GT vs RR, Qualifier 2 : ఇండియన్ ప్రీమియర్ లీగ్ (IPL) క్లైమాక్స్ దశకు చేరుకుంది. నేడు రాత్రి 7:30 గంటలకు ముల్లన్‌పూర్ వేదికగా గుజరాత్ టైటాన్స్ (GT), రాజస్థాన్ రాయల్స్ (RR) జట్ల మధ్య అత్యంత ఉత్కంఠభరితమైన క్వాలిఫయర్-2 మ్యాచ్ జరగనుంది.

ఈ మ్యాచ్‌లో గెలిచిన జట్టు నేరుగా మే 31న జరిగే గ్రాండ్ ఫైనల్లో రాయల్ ఛాలెంజర్స్ బెంగళూరు (RCB)తో తలపడుతుంది. ఐపీఎల్ చరిత్రను పరిశీలిస్తే.. ఇప్పటివరకు ఇరు జట్లు 10 మ్యాచ్‌ల్లో తలపడగా, గుజరాత్ టైటాన్స్ 7 విజయాలతో స్పష్టమైన ఆధిపత్యాన్ని ప్రదర్శించింది. అయితే, గత 2025 సీజన్ నుండి చూసుకుంటే ఇరు జట్లు చెరో రెండు విజయాలతో (2-2) సమంగా నిలిచాయి. దీంతో ఈ రోజు జరిగే చావో రేవో పోరులో ఏ జట్టు పైచేయి సాధిస్తుందనేది క్రికెట్ అభిమానుల్లో తీవ్ర ఉత్కంఠను రేకెత్తిస్తోంది.

Read Also : వైభవ్ సూర్యవంశీ విధ్వంసం.. ట్విట్టర్ వేదికగా సచిన్ ప్రశంసలు!

టాప్-3 బ్యాటర్ల పైనే భారం.. సూర్యవంశీని జీటీ అడ్డుకుంటుందా?

ఈ కీలక పోరులో ఇరు జట్ల గెలుపోటములు వారి టాప్-3 బ్యాటర్ల ప్రదర్శన పైనే పూర్తిగా ఆధారపడి ఉన్నాయి. ముఖ్యంగా యువ సంచలనం వైభవ్ సూర్యవంశీని గుజరాత్ బౌలర్లు ఏ విధంగా కట్టడి చేస్తారనేది ఈ మ్యాచ్‌లోనే అతిపెద్ద ఆసక్తికరమైన అంశంగా మారింది. ముల్లన్‌పూర్ పిచ్‌పై పవర్‌ప్లేలో ఇరు జట్ల ఓపెనర్లు ఇచ్చే ఆరంభం మ్యాచ్ స్వరూపాన్నే మార్చేసే అవకాశం ఉంది. గుజరాత్ బౌలింగ్ లైనప్ వర్సెస్ రాజస్థాన్ హిట్టర్ల మధ్య సాగబోయే ఈ పోరులో ఒత్తిడిని సమర్థవంతంగా అధిగమించి, వ్యూహాలను పక్కాగా అమలు చేసిన జట్టుకే ఫైనల్ టికెట్ దక్కనుంది.