Vangalapudi Anitha: పాయకరావుపేట సర్కిల్ ఇన్‌స్పెక్టర్ (సీఐ) సాకేటి శంకర్ రావుపై శాఖాపరమైన చర్యలు తీసుకోవడం ఖాయమని ఆంధ్రప్రదేశ్ హోంమంత్రి వంగలపూడి అనిత స్పష్టం చేశారు.

సదరు అధికారి గతంలో వ్యవహరించిన తీరు, ఆయనపై ఉన్న ఆరోపణల నేపథ్యంలో ఓ ప్రముఖ పత్రికలో వచ్చిన కథనంపై మంత్రి తాజాగా స్పందించారు. సోమవారం అనకాపల్లి జిల్లా నక్కపల్లిలో ఏర్పాటు చేసిన మీడియా సమావేశంలో ఆమె ఈ కీలక వ్యాఖ్యలు చేశారు.

Palasa MLA Gouthu Sireesha CI Issue

Read also: South Coast Railway zone: విశాఖ కేంద్రంగా దక్షిణ కోస్తా రైల్వే జోన్ ప్రారంభం

పలాస టీడీపీ కార్యకర్తల వేధింపుల నేపథ్యం..

గత ప్రభుత్వ హయాంలో శ్రీకాకుళం జిల్లా కాశీబుగ్గ సీఐగా శంకర్ రావు విధులు నిర్వహించారు. ఆ సమయంలో వందలాది మంది తెలుగుదేశం పార్టీ కార్యకర్తలపై తప్పుడు కేసులు నమోదు చేసి, వారిని తీవ్ర ఇబ్బందులకు గురిచేశారని జూన్ 1న ఒక ప్రత్యేక కథనం ప్రచురితమైంది. పలాస ఎమ్మెల్యే గౌతు శిరీషతో పాటు పలువురు స్థానిక నేతలను కూడా ఆయన టార్గెట్ చేశారని ఆ కథనంలో పేర్కొన్నారు. ఇంతటి వివాదాస్పద ట్రాక్ రికార్డ్ ఉన్న అధికారిని హోంమంత్రి అనిత ప్రాతినిధ్యం వహిస్తున్న సొంత నియోజకవర్గమైన పాయకరావుపేటలో నియమించడంపై సర్వత్రా విమర్శలు వెల్లువెత్తాయి.

Vangalapudi Anitha: కార్యకర్తలే ముఖ్యం: హోంమంత్రి అనిత

ఈ వివాదంపై హోంమంత్రి అనిత సూటిగా స్పందించారు. సదరు సీఐ వల్ల పలాస నియోజకవర్గంలో టీడీపీ శ్రేణులు పడిన ఇబ్బందులపై తనకు ఫిర్యాదులు వచ్చాయని ఆమె అంగీకరించారు.

“పార్టీ మనుగడకు కార్యకర్తలే ప్రాణాధారం. వారి గౌరవాన్ని కాపాడటం నా ప్రథమ కర్తవ్యం. కార్యకర్తల అండదండల వల్లే నేను ఈ రోజు నియోజకవర్గంలో ధైర్యంగా పనిచేయగలుగుతున్నాను.”

కొన్నిసార్లు అధికారుల గత చరిత్రకు సంబంధించిన పూర్తి సమాచారం ముందస్తుగా అందుబాటులో ఉండకపోవచ్చని, అయితే ఈ వ్యవహారం తన దృష్టికి వచ్చినందున సదరు అధికారిపై కచ్చితంగా చర్యలు ఉంటాయని ఆమె భరోసా ఇచ్చారు. కాగా, మే 2వ తేదీన శంకర్ రావు పాయకరావుపేట సీఐగా బాధ్యతలు స్వీకరించడం, ఆ తర్వాత ఆయన పాత చరిత్ర వెలుగులోకి రావడం ఈ వివాదానికి కారణమైంది.