Star Archer Jyothi Surekha: అంతర్జాతీయ ఆర్చరీ పోటీల్లో సరికొత్త రికార్డులతో చరిత్ర సృష్టిస్తోన్న ఆంధ్రప్రదేశ్‌కు చెందిన స్టార్ క్రీడాకారిణి వెన్నం జ్యోతి సురేఖ ఈ రోజు ఉదయం ఉండవల్లి నివాసంలో రాష్ట్ర విద్య, ఐటీ శాఖల మంత్రి నారా లోకేష్‌ను మర్యాదపూర్వకంగా కలిశారు.

ప్రతిష్టాత్మక 2026 ఆసియా క్రీడలకు భారత జట్టులో ఆమె మరోసారి చోటు దక్కించుకున్నారు. ఈ మెగా టోర్నీలో దేశానికి ప్రాతినిధ్యం వహించే అవకాశాన్ని ఆమె వరుసగా నాలుగోసారి అందుకోవడం విశేషం.

Read Also : Annamayya District Road Accident: కూలీల బొలేరో వాహనం బోల్తా..20 మందికి తీవ్ర గాయాలు!

Star archer Vennam Jyothi Surekha meets Minister Nara Lokesh!

Star Archer Jyothi Surekha: ఉండవల్లి నివాసంలో భేటీ

వెన్నం జ్యోతి సురేఖ తన కుటుంబ సభ్యులతో కలిసి మంత్రి నారా లోకేష్‌ను ఆయన నివాసంలో కలుసుకున్నారు. ఆసియా క్రీడల్లో పోటీపడే అత్యుత్తమ అవకాశం దక్కించుకున్న జ్యోతి సురేఖను ఈ సందర్భంగా మంత్రి లోకేష్ శాలువాతో సత్కరించి, ప్రత్యేకంగా అభినందిస్తూ తన హృదయపూర్వక శుభాకాంక్షలు తెలియజేశారు.

రాష్ట్రానికి గర్వకారణం.. ప్రభుత్వం అండగా ఉంటుంది

తన అసాధారణ ప్రతిభతో అంతర్జాతీయ విలువిద్య పోటీల్లో రాణిస్తూ జ్యోతి సురేఖ ఆంధ్రప్రదేశ్ రాష్ట్రానికి ఎంతో గర్వకారణంగా నిలిచారు” అని మంత్రి లోకేష్ కొనియాడారు. రాబోయే ఆసియా క్రీడల్లో కూడా ఆమె తన మేటి ప్రదర్శనతో సత్తా చాటి, దేశ కీర్తిప్రతిష్టలను ప్రపంచవ్యాప్తంగా మరింత పెంచాలని ఆయన ఆకాంక్షించారు. క్రీడాకారుల అభివృద్ధికి తమ ప్రభుత్వం కట్టుబడి ఉందని, జ్యోతి సురేఖకు ప్రభుత్వం తరపున భవిష్యత్తులో అన్ని విధాలా అండగా ఉంటామని ఈ సందర్భంగా మంత్రి భరోసా ఇచ్చారు.