మద్యం తాగితే వాహనం సీజ్ చేయకూడదు.. పోలీసులకు కీలక ఆదేశాలు!

Telangana High Court: మద్యం తాగి వాహనం నడిపే వారిపై చర్యలు తీసుకునే క్రమంలో తెలంగాణ హైకోర్టు పోలీసులకు కీలక ఆదేశాలు జారీ చేసింది. డ్రంక్ అండ్ డ్రైవ్‌లో పట్టుబడినంత మాత్రాన వాహనాన్ని సీజ్ చేసే అధికారం పోలీసులకు లేదని న్యాయస్థానం స్పష్టం చేసింది.

ఈ మేరకు వాహనాల స్వాధీనంపై ఉన్న నిబంధనలను వివరిస్తూ పోలీసు యంత్రాంగానికి దిశానిర్దేశం చేసింది. సాధారణంగా వాహన తనిఖీల్లో మద్యం సేవించినట్లు తేలితే వెంటనే పోలీసులు బండిని సీజ్ చేసి పోలీస్ స్టేషన్‌కు తరలిస్తుంటారు. అయితే ఇకపై ఇలా నేరుగా సీజ్ చేయడం కుదరదని హైకోర్టు తన తీర్పులో పేర్కొంది.

Telangana High Court: Vehicle should not be seized if drunk.. Key orders to police!

Telangana High Court: వాహనాన్ని బంధువులకు అప్పగించాలి

మద్యం సేవించి వాహనం నడిపే వ్యక్తి మత్తులో ఉన్నట్లు నిర్ధారణ అయితే, వెంటనే ఆ వాహనాన్ని స్వాధీనం చేసుకోకూడదని కోర్టు స్పష్టం చేసింది. బదులుగా వాహనదారుడి బంధువులకు లేదా స్నేహితులకు సమాచారం అందించి, వారిని ఘటనా స్థలానికి పిలిపించి వాహనాన్ని వారికి అప్పగించాలని సూచించింది. వాహనాన్ని నడపగలిగే స్థితిలో ఉన్న వ్యక్తి ఎవరైనా బాధ్యత తీసుకుంటే, వారికి వాహనాన్ని ఇచ్చి పంపేయాలని పోలీసులకు ఆదేశాలు జారీ చేసింది. దీనివల్ల వాహనదారులకు అనవసరమైన ఇబ్బందులు కలగకుండా చూడవచ్చని అభిప్రాయపడింది.

పోలీస్ స్టేషన్‌కు ఎప్పుడు తరలించవచ్చంటే

ఒకవేళ డ్రైవర్ మత్తులో ఉండి, అతనికి తెలిసిన వారు లేదా బంధువులు ఎవరూ అందుబాటులో లేని పక్షంలో మాత్రమే పోలీసులు ప్రత్యామ్నాయ చర్యలు తీసుకోవాలి. అటువంటి అనివార్య పరిస్థితుల్లో మాత్రమే తగిన జాగ్రత్తలతో వాహనాన్ని పోలీస్ స్టేషన్‌కు తరలించవచ్చని హైకోర్టు వివరించింది. అంతే తప్ప, నిబంధనల పేరుతో నేరుగా వాహనాన్ని సీజ్ చేయడం చట్టబద్ధం కాదని కోర్టు స్పష్టం చేసింది. పోలీసు యంత్రాంగం తమ విధుల్లో భాగంగా చట్టబద్ధమైన విధానాలను మాత్రమే పాటించాలని, ఈ విషయంలో పౌరుల పట్ల సహేతుకంగా వ్యవహరించాలని పేర్కొంది.