పాకిస్థాన్‌లో మళ్లీ ఉగ్రదాడి.. 12 మంది పోలీసులు మృతి

పాకిస్థాన్‌లో మళ్లీ ఉగ్రదాడి

Pakistan Terror Attack : పాకిస్థాన్‌లోని ఖైబర్ పఖ్తుంఖ్వా ప్రావిన్స్‌లో మరోసారి ఉగ్రవాదులు రెచ్చిపోయారు. బన్ను ప్రాంతంలోని ఫతే ఖేల్ సమీపంలో ఉన్న పోలీస్ చెక్‌పోస్ట్‌పై జరిగిన దాడిలో 12 మంది పోలీసులు ప్రాణాలు కోల్పోయారు.

పాకిస్థాన్‌లో ఉగ్రవాద దాడులు మరోసారి కలకలం రేపుతున్నాయి. ఖైబర్ పఖ్తుంఖ్వా ప్రావిన్స్‌లోని బన్ను ప్రాంతం ఫతే ఖేల్ సమీపంలో ఉన్న ఓ పోలీస్ చెక్‌పోస్ట్‌ను లక్ష్యంగా చేసుకుని ఉగ్రవాదులు దాడికి పాల్పడ్డారు. ఈ దాడిలో 12 మంది పోలీసులు అక్కడికక్కడే మృతి చెందగా, మరో అయిదుగురు తీవ్రంగా గాయపడ్డారు. ఘటనతో ఆ ప్రాంతంలో భయాందోళనలు నెలకొన్నాయి. ఈ దాడికి ఇప్పటివరకు ఏ ఉగ్రవాద సంస్థ బాధ్యత వహిస్తూ అధికారిక ప్రకటన చేయలేదు.

పేలుడు పదార్థాలతో దాడి

పోలీసులు తెలిపిన వివరాల ప్రకారం.. పేలుడు పదార్థాలతో నిండిన కారుతో ఓ ఉగ్రవాది వేగంగా వచ్చి చెక్‌పోస్ట్‌ను ఢీకొట్టాడు. భారీ పేలుడు సంభవించడంతో చెక్‌పోస్ట్ భవనం పూర్తిగా ధ్వంసమైంది. ఆ వెంటనే ఆయుధాలతో వచ్చిన ఉగ్రవాదులు చెక్‌పోస్ట్‌లోకి చొరబడి విచక్షణారహితంగా కాల్పులు జరిపారు.

ఈ ఘటనలో ఓ పోలీసు అధికారి ఆచూకీ కూడా తెలియకుండా పోయినట్లు సమాచారం. కాల్పుల తర్వాత కొందరు భద్రతా సిబ్బందిని ఉగ్రవాదులు బందీలుగా తీసుకెళ్లినట్లు అనుమానిస్తున్నారు. ఈ దాడి తీవ్రతతో స్థానిక ప్రజలు భయభ్రాంతులకు గురయ్యారు.

Pakistan Terror Attack

ఆధునిక సాంకేతికత వినియోగం

ఈ దాడిలో ఉగ్రవాదులు ఆధునిక సాంకేతిక పరికరాలను కూడా ఉపయోగించినట్లు పాక్ భద్రతా దళాలు గుర్తించాయి. భద్రతా బలగాల కదలికలను గమనించేందుకు క్వాడ్‌కాప్టర్లు, భారీ ఆయుధాలను వినియోగించినట్లు అధికారులు వెల్లడించారు.

దాడి అనంతరం పాకిస్థాన్ సైన్యం అప్రమత్తమై ప్రాంతాన్ని పూర్తిగా తమ ఆధీనంలోకి తీసుకుంది. ఘటనకు పాల్పడిన ఉగ్రవాదుల కోసం గాలింపు చర్యలు చేపట్టారు. గతంలో కూడా ఖైబర్ పఖ్తుంఖ్వా ప్రాంతంలో పలు ఉగ్రదాడులు జరిగిన నేపథ్యంలో తాజాగా మరోసారి జరిగిన ఈ ఘటన పాకిస్థాన్‌లో భద్రతా పరిస్థితులపై ఆందోళన పెంచుతోంది. ఘటనపై పోలీసులు లోతుగా దర్యాప్తు కొనసాగిస్తున్నట్లు వెల్లడించారు.