Nara Lokesh Moscow Visit: ఆంధ్రప్రదేశ్ రాష్ట్రానికి అంతర్జాతీయ పెట్టుబడులను ఆకర్షించడమే లక్ష్యంగా ఐటీ, ఎలక్ట్రానిక్స్ మరియు పరిశ్రమల శాఖ మంత్రి నారా లోకేష్ రష్యాలో విస్తృతంగా పర్యటిస్తున్నారు.

ఇందులో భాగంగా మాస్కో వేదికగా ఆయన ఒక కీలకమైన సమావేశంలో పాల్గొన్నారు. రష్యా ప్రభుత్వానికి చెందిన ప్రముఖ రేర్ ఎర్త్ (విశిష్ట ఖనిజాల) పరిశోధన సంస్థ 'గిరెడ్‌మెట్ ఇనిస్టిట్యూట్' ఉన్నతాధికారులతో మంత్రి లోకేష్ భేటీ అయ్యారు. ఆంధ్రప్రదేశ్‌లో రెండు భారీ ప్రాజెక్టులను నెలకొల్పడానికి ఉన్న అనుకూలతలు, అవకాశాలపై ఈ సమావేశంలో సుదీర్ఘంగా చర్చించారు.

Giredmet Institute Russia

Read also: AP 10th Supplementary Evaluation: ఏపీలో రేపటి నుంచే టెన్త్ సప్లిమెంటరీ పేపర్ల మూల్యాంకనం..రిజల్ట్స్ ఎప్పుడంటే?

విశాఖ, శ్రీకాకుళంలో రిఫైనింగ్ హబ్..

ఉత్తరాంధ్ర ప్రాంతంలోని విశాఖపట్నం, శ్రీకాకుళం జిల్లాల్లో లభించే అపారమైన భారీ ఖనిజ సంపదను సమర్థవంతంగా వినియోగించుకోవాలని మంత్రి లోకేష్ ప్రతిపాదించారు. అక్కడ అత్యాధునిక సాంకేతికతతో కూడిన 'డీప్ ప్రాసెసింగ్ & రేర్ ఎర్త్ ఎలిమెంట్ (REE) రిఫైనింగ్ హబ్'ను ఏర్పాటు చేయాల్సిందిగా రష్యా సంస్థను కోరారు.

దీనితో పాటు, భారతదేశంలో రోజురోజుకూ పుంజుకుంటున్న ఎలక్ట్రిక్ వాహనాలు (EV), విండ్ ఎనర్జీ (పవన విద్యుత్) రంగాల అవసరాలను దృష్టిలో ఉంచుకుని నెల్లూరు జిల్లాలో ఒక భారీ ప్రాజెక్టును ప్రతిపాదించారు. గిరెడ్‌మెట్ సంస్థ అధునాతన సాంకేతిక భాగస్వామ్యంతో నెల్లూరులో 'నియోడైమియం మాగ్నెట్' (Neodymium Magnet) ఉత్పత్తి కేంద్రాన్ని నిర్మించేందుకు ముందుకు రావాలని లోకేష్ పిలుపునిచ్చారు.

ఈ భేటీ అనంతరం మంత్రి లోకేష్ ట్విట్టర్ (X) వేదికగా స్పందిస్తూ.. "విశాఖ, శ్రీకాకుళం జిల్లాల ఖనిజ వనరుల ఆధారంగా రేర్ ఎర్త్ ఎలిమెంట్ రిఫైనింగ్ హబ్ ఏర్పాటుకు, అలాగే నెల్లూరులో నియోడైమియం మాగ్నెట్ మ్యానుఫ్యాక్చరింగ్ యూనిట్ స్థాపనకు రష్యా సంస్థ భాగస్వామ్యాన్ని కోరడం జరిగింది" అని స్పష్టం చేశారు.