుకున్నాడు. తన భర్త మరణవార్త విని తట్టుకోలేకపోయిన హారిక, వెంటనే ఉరివేసుకుని ప్రాణాలు వదిలింది.

Siddipet crime: గ్రామస్థుల కంటతడి.. దర్యాప్తు చేస్తున్న పోలీసులు

ఒకేసారి భార్యాభర్తలు మరణించడంతో ముస్త్యాల గ్రామంలో విషాద ఛాయలు అలుముకున్నాయి. కుల వివక్ష మరియు కుటుంబ సభ్యుల మొండివైఖరి కారణంగానే ఇద్దరు యువతీయువకులు బలైపోయారని గ్రామస్థులు ఆవేదన వ్యక్తం చేస్తున్నారు. ఈ ఘటనపై కేసు నమోదు చేసిన పోలీసులు దర్యాప్తు ముమ్మరం చేశారు. కేవలం మూడు నెలల వైవాహిక జీవితం ఇలా విషాదాంతం కావడం ప్రతి ఒక్కరినీ కలిచివేస్తోంది.